Ubucuruzi bw’impunzi hagati y’u Rwanda n’Ubwongereza burimo gishegesha!

Mu kinyarwanda baca umugani ugira uti «Arimo gishegesha ntavura». Uyu munshinga w’ubucuruzi bw’impunzi hagati ya «Kagame» na «Rishi Sunak» ministre w’intebe w’Ubwongereza urimo gishegesha! Umucamanza wa Irlande ya ruguru (Irlande du Nord) «Bwana Michael Humphreys», yateye utwatsi ubu bucuruzi bw’impunzi buri hagati y’u Rwanda n’Ubwongereza aho avuga ko itegeko Ubwongereza bwatoye ryo kohereza abimukira basaba ubuhunzi muri icyo gihugu mu Rwanda ridashobora gushyirwa mu bikorwa n’igihugu cya « Irlande ya ruguru», kuko rinyuranyije n’amategeko mpuzamahanga! Niba kimwe mu bihugu bigize Ubwami bw’Ubwongereza nka « Irlande ya ruguru » kikuye muri ubwo bucuruzi bw’impunzi, ese aho ubwo buruzi ruvumwa buzajya mubikorwa?  

Ubwami bw’Ubwongereza (Royaume unis) bugizwe n’ibihugu 4 aribyo : Ubwongereza (Angleterre), Igihugu cya Galles (Pays de Galles), Ekose (Ecosse) na Irilande ya ruguru (Irlande du Nord). Urukiko rwa «Belfast» muri Irilande ya ruguru (Irlande du Nord) ruyobowe na Michael Humphreys rwaciye urubanza ; maze rwemeza ko ingingo nyinshi ziri mu itegeko Ubwongereza bwatoye ryo kohereza abimukira bari muri icyo gihugu mu Rwanda zigomba gukurwa muri iryo tegeko mbere y’uko rishyirwa mu bikorwa. Perezida w’urwo rukiko yavuze ko ingingo nyinshi zigize iryo tegeko zitubahiriza amategeko mpuzamahanga arengera uburenganzira bwa muntu, bityo iryo tegeko rikaba ritagomba gukurikizwa mu gihugu cya «Irilande ya ruguru» (Irlande du Nord)!

Sinead Marmion, umwunganizi mu mategeko w’umwe mu bimukira ukomoka mu gihugu cya Irani (Iran) ufite imyaka 16 yagize ati: «Icyemezo cy’urukiko rwa Irilande ya ruguru gitanze ubutumwa butomoye kuri leta  y’Ubwongereza (…), kandi cyumvikanisha neza ko abimukira bari mu Bwongereza bemerewe kuba muri Irilande ya ruguru kandi bakarengerwa n’amategeko y’icyo gihugu ». Uwo munyamategeko akaba asanga icyemezo cy’ urukiko rwa Irilande ya ruguru gishyize «ibihato» mu ishyirwa mu bikorwa ry’ubucuruzi bw’impunzi hagati y’u Rwanda n’Ubwongereza !

Ikinyamakuru «le Figaro» dukesha iyi nkuru, kivugako ubucamanza bwa Irilande ya ruguru bwigenga ku bucamanza bw’Ubwongereza ku buryo ibyemezo byabwo bidashobora guhindurwa n’inkiko zo mu Bwongereza nk’uko byemezwa n’amasezerano yo mu mwaka w’1998 yahagaritse intambara yari hagati y’ibyo bihugu byombi. Icyemezo Ubwongereza bwafashe cyo kohereza abimukira babuhungiyeho mu Rwanda cyanenzwe cyane n’umuryango w’Abibumbye wa Loni (ONU), umuryango w’Ubumwe bw’Uburayi (UE), amashyaka atavuga rumwe na leta  y’Ubwongereza, imiryango irengera uburenganzira bwa muntu n’abandi.

Iki cyemezo cyo kohereza abimukira mu Rwanda gishobora gukurura ubushyamirane  hagati y’Ubwongereza na Irilande ya ruguru kuko abimukira benshi bafite ubwoba bwo koherezwa mu Rwanda bari kujya muri Irilande ya ruguru ku buryo leta  y’icyo gihugu yafashe icyemezo cyo kubasubiza mu Bwongereza ku ngufu n’ubwo Ubwongereza bwo budashaka kwakira abo bimikira! Ikibazo cy’aba bimukira kikaba gikomeje kuremerera cyane leta  y’Ubwongereza bitewe n’uko yahaye u Rwanda amafaranga menshi (miliyoni 500 z’amafaranga y’ubwongereza) kandi izo mpunzi zitaragera mu Rwanda, gusobanura icyo ayo mafaranga yakoze akaba ari ihurizo rikomeye hagati ya Kagame na Sunak !

Amakuru ava mu nzego z’ubutasi mu karere k’ibiyaga bigari yemeza ko ayo mafaranga Ubwongereza bwohereje mu Rwanda arimo gukoreshwa mu ntambara RDF/M23 yashoye kuri Repubulika ya Demokarasi ya Congo (RDC)! Kagame na Sunak bakaba bariyemeje kurenga ku mategeko mpuzamahanga kugirango bohereze abimukira mu Rwanda bityo bibafashe gusobanura icyo ayo mafaranga yakoze. Ni ukubitega amaso !

Veritasinfo.