leta y'u Rwanda yatangiye kwica amasezerano Kagame yagiranye na Museveni muri Angola amasaha 24 atarashira!
Yezu yabwiye intumwa ze ko agiye kugambanirwa akicwa, ariko intumwa Petero ibwira Yezu iti tugomba kurwanya abo bagome bashaka kukugirira nabi! Yezu yarebye Petero mu maso, aramubwira iti: "wowe, isake itarabika, uraba unyihakanye gatatu!" Ibyo Yezu yavuze niko byagenze, kuko Yezu amaze gufatwa, mbere y'uko umuseke ukeba, Petero yari amaze kwihakana Yezu inshuro 3 zose mu gihe abantu bamubazaga niba ari kumwe nawe! Kagame nawe yemereye imbere y'abandi bakuru b'ibihugu 4 muri Angola ko amasezerano agiranye na Museveni azayubahiriza uko yakabaye; abanyarwanda basanzwe bazi ko ari Semuhanuka bati "amasezerano ya Kagame ni amasigarakicaro" nta kintu na kimwe azubahiriza; none niko bibaye, Kigali itangiye kugaragaza ko itazubahiriza ayo masezerano n'amasaha 24 atarashira ashyizweho umukono!
Ingingo ya kane isoza amasezerano yo guhosha amakimbirane hagati ya Kagame na Museveni, bashyizeho umukono muri Angola kuri uyu wa gatatu taliki ya 21/08/2019 igira iti: "Aya masezerano aratangira gushyirwa mu bikorwa akimara gushyirwaho umukono". Nubwo iyo ngingo ibivuga gutyo, kuri uyu wa kane taliki ya 22/08/2019; mu kiganiro umunyamabanga wa leta muri ministeri y'ububanyi (ubushwanyi) n'amahanga y'u Rwanda Bwana Olivier Nduhungirehe yagiranye n'ikinyamakuru "umuseke" yagize ati : "N'ubwo u Rwanda na Uganda byasinye amasezerano arimo ingingo y'uko ibihugu bisubukura ibikorwa byo guhahirana, ntibivuze ko abanyarwanda bagomba gutangira kujyayo. Babe baretse abahafungiwe bitanyuze mu mategeko babanze bafungurwe".
Iyi mvugo ya Nduhungirehe, ivuguruza ingingo ya 4 ivuga ko ayo masezerano agomba guhita ashyirwa mu bikorwa, ndetse ikabusana n'ingingo ya 1.(d) ivuga ko ibikorwa byambukiranya imipaka hagati y’ibihugu byombi birimo urujya n’uruza rw’abantu n’ibintu bigomba guhita bisubukurwa! Muri ariya masezerano, nta ngingo nimwe irimo ivuga ko ibikorwa byambukiranya imipaka bizasubukurwa ari uko Uganda ibanje gufungura intasi za Kagame zifungiyeyo! Ku mbuga nkoranyambaga, abantu bamwe bashatse kumvikanisha ko kuba Uganda yarafashe icyemezo cyo gufunga imbuga zimwe na zimwe zo mu Rwanda kuburyo zidashobora gusomerwa kuri interineti muri Uganda; urwego rushinzwe kugenzura itangazamakuru muri Uganda rukaba rwaratanze ibisobanuro bivuga ko izo mbuga zifite amakuru abangamiye umutekano w’igihugu cya Uganda; ibyo bikaba bihuye ni ingingo ya 1.(b) isaba buri gihugu kwirinda ibikorwa bihungabanya umutekano w'ikindi gihugu!
Amakuru duhabwa n'abanyarwanda benshi bari i Kigali, atumenyesha ko abanyarwanda benshi biteguye guhita bajya muri Uganda kuburyo hari impungenge ko imodoka zo kubatwara zizaba nke! Kubera ikibazo cy'inzara ikabije n'ubukene bwiyongeraho itotezwa leta ya Kagame irimo ikorera abanyarwanda; hari ubwoba ko umupaka wa Uganda nufungurwa, umubare munini w'abanyarwanda bazahungira muri Uganda! Gukomeza gufunga uwo mupaka nabyo bikaba bikomeje kuba ihurizo rikomeye kuri leta ya Kagame, kuko kuvana no kujyana ibicuruzwa mu Rwanda bivuye mu mahanga bisa n'ibitagishoboka! Leta ya Kagame ikaba ishaka ko abagande n'ibicuruzwa byabo bijya mu Rwanda ariko abanyarwanda bo ntibajye muri Uganda; aho naho leta ya Uganda ikaba yaranze icyo cyifuzo cya Kigali, ikaba ishaka ko abaturage b'ibihugu byombi bagomba kugenda muri ibyobihugu byombi mu bwisanzure!
None se ko "indyarya ihimwa n'indyamirizi", kandi Museveni akaba ariwe watoje Kagame amacenga ya politiki, bizagenda gute ngo "urutugu rukure rusumbe ijosi", maze Kagame ashobore kwigaranzura Museveni? Ni ukubitega amaso! Ku mbuga nkoranyambaga, hari kunyuraho inyandiko y'amasezerano yashyizweho umukono na Kagame na Museveni ndetse n'abandi bakuru b'ibihugu bashoboye kubahuza muri Angola; amakuru yizewe, yemeza ko iyo nyandiko ikaba yashyizwe ku mbuga nkoranyambaga n'u Rwanda, muri gahunda yo gutesha agaciro ayo masezerano! Dore iyo nyandiko hasi aha uko iteye:
