Afurika y'epfo:Ambasaderi Karega yayoboye inama ya DMI harimo abayobozi b'ishyaka MARP/Abasangizi biyita opposition kandi ari intore!

Publié le 22 juillet 2015 par veritas

Ambasaderi Karega (ufite telefoni) ayoboye inama ya DMI n'intore muri "Royal Hotel"

Ngo inkotanyi zateye u Rwanda zifite amayeri 1000. Ese ubu hari uwatubwira umubare w’amayeri zimaze gukoresha? Muri iki gihe amaturufu hafi ya yose inkotanyi zakingaga amahanga mu maso amaze kuzishirana! Kubanyarwanda ho zitangiye gukoresha ibigarasha kuko amakarita mazima (amayeri) yarangiye! Paul Kagame asigaye yarabaye nka ya nyoni yaritse ku nzira, yahoraga ivuga ngo “Niba nzapfa cyangwa niba nzakira simbizi!” Ibyo bigaragazwa nimvugo Kagame asigaye avuga muri iyi minsi iyo bamubajije niba nyuma y’umwaka w’2017 azaba ari umuturage usanzwe cyangwa niba azaba ari perezida; dore igisubizo yahaye umunyamakuru wa “Jeune Afrique”abimubajije:

”Umwanzuro wanjye waba umwe cyangwa undi, ntacyo bizahindura. Reka tuvuge ko muri 2017 ntongeye kwiyamamaza, bazavuga ko abaturage banyanze, ko bitari bikinkundiye ko nakomeza, ko nahunze, ko nari mfite ubwoba n’ibindi. Reka tuvuge ko nongeye kwiyamamaza, bazavuga ko ari ikimenyetso... Mu buryo bumwe cyangwa ubundi, abavuga bazakomeza kuvuga kandi bazahora mu bibi gusa...”

Kubera ubwoba Paul Kagame afite bwo kutamenya ikimutegereje nyuma y’2017, yatangiye kugaba ibitero mu banyarwanda bamuhunze bari mu bihugu bigize umuryango wa SADC ahereye ku gihugu cy’Afurika y’epfo nk’uko amakuru tugiye kubagezaho abibagaragariza. Uwo mugambi ukaba uyobowe n’ambasaderi KAREGA!

Paul Kagame yarangije gukura umutima abanyarwanda akoresheje intore z’abanyarwanda bari mu moko y’abahutu n’abatutsi. Muri iki gihe imbere mu Rwanda intore z’abahutu nizo zirirwa zigenzura abatutsi bakekwaho gufatanya na RNC, naho intore z’abatutsi zikirirwa zititiza abahutu, bigaragarira buri wese muri iki gihe ko abahutu mu Rwanda bapfuye bahagaze, izo ntore zikaba zibumvisha ko zizabamara niba badakoze ibikorwa byo kuramya Umwidishyi Paul Kagame nk’Imana! Umuhutu wese kuva hasi kugera hejuru, yaba mu cyaro cyangwa mu mujyi, iyo ari iruhande rwa Kagame agenda amukomera amashyi anamubyinira undi atabyitayeho, ibyo abo bahutu bakaba babikoreshwa n’ubwoba nk’uko Rucagu Boniface ahora abikora! Muri macye abahutu barahahamutse.

Ni muri iryo terabwoba rikaze ingirwabadepite ngo zemeje umushinga wo kuzagira Paul Kagame umwami; nk’uko bimenyerewe abahutu bazanywe kungufu mu nteko y’ingirwabadepite kugira ngo babyine! N’ubwo bimeze gutyo ariko Paul Kagame arabunza imitima, afite igihato cy’ibihugu by’amahanga bimuha inkunga yo kumara abanyarwanda no kumukingira ikibaba bivuga ko bizahagarika ubwo bufasha byamuhaga niyongera kwitoresha nyuma y’umwaka w’2017! S’ibyo gusa kuko n’abanyarwanda bamuhunze baba mu bihugu by’amahanga bamuteye ikibazo gikomeye bitewe ni uko bazaba babonye impamvu ndakuka yo kumurwanya nyuma yo kwiyimika kwe mu mwaka w’2017!

