Ubufaransa buremeza ko umutekano mu Rwanda ugerwa ku mashyi!
Uyu ni umusore w'i Byumba uhungiye muri Uganda anyuze ku kiraro kigizwe n'igiti kimwe kuko andi mayira yose afunze!
Politiki ya Paul Kagame ishingiye ku bwicanyi, ikinyoma n'iterabwoba, itangiye gutanga umusaruro, akarere kose k'ibiyaga bigari kabayeho mu bwoba kubera iyo politiki ye! Iyo utereye akajisho ku rubuga rwa ministeri y'ububanyi n'amahanga y'igihugu cy'Ubufaransa, ugasoma ubutumwa bugenerwa abantu bateganya gusura u Rwanda, uhita ubona ko amafaranga Paul Kagame yahaye ikipe y'Arsenal yo mu gihugu cy'Ubwongereza ngo yo guhamagarira abanyamahanga gusura u Rwanda yarapfuye ubusa!
Igihugu cy'Ubufaransa ni kimwe mu bihugu by'ibihangange ku isi bikurikiranira hafi umutekano w'ahantu hanyuranye ku isi ariko ku mugabane w'Afurika bikaba akarusho! Ku mutekano uri mu Rwanda by'umwihariko, ubutumwa butangwa na ministeri y'ububanyi n'amahanga y'Ubufaransa bugira buti:
[Inama kubakorera ingendo mu Rwanda. Kubera umutekano wanyu turabamenyesha ko mugomba kwirinda ibi bikurikira:
"Kwirinda gusura pariki y'ibirunga" bitewe n'ibikorwa binyuranye bihungabanya umutekano bikomeje kugaragara muri iyo pariki.
"Kwirinda gutembera hafi y'umupaka uhuza u Rwanda na Uganda" bitewe n'ubushyamirane buri hagati y'ibihugu byombi bwakuruye ifungwa ry'umupaka wo kubutaka uhuza ibyo bihugu. Turabagira inama yo kwirinda inzira ica ku butaka mu gihe bibaye ngombwa ko mukora ingendo hagati y'ibihugu byombi.
"Kwirinda kujya ku mupaka uhuza u Rwanda n'Uburundi n'ishyamba rya Nyungwe": Kubera ibibazo by'umutekano mucye byagaragaye mu ishyamba rya Nyungwe no mu nkengero zaryo muri iyi minsi; turabagira inama yo guhagarika ibikorwa byose byo gutembera muri iryo shyamba no kwirinda kunyura mu muhanda munini (route nationale 6) unyura muri Nyungwe ku bantu bashaka kwerekera cyangwa se kuva mu karere ka Nyamagabe.]
Aya makuru atangwa na ministeri y'Ububanyi n'amahanga y'Ubufaransa ku mutekano uri mu Rwanda yiyongera ku makuru "veritasinfo" ihabwa na bamwe mu bayobozi bakuru bo muri FPR ndetse n'abaturage baturiye umupaka wa Rusumo uhuza u Rwanda na Tanzaniya bemeza ko uwo mupaka nawo ufunze.
Impamvu yatumye umupaka wa Rusumo ufungwa ni uko abanyarwanda begereye umupaka w'u Rwanda na Uganda bakoresha umupaka w'u Rwanda na Tanzaniya bagahungira muri Uganda kandi leta ya Kigali itabishaka!
Leta ya Paul Kagame yakomeje guhisha ko iri mu ntambara na FLN mu ishyamba rya Nyungwe ndetse ikabeshya ko n'umupaka uyihuza na Uganda udafunze kugirango bamukererarugendo bakomeze kujya mu gihugu ndetse n'abashoramari b'abanyamahanga bakomeze gufata u Rwanda nk'igihugu gitekanye, ariko ubutumwa bwa ministeri y'ububanyi n'amahanga y'Ubufaransa bukaba buyitamaje, ikinyoma cya leta ya Kagame kikaba kigiye ahagaragara!
Imiryango mpuzamahanga yita ku mpunzi (UNHCR) iri i Kampala muri Uganda nayo ikaba nayo yemezako iri kwakira impunzi nyinshi z'abanyarwanda muri iyi minsi ziri guhungira muri Uganda kubera ibibaza by'umutekano mucye biri mu Rwanda nk'uko bitangazwa na ministeri y'ububanyi n'amahanga y'Ubufaransa!
Igihe kirageze kugirango amahanga yabeshywe kuva cyera na Paul Kagame ko ariwe uzanama amahoro mu karere k'ibiyaga bigari, amenya ko ariwe ahubwo uhungabanya umutekano w'akarere kose!
veritasinfo