Twagiramungu Faustin yiyemeje kujya mu myigaragambyo yo kwamagana Kagame Paul i Paris , agasaba abanyarwanda gusenyera umugozi umwe no gushyigikira COVIGLA !

Mbandikiye ntinze ariko gutinda si kimwe no kwanga. Ndagira ngo nshimire mbere na mbere FAIDA watugejejeho igitekerezo cyiza cyo gusenyera umugozi umwe, ku buryo abenshi mu Banyarwanda bari hanze bagishimye cyane kandi tukaba tugishyigikiye.

Nibyo koko abagomba kwigaragambya ntibagomba kuba bari mu mashyaka gusa, cyangwa mu mashyirahamwe arengera uburenganzira bw'ikiremwamuntu. Abigaragambya bagombye kuba Abanyarwanda bose bari hanze badakunda ubutegetsi bw'igitugu Kagame yimakaje mu Rwanda, akabwimakaza asa n'uwicaye ku kirunga cy'amagufa gikikijwe n'imivu y'amaraso yabo yishe, hari mo abaperezida babiri, uw'Urwanda n'uw'Uburundi, tutaretse Abepiscopi na Arkiyepiscopi, abihayimana benshi, abanyapolitike yagiye yicira ku ma rembo bataha, cyangwa abo yishe abatsinze muri prisons, cyangwa kuri za "feus rouges", kimwe nabo ahusha ashaka gutsinda mu bitaro, kandi tutaretse imbaga y'abavanywe mu byabo n'intambara yatsinze i Kibeho, kimwe n'impunzi ibihumbi amagana yatsinze muri Kongo.

Abanyarwanda bose batemera ko umwicanyi nka Kagame adakwiye gutekeka, rero ngo ni ukubayobora Urwanda, bagombye bose kuza i PARIS kumwamagana. Bakaboneraho n'uburyo bwo kugaya abatumiye umwicanyi KABOMBO bamuha tapis rouge, isa n'iyo bagenera abakuru b'ibihugu b'imena nka ba OBAMA, ba Mandela, cyangwa umwamikazi Elisabeth II w'Ubwongereza. Biratangaje, biranababaje.

Turetse ubwicannyi busa naho Kagame yaherewe IMPAMYABUSHOBOZI n'ibihugu bimutumira, Abanyarwanda benshi bagomba no KWAMAGANA politike ye y'UBWIBONE yo gufata Urwanda nk'umurage wa se. Ubu uwemerewe kuba mu Rwanda, akahakirira ni uwo Kagame yemerera ko amuhakwaho, bityo akamuha uburyo bwo gusahura Urwanda ataretse na Kongo. Abo yakijije n'Abanyarwanda bita "Abassajya" ubu akaba ari nabo bikwije ibyiza byose Urwanda rufite, mu gihe abandi twakwiye imishwaro, abitwa "Abasope" bari mu gihugu bakaba baremeye kuba INGARUZWAMUHETO.

Abanyarwanda bemera ko Perezida Kagame agamije gukenesha abo yasanze mu gihugu, abasenyera, abasaba gukora ibinyuranyije n'uburenganzira bwabo, agurisha igihugu n'Abanyamahanga, yitwaje ibyo yita Iterambera ngo risa n'irya SINGAPOUR, bose bagombye kuza mu myigaragambyo. Abanyarwanda bose bashaka ko imfungwa za demokarasi zivanwa ku ngoyi y'akarengane ziriho, bagomba kuza i PARIS kwigaragambya.

Kugira ngo IMYIGARAGAMBYO ITUNGANE NTIGOMBA GUKORWA N'UDUTSIKO TW'AMASHYAKA. Hagombye kubaho comités z'ABAKORANABUSHAKE mu migi yose ikomeye yo mu BURAYA hose ahari Abanyarwanda. Izi comités nizo zagombye gukora mobilisation, zifatanije na za organisations zirengera uburenganzira bw'ikiremwa-muntu, nka IBUKABOSE, Organisation ya MATATA, ni zindi ntazi. Kuba amashyaka yakwunganira abakora organisation yo kwigaragambya hamwe n'abagize amashyirahamwe (associations) anyuranye ntako bisa.

Imyigaragambyo ntabwo ari igihe cyo kwamamaza amashyak na beneyo. Ni igihe cyo kwerekana ko dushyize hamwe. Ni igihe cyo KWEREKANA KO DUSENYERA UMUGOZI UMWE. Kwigaragambya, bita "manifestation" twakwita "ISERUKANAMIHIGO" yo kwamagana imyitwarire mibi y'abayobozi, twerekana ko igomba guhinduka, tukayisimbuza imyiza ishingiye ku bushake, uburengazira, no kwishyira no kwizana kwa rubanda.

Kuri 29 Mutarama nasezeranije abo twarikumwe mu kiganiro ko nzajya i Paris kwamagana Perezida Kagame. Nzajyayo.

Muramuke neza.

Faustin Twagiramungu

Bavandimwe,

Ni ngombwa gushimira no gushyigikira initiatives zafashwe na COVIGLA ifatanije n'andi mashirahamwe nyarwanda ari mu bihugu by'Uburaya.

Icyo dusaba nuko twamenyeshwa ba responsables ba za comités d'organisation ziri muri ibyo bihugu, kugira ngo turebere hamwe niba ibyo COVIGLA isaba dushobora kubiyifashamo kugira ngo dutunganye "manifestation" twise DUSENYERE UMUGOZI UMWE.

1. Kumenyeshwa niba hari za "cars" zitenganywa, cyangwa covoiturages zizajya i Paris.

2. Kumenya niba za banderoles na pancartes tuzazisanga i Paris cyangwa tuzaza tuzizanye.

3. Kumenyeshwa ibikubiye mu ibaruwa isaba imyigaragambyo, ibyangombwa biyikubiyemo, aho manifestion izakorerwa, itariki yo irazwi.

4. Comités zigomba kumenyesha Abanyarwanda bari mu bihugu by'Uburaya aho inama zo gutegura manifestation zibera, n'amasaha ziberaho, kugira ngo zumvikanishe neza igisabwa cyane muri iyi manifestation, kandi higwe neza na za slogans za ngombwa, ndetse no kwita ku kibazo cya discipline muri manifestation.

GUSENYERA UMUGOZI UMWE BISABA KO UMUGOZI UJYA AHAGARAGARA KURI BOSE.

Turizera ko izi comités zitazatererana COVIGLA yafashe initiative.

Faustin Twagiramungu