Intore Nkuru ya FPR Thom NDAHIRO ngo YEZU ni umu CDR !!!

NDL: Akumiro karagwira! Yego abambari ba FPR tuziko bafite ibibazo bikomeye byo kwisobanura kumahano bakomeje gukorera abanyarwanda ariko noneho bashobora kuba bageze naho batumva ibyo bavuga! Uyu mugabo Thom Ndahiro azwiho kuba umutoni kwa Kagame akaba ashinzwe gusetsa intore ziba zitaramiye kagame, ariko ikibazo ndabona kirimo kibakomerana kuko bamenyereye kuniga umunyamakuru wese uri mu gihugu, ubu noneho itangaza makuru ryo kuri internet ryabavugishije amangambure! Ndabona barimo bikoma abapadiri babiri , bakikoma urubuga rwa internet rwa www.leprophete.fr rwa bariya ba padiri noneho bakarengera ngo ni izindi mbuga zose ni izabo! Igitangaje ni uko nabonye na www.veritasinfo.fr barayihaye bariya bapadiri!  Ngo abo bapadiri banga abatutsi urunuka ariko bagakorera Kayumba na Karegeya( kuko batavuga rumwe n'intore babaye abahutu)!! Mbonye noneho bahise basimbukira kubashumba ba kiliziya nkaho aribo baba mu mitwe ya bariya bapadiri cyangwa se abantu batanga ibitekerezo kuri izi mbuga. None se basimbukiye kuri Musenyeri Bimenyimana JD i Cyangugu cyangwa Misago wabagoreweho gute? None se iyo umuntu yize agahabwa impamyabushobozi iyo agiye mu kazi agatanga ibitekerezo bye urahindukira ukamunyaga ya mpamyabushobozi! ndabona bibasiye abo basenyeri ngo babahaye ubupadiri!!  Baravuge ibindi kiliziya igira uko iyoborwa, amasakaramentu agira uko atangwa! ninde se Padiri yambuye ubukristu bwe ngo ni uko yamubatije? Mbere yo kwikoma Kiliziya na Yezu ni babanze bamenye kiliziya iyo ariyo , bamenye na Yezu uwo ariwe! Nimwisomere hasi aha inkuru inkuru ya Thom nkuko yasohotse mukinyamakuru umuseke.com  birabereka aho u Rwanda rugeze mubitekerezo:

Nkuko tubikesha inkuru yatangajwe na Tom Ndahiro k’urubuga Umuvugizi.wordpress.com, urubuga Umuseke.com rwifuje gusangiza abakunzi barwo ibitekerezo by’uyu mwanditsi.

Hashize igihe abapadiri babiri, Fortunatus Rudakemwa na Thomas Habimana bashinze batangije urubuga rwa internetrushinzwe kwamamaza urwango no gupfobya jenoside yakorewe abatutsi.

Kubera umwuga wabo barwise umuhanuzi. Nk’abantu bize igifaransa inyito bakoresheje ni “le prophete”. Kubera ubupadiri, urwo rubuga  rugaragaza ko rufite icyo ruhuriyeho na Kiliziya Gatolika babereye abayoboke n’abayobozi. Ni urubuga rufite aho ruhurira (links) n’imbuga za internet za Kiliziya. Urwa Kiliziya Gatolika mu Rwanda, ndetse n’urwa Vatican nizo za mbere.

Kubera kandi umwuga wabo wo kwamamaza ingengabitekerezo ya jenoside no gufpobya icyo cyaha, urwo rubuga rufite za link n’imbuga nyinshi zirimo abahuje imyumvire n’intego. Uretse, imbuga za Guardian, Igihe n’Iwacu abandi ntuzabaze.

Hashize igihe naririnze kugira icyo nandika kuri uyu ‘prophete’ w’icuraburindi, nizera ko Kiliziya mu Rwanda izabwira abapadiri bayo Habimana na Rudakemwa ko ibyo barimo bisebya Kiliziya. By’umwihariko nibwiraga ko bitazatera kabiri Musenyeri Yohani Damaseni Bimenyima wa Diyoseze ya Cyangugu akazagira isoni zo kumva ari umuyobozi w’abigisha urwango. Umenya naribeshye.

