Umugambi simusiga w'abazungu: "Gukubita kagame urw'ingusho kugirango ntazabashe kuvuga amabanga menshi bagiranye" !

Ubundi bahoze bavugwa ho kuba : Abashishozi cyangwa Inararibonye, ariko cyane cyane bakaba bazwiho kuba bwiza bwa mashira, budashira irora….

( bitewe n’igitsina icyaricyo, nibwo umuntu yakongeraho icyuzuzo) bahoze bavugwaho uburanga bwinshi butagaragazaga umupaka, bakavugwaho ubuhanga bahanganwaga n’uwabahanze, abakurambere babo bakaba baramenyaga kugendana n’ibihe bishingikirije buriya buhanga biyitirira ko ari karemano kuri bo.

Ubu rero nkuko bigaragararira umuhisi n’umugenzi, ntabwo abatutsi bayobora urwanda ubu, bari kurugero bari bitezweho, abanyarwanda bose bo mumoko yose barabyemeza, nkuko bisanzwe abatinyuka kubivuga babarirwa kuntoki, nabo kenshi ni ababa babashije kwambuka umupaka w’Urwanda, naho ubundi kubari imbere mu gihugu urugero rwiza tura rufite kuri bariya banya politike birirwa bafungwa abandi bicwa. Iingoma ya Kagame kubera ubwicanyi n’ubundi bugome igirira abanyarwanda imbona nkubone ya maze guhindura abanyarwanda ibikange, ukuri kuri mu mitima yabo ntaho guhuriye no gukomera amashyi Kagame nkuko bibagaragaraho, yewe no mubategetsi bo hejuru basangira nawe ntibisobanura ko bashyigikiye politike ye, gusa umuntu akaba ya bashinja ubugwari bwo kwemera gukorana, gusangira n’ikibi nyamara utemeranya nacyo, ukarindira kuzavuga aruko wahunze, abatutsi benshi bemeza ko kagame atigeze agira uburere bwa gitutsi, akaba ari nayo mpavu abuze ubushishozi mu migambi ye, ahubwo akaba yitwara nk’umunyagasozi, wakuze arya ibyo atoraguye munzira, yambuye cyangwa y’ibye, kandi abamuzi mu mihanda y’i Kampara no munkengero zumugi wa Nayirobi, ibimuvugwaho bemeza ko ari impamo. Igihe intambara ya FPR yatangiraga, mu bahutu, hahise hagaragaramo ibice bibiri, igihande cya bari kubutegetsi n’abenewabo kimwe n’abandi bose bari bafite inyungu zikirenga babonaga ; aba bose bumvaga ko abatutsi baje kubanyaga ubutegetsi n’izindi nyungu zose zibuherekeza, ariko rubanda rugufi rwo bakarubwira ko, abatutsi baje gusubizaho ingoma ya cyami n’ubuhake kugirango babatize umurindi wo kurwana intambara bivuyinyuma ; hakabaho rero n’ikindi gihande cy’abahutu batagiraga aho bahuriye n’ubutegetsi bajyaga bumva Radio Muhabura bakumva imigambi ya FPR ari myiza , cyane cyane mu byerekeranye na demokarasi n’uburenganzira bw’ikiremwa muntu, mbese kuburyo bwa rwihishwa bakaba bari bashyigikiye FPR, niyo mpamvu nta muturanyi wabo n’umwe w’umututsi bigeze bagirana ibibazo ngo n’uko yohereje umwana we mu nkotanyi, bakomeje kubana neza rwose nkaho nta cyabaye.

ABAHUTU BENSHI BAMENYE UBUGOME BWA FPR

Ubu rero, abahutu bose bamenye FPR icyo ari cyo, abenshi muribo bakaba ndetse bicuza uburyo bayishyigikiraga ikirwana, bakanicuza icyatumye batararwanye inkundura ngo bayibuze kugera kubutegetsi, ndahamya ntashidikanya ko urwango n’inzigo hagati ya bahutu na batutsi yikubye incuro nyinshi bitewe na FPR  ugereranyije n’uko babanaga mbere y’intambara yo muri 1990. FPR yo yibeshya ko kwica abahutu benshi, kubafunga no kubakoresha uburetwa, guhindura ibikange abahutu benshi b’ibisigazwa bari mu cyaro (nkuko bagaragara kuri iyi foto), kubabuza kwiga, kubica babyara kimwe n’impinja zabo, kubakenesha muburyo bwose, kubahindura banya-kurya ubuvungukira buguye hasi buvuye ku meza ya batutsi, kubaheza mubuzima bwose bw’igihugu, munzego za gisiviri niza gisirikare ; FPR yumva ko ibi ikora bizatuma abahutu bubika umutwe ubutazawubura, bityo bikazatuma abatutsi baguma ku ngoma ubutayivaho, nyamara umushishozi we arabwira FPR ati : « Ibyo n’ukwibeshya », muminsi yavuba, FPR ishoborakuko kuzatungurwa n’icyo itakekaga. Iyo umuntu yatewe ubwoba cyane, hanyuma uwabumuteye, ntaze kugira ubumuntu, ; ngo ahumurize uriya yateye ubwoba, noneho bwa bwoba bukaza kwimara ubwabwo, uyu muntu arwanya uyu wamuteye ubwoba kugera aho we ubwe yiciwe cyangwa akica uriya wamuteye ubwoba ; mu minsi mike tugiye kubona ibintu nk’ibi mu Rwanda, tubitege amaso.