Umuyobozi muri ministeri y’ububanyi n’amahanga y’igihugu cy’Amerika (USA) ushinzwe Afurika Madame Linda Thomas-Greenfield yavuze ko “niba abakuru b’ibihugu by’Afurika biyemeje guhindura itegeko nshinga kugira ngo bigundirize k’ubutegetsi, icyo gihugu kiteguye kuzatera inkunga abaturage b’ibyo bihugu baziyemeza guhirika abo bakuru b’ibihugu!” Imvugo nkiyo niyo ituma Paul Kagame yarabuze uko yifata, ubu akaba ahangayitse cyane ndetse akaba atagitora udutotsi; kubyinirwa n’abahutu yagize ingaruzwamuheto ntabwo bizamuha imbaraga yahabwaga n’Amerika! Abanyarwanda bari hanze nabo bateye Paul Kagame ubwoba cyane kuko bashobora kuzamurwanya; aba mbere mubamuteye ubwoba ni abanyepolitiki bashinze amashyaka akorera hanze y’u Rwanda kimwe n’abanyarwanda bahungiye mu bihugu by’Afurika cyane cyane mu bihugu bya SADC. Amayeri yose Paul Kagame yagombaga gukoresha mukurwanya abo banyarwanda yaramushiranye, ubu akaba yongeye gusubira mu mayeri ya cyera (amaturufu y’ibigarasha) kugira ngo arebe ko yarenza iminsi!

Intore za FPR ziri gucengera amashyaka ziyita abanyepolitiki ba opposition!

Royal Hotel aho DMI n'intore zateraniye, ni muri hotel nk'iyi Karegeya yiciwemo!

Mu mwaka w’1990 ubwo inkotanyi zagabaga ibitero bya gisilikare ku gihugu cy’u Rwanda, zacengeye mubatutsi bari mu gihugu zibumvisha ko zije kubarwanirira, abo batutsi bohereje abana babo ku rugamba rw’inkotanyi rwo kwica abandi banyarwanda, igihembo babonye ni uko abo batutsi hafi ya bose barimbutse! Si abatutsi gusa kuko muri icyo gihe, inkotanyi zacengeye amashyaka ya politiki agizwe ahanini n’abahutu ziyatezamo umwiryane n’amacakubiri, zashutse abanyarwanda zibumvisha ko ziri kurwanira demokarasi, icyavuyemo muri icyo kinyoma k’inkotanyi ni uko abo banyepolitiki baje kwicwa hafi ya bose, abarokotse muribo inkotanyi nazo zarabishe abandi zibaheza ishyanga; abanyarwanda nabo bari bizeye kubona demokarasi, inkotanyi zabahaye urupfu, ubuhunzi, akandoya, inkoni,igifungo,gusuzugurwa n’ingoyi irimo igitugu gifite ubukana kurusha icyo mu gihe cya cyami!

Muri iki gihe rero ntacyo inkotanyi zifite cyo kubeshya abanyarwanda, amaturufu yarazishiranye kuko ibinyoma zababeshye babonye icyo byabagejejeho! Inkotanyi zashoye abatutsi mu bwicanyi, abana b’abatutsi barwaniraga inkotanyi bivanga n’interahamwe maze bica abatutsi n’abahutu karahava kugira ngo Paul Kagame abone uko afata ubutegetsi mu buryo bworoshye, ingaruka zavuyemo ni uko abo bana b’abatutsi bashowe muri ubwo bwicanyi, Paul Kagame nabo yabishemo benshi kugira ngo azimanganye ibimenyetso, abasigaye ubu bakaba bari guhigishwa uruhindu n’ubutabera mpuzamahanga; muri iki gihe rero ntacyo Paul Kagame agifite cyo kongera kubeshya abatutsi ngo abashore mu bindi bikorwa by’ubwicanyi kuko igihembo yahaye abo yabishoyemo cyabaye urupfu!

