Intambara ikomeje guca ibintu muri Sudani yepfo !

Uyu munsi kuwa gatandatu taliki ya 18/01/2014 ingabo za leta ya Sudani yepfo ziremeza ko zigaruriye umujyi wa Bor ukungahaye kuri peteroli ,uwo mujyiukaba ugarujwe n'ingabo za Salva Kiir nyuma y'ukwezi kurenga! Ingabo za leta ya Sudani yepfo ariko ziravuga ko kugeza ubu zitarashobora kumenya irengero ry'abasilikare bayo benshi bagotewe mu mujyi wa Malakal ubu uwo mujyi ukaba ugenzurwa n'abarwanyi ba Riek Machar.

Nubwo amakuru menshi yavuze ko leta ya Sudani yepfo yashoboye kumvikana n'abayirwanya bayobowe na Riek Machar muguhagarika imirwano, amakuru atangwa n'ikinyamakuru cya "slateafrique" aremeza ko kugeza ubu ntakiratangazwa kuri ayo masezerano. Leta ya Sudani yepfo iremeza ko uyoboye intumwa zayo muri ibyo biganiro n'abayirwanya mu muji w'Addis Abeba akiri mu murwa mukuru wa Sudani yepfo ariwo Juba, akaba yiteguye gusubira Addis Abeba ngo arebe ko yashyira umukono ku masezerano yo guhagarika intambara; umwe mu ntumwe za Riek Machar uri muri ibyo biganiro witwa Mobior Garang aratangaza ko abarwanya ubutegetsi biteguye gushyira umukono kunyandiko y'amasezerano yo guhagarika intambara yateguwe n'umuryango w'Afurika yiyunze niba leta ya Sudani yepfo yemera idashidikanya ibikubiye muri uwo mushinga byose, kugeza ubu rero bikaba bitaramenyekana niba Sudani yepfo izemera ibikubiye muri ayo masezerano mbere y'uko ashyirwaho umukono akajya yabona gukurikizwa.

Umuyobozi w'urugamba mu mirwano iri kubera hafi y'umujyi wa Malakal ku ruhande rw'ingabo za Salva Kiir yatangaje ko ingabo ayoboye zakomeje kugira ikibazo cyo kubohoza abasilikare benshi ba leta bafatiwe muri uyu mujyi n'ingabo za Riek Machar, kugeza ubu bakaba batarashobora kumenya aho abo basilikare baherereye kuko itumanaho n'abo ridacamo, arizera ko ingabo za leta zishobora gusandaza abarwanyi ba Riek Machar bityo bagashobora kwinjira mu mujyi bakareba ko bashobora kumenya uko byagendekeye bagenzi babo!

Uwo mujyi wa Malakal niwo intambara yatangiriyemo muri Sudani yepfo ku italiki ya 15/12/2013 ,uwo mujyi ukaba warigaruriwe incuro ebyiri n'impande zombi, ubu ukaba ugenzurwa n'ingabo za Riek Machar, imirwano ikaze kandi ihanganishije impande zombi mu mijyi ya Bor na Bintiu. Umuryango w'abibumbye urashinja impande zombi kwinjiza abana mu gisilikare kandi iyo ntambara ikaba irimo ubwicanyi bwinshi bukoranywe ubugome!

Ubwanditsi