Leta y'u Rwanda yadukanye ingeso mbi yo kwambura abanyarwanda bari hanze ikoresheje telefoni n'iterabwoba !

Intore za  Kagame na FPR zitangiye gukwiza ibihuha no gutera ubwoba abantu bafite ababo bari hanze y’u Rwanda , bagatelefona bamwe mubafite ababo bari hanze bakoresheje nimero zitigaragaza bababwira ko ngo bafite amakuru y'uko abantu babo bari hanze bafite ibyago ko bagomba kubaza ibyabo… kugira ngo abo bari hanze babone uko baterefona maze ifaranga ryinjire kuko ibiciro by’itumanaho mu Rwanda bihanitse no kugira ngo bamenye neza niba bajya bavugana n'ibyo bavugana ! Abanyarwanda bakwiye kwirinda kwitaba telefoni batazi kandi zitanagaragaza nimero zihamagaye.

Muri iyi minsi , aho ibihugu byinshi byateraga inkunga y’amafaranga leta ya Kagame Paul bitangiye kwisubiraho bikaba bitangiye gutinza iyo nkunga kubera urugomo rw’intambara Kagame Paul yashoye ku gihugu cya Congo mu izina rya M23 kugirango ashobore gukomeza ibikorwa bye bibi byo kwica abanyarwanda bamuhungiye muri icyo gihugu no gukomeza gusahura amabuye y’agaciro muri Congo na peteroli yo muri icyo gihugu icukurwa mu karere ka Rutshuru.

Ubutegetsi bwa Kagame Paul bwatangiye kugira ubwoba ko abazungu bashobora guhagarika burundu imfashanyo yayo ku Rwanda bikaba byateza imidugararo mu gihugu bigatuma abaturage bivumbura bagahirika ubutegetsi bw’agatsiko k’abasajya kayobowe na Paul Kagame.

Intore zose zatangiye ibikorwa byo kwambura abaturage utwari tubatunze ngo nibashyire inkunga mu kigega kiswe« AGACIRO» ariko mu byukuri ari ikigega cy’ « UBUBWA N’UBUSAMBO » kibereyeho kwambura abaturage ibyabo no gukenesha abacuruzi bo mu bwoko bw’abahutu.

Zimwe mu ngamba intore zafashe :

1.Kubeshya abaturage: Kugirango abaturage batamenya ukuri kw’ibintu , agatsiko kafunze inzira zose z’itumanaho rigezweho ngo abaturage batamenya ukuri ! Batangiye gushyira iterabwoba ku bantu bababeshya ngo bumviriza za telefoni ngo bagasoma n’ubutumwa bw’abantu kuri internet. Uretse nabo n’Amerika yahimbye internet byarayinaniye kuyihagarika no kugenzura ibyo bikorwa kubantu bose , ikindi kandi kumviriza ibyo abantu bavuga nta kibazo kirimo kuko n’ubundi bari basanzwe babyumviriza babonye ntacyo bitanga babizanamo iterabwoba ! Abaturage bashimishwa ni uko abategetsi bumva ibyifuzo n’ibitekerezo byabo; gusa mu Rwanda ho siko bimeze , guha uburenganzira abantu bakungurana ibitekerezo bitera ubwoba ubutegetsi bw’agatsiko.

2.Gufunga imbuga zose zandika mu Kinyarwanda zitanga amakuru ku Rwanda: Ibyo byo gufunga imbuga zose zandika amakuru ku Rwanda ntizisomwe mu Rwanda byatangiriye kurubuga rwa www.leprophete.fr ariko noneho icyemezo bagifatiye n’izindi mbuga zose , mubyukuri u Rwanda n’abanyarwanda ubu basa n’abari muri gereza! Icyo cyemezo bagifashe bamaze kubona ko guhagarara hejuru y’abantu basoma amakuru kuri internet ntacyo bihindura kuko ari hahandi amakuru agera kubaturage ! Ikindi ubu gitangiye kuyobera leta y’u Rwanda ni uko abarinzi bajya inama n’inyoni zikajya iyindi! Ubu abanyarwanda benshi basigaye basoma izo mbuga banyuze kuzindi mbuga zitwa  “Proxy” , amakuru kandi y’imbuga zo hanze agera kubanyarwanda anyuze kumaradiyo mpuzamahanga nka BBC na VOA badashobora gufunga; abanyarwanda binkwakuzi kandi basigaye babona inkuru ku binyamakuru bya internet  bagahita bazandika (imprimer) , bakajya kuzisomera mu ngo iwabo, nyuma bakazihererekanya ndetse rimwe na rimwe izo nkuru bakazicuruza cyangwa bakazinyanyagiza mu muhanda, ngizo ingaruka zo GUFUNGA UMUNWA W’ ABANTU BOSE NTA MPAMVU!

3.Rurangiza rero yabaye icyemezo cyo guhagarika cyangwa kugenzura cyane telefoni, bikubitiyeho no guhagarikirwa imfashanyo leta ya Kagame yabuze ayo icira n’ayo imira! Bakimara kuvuga ko bagiye kujya bumviriza telefoni abanyamahanga bakora mu Rwanda bagabanyije uburyo bw’itumanaho rya telefoni bashakisha izindi nzira zitumanaho cyangwa bakanyarukira mu bihugu bituranyi dore ko u Rwanda ari ruto! Abanyarwanda nabo baba hanze barifashe gato cyane ko ubu u Rwanda rwakubye incuro zigera hafi kuri 4 ibiciro byo guhamagara mu Rwanda kubiciro byari bisanzwe ! Ingaruka ibyo byose byatanze ni uko amasosiyete y’itumanaho mu Rwanda atangiye gutakaza abayagana cyangwa se akiyambazwa gake cyane, noneho bitewe ni uko agatsiko gakeneye amafaranga byanze bikunze , kakoze ibarura ry’imiryango iri mu Rwanda ifite bene wabo hanze maze intore zikaba zisigaye zirirwa zitera ubwoba iyo miryango ngo bene wabo bari hanze bamerewe nabi, ngo bagize ibyago n’ibindi kugira ngo abantu bari hanze bakunde bahamage mu Rwanda bityo ifaranga ryinjire ! Ngiyo imitwe y’abicanyi kabombo badatana n’ifaranga!

Abanyarwanda bose,baba abari imbere mu gihugu baba abari hanze ndetse n’abanyamahanga bakunda u Rwanda bagomba gukora ibishoboka byose bakabuza amahumekero aba bicanyi bari kubutegetsi mu Rwanda babuza abaturage amahoro; kimwe mu byemezo bagomba gufata ni ukurwanya bivuye inyuma ibyemezo nkibi by’agahotoro , aho bakoresha amayeri yo kwambura abantu utwabo, abandi nabo bagafata ingamba zo kubima amatwi no guha akato ikintu cyose cyakongerera imbaraga ubu butegetsi bw’abicanyi mu gukomeza gutsikamira rubanda no gukomeza ubwicanyi bwabo!

Ngoga Jean Veritasinfo.