KAGAME YAKAGOMBYE GUHIRIKWA 

Hibazwa impamvu bamwe mubasirikare bakuru ba Kagame batamuhirika, mugihe babona neza ko , uko iminsi ihita, isura ya shebuja wabo ndetse n’iyi ngoma ye muri rusange igenda irushaho kuba mbi, imbere y’anyarwanda ndetse n’amahanga, abenshi mu bagenzura amayeri Kagame akoresha kugera kuri uyu munsi, bemeza ko, abasirikare babazirange bari mu ngabo ze aribo Kagame azira akaba yirirwa abafunga kuko abikekaho kuba aribo ba muhirika kuko bo ntacyo bashinjwa imbere ya banyarwanda n’imbere y’amahanga, kuburyo uwa muhirika yahita ashyigikirwa n’abanyarwanda ndetse n’amahanga, noneho, hakabaho n’ikindi gice cya basirikare ba kuru mungabo ze, buzuye amaraso y’abahutu ndetse n’abatutsi ku mutwe no kuntoki bakaba babishinjwa n’abanyarwanda ndetse n’amahanga abo ni nka : Kayonga, Nziza, Gumisiriza, Ibingira n’abandi benshi mwese muzi, aba rero nibo Kagame yiyegereza, akabaha n’imyanya ikomeye mungabo, kuko azi neza ko bo ntawahirahira amuvana kubutegetsi, kuko nawe atazigera yemerwa n’abanyarwanda cyangwa n’amahanga. Abandi basirikare Kagame yikeka ko bamuhirika n’insoresore ziri muri FPR,ubu nazo inyinshi yazimariye mu gi polisi, azivana mu gisirikare, ngaya amayeri atuma Kagame agejeje kuri uyu munsi wa none, ariko kandi birimo byigaragaza ko hari bamwe mubasirikare bakuru batagira icyo bishinja cyangwa bashinjwa barimo kwitegura kugira icyo bakora ngo bafatire icyemezo Kagame, ibi nabyo tubitege amaso. 

ABAZUNGU NABO BARIMO BARASHAKA UBURYO BWIZA BAKWIKIZAMO KAGAME.

Bimaze kugaragara muri iyi minsi ko, bamwe mu ba nyamerika ndetse na bongereza bashyigikiye Kagame mu migambiye mibisha ndetse hakaba hari na manyanga menshi bagiye bafatanya nawe, bamaze kubona ko iminsi ye ibaze muri politike bitewe n’ibibi byinshi birimo n’amaraso y’inzira karengane nyinshi Kagame adashobora kwikura n’iyo yagira ate, bakaba barimo bashakisha uburyo ya kubitwa urwingusho ntabashe guhishura amwe mumabanga yagiranye n’abariya bazungu, uwo mugambi uriho kandi ni simusiga, we iyo abona yirirwa afunga abanyapolitike abahimbira ibinyoma, amahanga ntakome, yibaza ko bamushyigikiye, ntamenye ko ahubwo ari ukumwirinda ngo atavaho avuga akari imurori, maze bikabamerera nko gukabukira intozo ya saze n’imbokoboko nsa, ngirango icyakurikiraho namwe mura cyumva.

NGAYA BAMWE MU BATUTSI BARI MU RWANDA 

Iyo bareba imikorere ya shebuja aho kuyigaya bakamukomera mu mashyi, abo banyapolitiki Kagame agaraguza agati nibo bayobozi b’Urwanda rwejo, ubu barimo barakorerwa amabi yose murebera muyashyigikira, nyamara abenshi murimwe muzarigata kungaruka mbi, z’ibyo bibi Kagame akora ubu, mushobora kuba mutabyumva ukuntu ibintu byahinduka mugihe gito, kubera ibyo byiza by’igihugu mwihariye bibakikije bikaba bibahuma amaso, nyamara njye mbona byaba ari ubugwari cyane mutibutse ko mbere yuko mugera aho muri , hahoze abandi nabo bahoze bibaza nkamwe ; kubura ubushishozi n’ibyo byatumye mubasimbura mu myanya yabo, ngirango abenshi muribo muzi aho mwabashyize, n’utarapfuye arimo arahorogoma cyangwa ararara rubunda, mugihe ibye mubigaramyemo, nyamara ngo ntabapfira gushira kandi ngo umubabaro wigisha ubwenge, niba mwarabashije kubamenesha bamaze gusa imyaka 34  kubutegetsi ngirango kubera ubwenge mwa bigishije ubu noneho ni bongera gusubirana ingoma bazihangana bageze nibura kumyaka 68 mumitego yanyu mujya mubatega bazabasha guteguramo myinshi bitume baramba kabiri, nyamara mubishatse, mwafasha mukubaka ubumwe nyabwo bw’abanyarwanda, bushingiye kubureshye ku murimo, muburenganzira imbere y’amategeko. Njya ndeba bamwe mu bagore babatutsikazi bishima cyane iyo bareba Madame Ingabire yogoshe kandi yambaye amapingu, bakirengagiza ko ari umubyeyi nkabo uzizwa ko aharanira uburenganzira bwa buri mu nyarwanda, arashinjwa ibinyoma nk’ibyo bashinje Yezu mukavuza impundu, nyamara nta babeshye Madame Ingabire n’indorerwamo ireberwamo ubumwe n’ubwiyunge hagati ya bahutu n’abatutsi mu Rwanda n’ikimenyetso Kagame atazigera abasha gusibanganya yewe n’iyo yamwica amaraso ye azamera nk’urubuto rw’ishaka ruguye mu gitaka kiza, hazahita havuka ba Ingabire ibihumbi 100. 000 bo Kagame ntazabafunga ngo abarangize. 