Bitewe ni uko amayeri inkotanyi zakoresheje mu gihe cya cyera (mbere ya 94) yazihiriye zigafata ubutegetsi bwose, no muri iki gihe ibintu bitamworoheye, Paul Kagame yongeye kwiyambaza ayo mayeri ya kera ngo arebe ko yarimbura abanyarwanda benshi yita abanzi be cyangwa akabagira ingaruzwamuheto nkuko ubu bimeze mu Rwanda. Mu mashyaka anyuranye ari hanze y’igihugu Paul Kagame yashoboye kwinjizamo intore ze; amwe muri ayo mashyaka yagiye ashobora kuvumbura ubwayo izo ntore zayacengeye akurikije imikorere n’ibitekerezo byazo. Mugihe zimwe muri izo ntore zavumburwaga, zagiye zisakuzwa mubinyamakuru ko bari kuzisebya, ariko izo ntore iyo zamara gusubira mu gihugu, zahitaga zivugira ubwazo ko zari zaracengeye amashyaka ya opposition ari hanze!

Bimaze kugaragara ko izo ntore zitacengeye amashyaka gusa ya opposition ahubwo zacengeye n’amashyirahamwe y’abanyarwanda ari mu bihugu binyuranye kimwe n’amashyirahamwe y’abanyamahanga arimo impunzi! Iyo izo ntore zimaze gucengera ayo mashyaka n’ayo mashyirahamwe zigaragaza umurava wo kunenga cyane ubutegetsi bwa Paul Kagame mu ruhame ndetse no mu binyamakuru, kugira ngo zibone uko zigarurira imitima ya benshi, ariko zaba ziri mu mwiherero zigacengera abagize ayo mashyaka n’ayo mashyirahamwe zibakangurira gukunda ubutegetsi bwa Paul Kagame. Imikorere y’izo ntore irangwa no gukora amanama yo mubwihisho, aho zifatira ingamba na gahunda byo kurwanya abatemera ubutegetsi bwa Paul Kagame, imwe mu nama nk’izo yahuje intore za FPR zirimo abitwa abayoboke b’ishyaka rya opposition, yabereye mu gihugu cy’Afurika y’epfo iyobowe n’ambasaderi Karega.

Ambasaderi KAREGA yakoresheje inama yo mubwihisho irimo intore zacengeye andi mashyaka!

Hanyurwinfura Jean de Dieu umuyobozi w'intore za Durban ari kumwe na Madame we.

Karega ni ambasaderi wa Paul Kagame mu gihugu cy’Afurika y’epfo ariko kubera izindi nshingano yahawe zo guhiga bukware abanyarwanda bahunze ubutegetsi ruvumwa bwa Paul Kagame, ububasha bwe bugera no mu bindi bihugu biri mu muryango wa SADC. Bitewe n’uko umubano w’u Rwanda n’Afurika y’Epfo wajemo agatotsi kubera ibikorwa by’ubwicanyi inkotanyi zikorera muri icyo gihugu, byabaye ngombwa ko Ambasaderi Karega yikinga inyuma y’umunsi mukuru wahariwe umukambwe “Nelson Mandela” kugira ngo ashobore gukoresha inama ya DMI n’intore muri icyo gihugu. Ntabwo ari ubwa mbere intore zitabaza ibirori by’iminsi mikuru muri Afurika y’epfo zigakora amahano! Ubwo Kayumba Nyamwasa yaraswaga, igihugu cy’Afurika y’epfo cyari mu minsi mikuru yo gutangiza igikombe cy’isi cy’umupira w’amaguru mu mwaka w’2010. Patrick Karegeya yishwe na DMI ya Kagame muri Afurika y’epfo mu ijoro ryo ku Bunani mu mwaka w’2014.