Ku itariki ya 23 Mata 2011, padiri Rudakemwa yashyize ahagaragara inyandiko yibutsa imikorere y’ikinyamakuru Kangura. Munsi y’umutwe w’iyo nyandiko hari igishushanyo cya Yesu ahetse umusaraba. Inyandiko iri munsi y’igishushanyo cya Yesu  ugasanga bamugira icyitso cy’abajenosideri mu ngengabitekerezo yabo.  Bitagira aho bitandukaniye na Kangura yabikoraga kenshi yerekana ko ‘Umuryango Mutagatifu’ wemeranyaga n’umugambi wo kurimbura abatutsi mu Rwanda.

Iyo nyandiko y’umupadiri ku urubuga, yasohotse bucya hakaba Pasika. Ibyo bikaba byarakozwe ngo izuka rya Yesu rihuzwe n’iyo ngengabitekerezo ya jenoside. Padiri  akoresha amagambo yo mu ivanjili cyane, mu rwego rwo kumvisha abasomyi (bahuje nabo) ko urwango bandika rufite inkunga ntagatifu. Uko nayisomye na Myr. Bimenyimana yarayisomye. Yayivuze iki? Musenyeri Misago Augustin baherutse kugira umukuru w’urukiko rwa Kiliziya nawe yarayisomye!

Padiri Rudakemwa atangaho Yesu umugabo ko ibyo avuga ari ukuri, ati: “Aha rero nkaba nagusubirira nanjye mu byo Yezu yabwiye umugaragu w’umuherezabitambo mukuru agira ati “Niba mvuze nabi, garagaza ikibi mvuze; niba kandi mvuze neza, unkubitiye iki?” (Yh 18, 23). “Nyanga urundi, wimpimbira”.

Uko kuri ni ukuhe? Iyo nyandiko yagenewe Pasika na Padiri Rudakemwa itangirana izi nteruro. “CDR na FPR ni mahwi. Ndetse benshi bahamya ko FPR irusha CDR ububi.” Ibi abivuga nk’ukuri kandi ngo na Yesu nibyo yavugaga. Iri jambo “benshi” niryo ryari ishigiro rya CDR, yateguye gutsemba ubwoko mu izina rya “rubanda nyamwinshi”.

CDR yiyise Impuzamugambi kuko bagombaga ‘guhuza’—‘umugambi’. Uwo mugambi w’abahezanguni wari uwo gushishikariza abahutu kwanga urunuka kugirango bazakore jenoside batabibonamo icyaha. Niyo mpamvu ‘Impuzamugambi’ za CDR abantu bari barazise impuzamupanga.

Bigeze mu mwaka w’2011, umupadiri aragereranya CDR na FPR. Kuba FPR ariyo yaciye intege impuza-mugambi za CDR n’interahamwe, ni ukuri. Ubihakana ni ushyigikye umujenosideri ushaka kwishyira heza. Abemera ko CDR ari nziza, ugeranyije na FPR, ni abapawa n’abataye umutwe nk’abo muri RNC.

Ubu abo muri RNC bagizwe abatoni n’uru rubuga rw’abajenosideri. Ubyemeza ni uwahisemo guhakana jenoside, n’ubabazwa n’uko ukuri kw’ubugome bwakozwe kuvugwa.

Mbere ya jenoside, abasenyeri gatolika baharaniraga ko CDR ijya mu butegetsi bw’u Rwanda. Ikurikije amasezerano y’amahoro ya Arusha, FPR yarabyanze.  Ibi Myr. Misago arabizi. Na nyuma y’imyaka 17 gahunda iracyari iyo gushyigikira Impuzamugambi ziyise “le prophete”?

Ntiwaba umupadiri utabiherewe ububasha na Kiliziya ihagarariwe na Musenyeri muri diyoseze. Umupadiri ntiyajya no gukorera ahandi uw’aho ukomoka atabikwemereye. Ba nyiri urwo rubuga rw’urwango baracyari abapadiri. CDR kwitwa nziza nibwo buhanuzi  abakristu bari bategereje?

Iyi nkuru yakuwe k’Umuvugizi.worpress.com