Ishyaka « RDI-Rwanda Rwiza » yatangaje abayobozi baryo bashya mu rwego rwo gukomeza kwagura ibikorwa byaryo.

Ishyaka RDI-Rwanda Rwiza rikomeje gahunda yo kwagura no kuvugurura imiyoborere yaryo mu rwego rwo gukomeza kwiyubaka no kurushaho kwegera intego ryihaye mu rugendo rwa politiki. Iri vugurura ry’ubuyobozi bw’ishyaka rije mu gihe gikomeye cyo kwegera Abanyarwanda bari mu gihirahiro cy’ahejo hazaza habo bitewe n’uko bayobowe n’ubutegetsi bw’igitugu cya FPR, bugizwe n’abayobozi bakuru bose bashyiriweho bihano n’amahanga bitewe n’ibikorwa byabo bibi byo guhungabanya umutekano w’ibihugu by’abaturanyi.

Nk’uko bigaragara mu itangazo ryashyizwe hanze n’umuvugizi w’iri shyaka, Madame Ndayizigiye Marthe, ubuyobozi bwa RDI-Rwanda Rwiza bwatangaje ko bwavuguruye inzego zabwo z’ubuyobozi bwo hejuru, hashyirwaho imyanya ibiri mishya ariyo iya Visi Perezida wa mbere ndetse na Visi Perezida wa kabiri.

Aya mavugurura aje mu gihe iri shyaka ryifuza gukomeza kunoza imikorere yaryo no kongera ubushobozi mu buyobozi, hagamijwe gukomeza ibikorwa bya politiki no guhuza ibikorwa by’abarwanashyaka baryo bari hirya no hino imbere mu gihugu no hanze yacyo.

Mu bayobozi bashya bashyizwe kuri iyo myanya harimo Dr. Ndayisaba Edison wagizwe Visi Perezida wa mbere, ndetse na Bwana Ngoga Eric wagizwe Visi Perezida wa kabiri. Aba bayobozi bombi bazajya bungiriza Perezida w’ishyaka, Bwana Hildebrand Kayibanda, mu nshingano zo kuyobora no guteza imbere ibikorwa by’ishyaka.

Abasesenguzi ba politiki bavuga ko aya mavugurura ashobora gufasha RDI-Rwanda Rwiza gukomeza kwisuganya no kwagura ibikorwa byaryo, cyane cyane mu rwego rwo gutegura ejo hazaza h’ishyaka no gukomeza kwegera abanyamuryango n’abarishyigikiye.

Ishyaka RDI-Rwanda Rwiza ryashinzwe na Bwana Faustin Twagiramungu, wabaye Minisitiri w’Intebe w’u Rwanda, rikaba rimaze imyaka rigaragaza ko ryifuza guteza imbere imiyoborere ishingiye kuri demokarasi, ubwiyunge n’iterambere ry’abaturage bose ntawe uhejwe.

Mu ntego zaryo, iri shyaka rikunze kugaragaza ko rishyira imbere ubumwe bw’Abanyarwanda, ubwisanzure bwa politiki, kubahiriza uburenganzira bwa muntu no guteza imbere imibereho myiza y’abaturage binyuze mu miyoborere idaheza.

Gushyiraho abayobozi bashya b’ishyaka bikaba bifatwa nk’intambwe nshya mu rugendo rwa « RDI-Rwanda Rwiza » rwo gukomeza kwagura ibikorwa byaryo no gukomeza kugira uruhare mu bikorwa byo gufungura urubuga rwa politiki mu Rwanda.

Veritasinfo.