Kuwa gatanu taliki ya 17/07/2015, ambasaderi Karega yayoboye inama yakozwe mu ibanga irimo intore zikomeye kandi z’abayobozi b’ishyaka rya opposition ryitwa “ MARP/Abasangizi” riyobowe na Gasana Anastase. Iyo nama yabereye muri”Royal Hotel” iri mu mujyi rwagati wa Durban mu gihugu cy’Afurika y’epfo. Bwana Hanyurwimfura Jean de Dieu umuyobozi mukuru w’intore za Durban akaba ariwe wafashije ambasaderi Karega gutegura iyo nama y’ibanga rikomeye. Iyo nama yitabiriwe n’intore zo mu mujyi wa Durban ariko akarusho ni uko abagabo babiri aribo Isaac Mukeshimana na Janvier Batungwanayo bombi batuye mu gihugu cya Swazland bakaba ari n’abayobozi bakomeye mu ishyaka rya opposition “MARP/Abasangizi” rya Gasana Anastase, bitabiriye iyo nama kugira ngo batange raporo y’aho bagejeje ibikorwa byo kurwanya opposition kandi bitwa ko ari abayobozi b’ishyaka rya opposition kuri FPR!!

Bwana Isaac Mukeshimana na Janvier Batungwanayo bigaragaza cyane mu binyamakuru nk’abanyepolitiki barwanya leta ya Kigali mu rwego rwo kujijisha ariko bakajya gutanga raporo muri FPR y’aho bageze basenya opposition! Iyi mikorere y’aba bagabo irashushanya imikorere y’umugabo witwa “Iyamuremye Augustin” mbere y’umwaka w’1994 (umukwe wa Sindikubwabo Théodor perezida wa leta y’abatabazi); uyu mugabo Iyamuremye yari umwe mubayobozi b’ishyaka rya PSD ryari muri opposition, akaba yari maneko mukuru kwa ministre w’intebe UWILINGIYIMANA Agatha, ariko akaba yarakoreraga inkotanyi rwihishwa; buri kwezi yakoreraga raporo ministre w’intebe, copie y’iyo raporo akayoherereza inkotanyi zari zihanganye ku rugamba rw’amasasu n’ingabo za leta muri icyo gihe!

Iyamuremye Augustin inkotanyi zamuhembye umwanya w’ubuyobozi muri leta zayo, akaba yariyemeje kuba umuhutu w’inkomamashyi! Kuba ayo mayeri yakoreshejwe n’inkotanyi mbere ya 94 yaratumye zifata igihugu, no muri iki gihe Paul Kagame yibwira ko gukoresha ibyitso by’intore mu mashyaka ya opposition, ibyo byitso bigakora nk’uko Iyamuremye Augustin yakoraga, bishobora kuzatuma aramba kubutegetsi iteka ryose, nyamara “amase ya cyera ntagihoma urutaro” aribeshya ibyo byitso ntacyo bizamumarira!

Kugira ngo iyo nama y’intore na DMI ishobore guteranira mu gihugu cy’Afurika y’epfo, Ambasaderi Karega yakoresheje amayeri, yifashisha ibyitso afite muri ONG yitwa “Mandulo Foundation” ashobora gutumirwa mu birori byakoreshejwe niyo ONG byo gusoza ibiganiro by’ubworoherane no guhosha amakimbirane byari byarateguriwe impunzi zo mu bihugu binyaranye by’Afurika y’amajyepfo. Ibyo birori byabereye mu mujyi wa Durban. Karega yaboneyeho umwanya wo gukora igikorwa nyamukuru cyari cyamuzanye cyo gukoresha intore na DMI inama yo mubwihisho muri” Royal Hotel”.

Imwe mu myanzuro iyo nama yo mu ibanga yagezeho muri iyo hoteli iteye ubwoba, iyo myanzuro ikaba igomba gushyirwa mu bikorwa vuba cyane ku mpunzi z’abanyarwanda ziri mu bihugu by’Afurika y’amajyepfo ndetse n’ahandi. Dore imwe muri iyo myanzuro nk’uko twayigijejweho n’umwe mu bantu bacu bashoboye gucengera iyo nama nawe wiyise intore:

1.Kumenya adresse na gahunda z’abatavuga rumwe na leta y’inkotanyi bari mu mahanga, kugirango bibafashe gusura ingo zabo mugushishikariza abana babo gutaha mu Rwanda no gukunda igihugu.