HAKABA HARI NA BANDI BATUTSI NSHIMIRA. 

Barimo :Mushahidi Déo, Kayumba F, Karegeya P, Gahima G , Rudasingwa T, Gasasira J.B n’abandi ntabashije kurondora amazina, ikingenzi n’uko bo ubwabo b’iyizi, hakaba ndetse hari n’abo Kagame yavukije ubuzima bwabo, nta muntu ushyira mu gaciro wa kwibagirwa urupfu rubi yishemo André K. Rwisereka, hari n’abandi benshi barimo abazwi n’abatazwi.

Aba bose nkaba ndata ubutwari bwabo, abenshi muribo, tuzi twese ko aribwo bari bakigaruka mu rwanda nyuma yo kuvukira no gukurira mu buhungiro, biyemeje kurwana urugamba bafatanyije n’abandi bavandimwe babo babitewe n’inyota nini bari bafite yo gutaha, gutura no kubaho, muburenganzira bwose busesuye hamwe n’abandi banyarwanda mu gihugu cyabo Urwanda, nyamara baje gutangazwa no kubona umuntu umwe ariwe Kagame urwanda arugira nka karima ke ka wenyine, cyane cyane nk’uko babyivugira, uburyo abahutu bicwa, bamburwa uburenganzira bwo kwishyira ukizana mugihugu, uburyo bahezwa mu kazi ka leta n’ibindi….

Nta rondoye, ibi ni byo byaje gutuma, babona ko badahuje ingendo na Kagame, cyane cyane ko ibyiyumviro bye ari byo agenderaho atajya yemera na rimwe umukosora, kuriwe kumukosora n’ukumurwanya, ukora ibyo akaba agomba gupfa, Rwisereka akaba ababera urugero rufatika, yewe naho bahungiye Kayumba, ibyamubayeho muri afrika yepfo ntawe utabizi, mwese banyarwanda n’iyo umuntu yagira ibyamirenge ariko ari impunzi, biba bigereranywa n’ubusa, ariko niyo wagira bike uri mu gihugu cyawe, ugifitemo amahoro, uburenganzira bwose bukwiriye umunyagihugu, mbona ntabukire buruta buriya, iyo bariya bagabo baza kuba ibisahiranda bagafatanya amabi na Kagame n’ubu baba banezerewe mu rwanda, ariko se nawe umunezero wa Kagame ureremba hejuru y’amaraso y’inzira karengane n’umunezero uzamara igihe kingana iki ? Aba bagabo banze kuba ba-nda y’umuns’umwe, maze bahitamo kwitaza Kagame, none bafatanyije n’abandi banyarwanda bafite inyota ya demokarasi n’ubutabera mu gihugu cyabo, munzira ya mahoro izira amasasu biyemeje kurwanya Kagame, umugambi wabo rero, ukaba aruwo gushyigikirwa no gushimwa na buri munyarwanda ushyira mugaciro, kandi nkaba mpamya ko inzira bayigeze kure bayigenda kuko naho Kagame yari yaragize indiri ye nko mu bwongereza, bose hamwe hatabuze mo n’umwe nk’uko mubizi muri iyi minsi bahagiriye ikiganiro, ngirango muribuka mwese ko leta ya Kagame yo hereje mubihugu byinshi birimo n’ubwongereza za Warrants/mandats zo gufata bariya bagabo, none se tuvuge ko binjiye mu bwongereza bihishe nta na Visa bafite, cyangwa tuvugeko leta y’ubwongereza itamenye ko bariya bagabo bayibereye ku butaka. Bahungu umukino wa politike usa ukwawo, ugakinwa n’abawuzi, ndabona Kagame na za Warrants ziwe aribo bahindutse ibigarasha byuzuye, n’aho we abo yise ibigarasha bahindutse amaturufu y’indobanure. 
Bagabo, kuyavuga s’ukuyamara reka mbaharire namwe urubuga.

Umusomyi wa Veritas.