2.Kwitabira ibirori, amakwe, inama z’imiryango yitabirwa n’abanyarwanda benshi kugira ngo bashobore gutegura ibikorwa byo kurwanya abo muri opposition ya Kigali hakoreshejwe amarozi cyangwa impanuka zateguwe.

3.Kwegera inzego z’ubuyobozi bw’amashyirahamwe y’abanyamahanga ndetse n’ubutegetsi bwite bwa leta z’ibihugu byo hanze kugira ngo bumvishe izo nzego ko zigomba kwirukana abanyarwanda bagasubira mu gihugu cyabo kuko mu Rwanda ari amahoro.

4.Gutegura ibikorwa bya bucece binyujijwe mu mashyirahamwe anyuranye y’abanyarwanda ari mu mahanga kugira ngo bumvikanishe ko guhindura itegeko nshinga Paul Kagame agakomeza kuyobora igihugu ko bikwiye kandi ko abanyarwanda batabyemera ari abicanyi.

5.Kwegera itangazamakuru mpuzamahanga ndetse n’ubukangurambaga bukomeye cyane kuri interineti (médias sociaux) bumvikanisha ibyiza byo kuyoborwa na Paul Kagame.

6.Gutanga amakuru y’imigambi n’ibikorwa biteganywa gukorwa n’amashyaka ari hanze y’igihugu, gukurikirana abayobozi b’ayo mashyaka, ibyo bakora abo bavugana nabo no kumenya aho bakura umutungo...

Inama yashojwe ambasaderi Karega akangurira intore z’abahutu kwegera abandi bahutu bari hanze y’igihugu n’intore z’abatutsi zikegera abandi batutsi bahunze igihugu kuko imikorere imeze ityo ariyo izatuma abo babwira babagirira ikizere! Izo ntore zumvikanye kuburyo zizajya zikoresha zihana amakuru mu buryo bwihuse, iyo akaba ari imwe mu ntwaro izazifasha guhangana n’impunzi bita abanzi b’igihugu!

Karega yasobanuriye izo ntore ko zigomba kwinjira mu bikorwa byose bireba impunzi zindi zavuye mu bihugu binyuranye kugira ngo izo ntore zibone uko zigera no kubanyarwanda kuko ibihugu byo mu muryango wa SADC bitorohereza leta ya Paul Kagame kugera ku mpunzi z’abanyarwanda ariko ko nibanyura mu mpunzi zavuye mu bindi bihugu no mu miryango inyuranye ibyo bashaka bazabigeraho!

Twakwibutsa impunzi z’abanyarwanda aho ziri hose ko iyo uri impunzi, ukemera kwicarana mu nama imwe n’umuyobozi wa leta y’u Rwanda cyangwa hakagira gahunda nimwe y’ibikorwa iyo mpunzi ikorana n’ubwo buyobozi yahunze; amategeko mpuzamahanga yahyizweho mu mwaka w’1954 agenga ubuhunzi ateganya ko uwakoze ibyo bikorwa ari impunzi ahita yamburwa ubuhunzi yahawe, akubahiriza amategeko y’igihugu cye yahunze! Ibi rero bikaba bishimangira ko bariya bayobozi b’ishyaka MARP/Abasangizi bajya gukorana inama za rwihishwa n’ambasaderi Karega ari abakozi ba leta y’u Rwanda, iyo myitwarire yabo ikaba ishobora gutera impunzi ibibazo kuko ziba zikorana n’abakozi ba leta bahunze!

Tuzakomeza kubagezaho imyitwarire y’izi ntore muri ibi bihugu by’Afurika y’amajyepfo kugira ngo ejo tutazatungurwa n’ibikorwa byabo bibi baba bari gupanga batubeshya ko ari abayobozi b’ishyaka rya opposition.

KAVARUGANDA Paul

Umusomyi wa Veritas