Rwanda: Ishyaka RRM riratanga impuruza yo kumenya aho Callixte Nsabimana Sankara aherereye nyuma yo kuvanwa muri gereza ari kumwe na Paul Rusesabagina!

Impamvu: Gutabariza

Kuwa gatanu tariki ya 24 werurwe hasohotse amatangazo anyuranye cyane cyane ayanditswe n'Ikinyamakuru «Igihe» aho cyavugaga ko Bwana Rusesabagina Paul na Callixte Nsabimana Sankara bari bufunguwe ku bw'imbabazi z'Umukuru w'Igihugu, nyuma yaho hasohotse andi makuru avuga ko hari bufungurwe abandi 18 babarizwaga muri MRCD - FLN, ndetse hamwe n'abandi baburaniye mu zindi manza. Kuwa gatandatu tariki ya 25 Werurwe 2023, hasohotse andi makuru avuga ko Bwana Rusesabagina Paul yarekuwe, akajyanwa muri ambassade ya Qatar.

Nyuma yayo makuru yose, hakaba harasohotse andi makuru avuga ko uretse Paul Rusesabagina wahawe uburenganzira bwo kujya mu muryango we havugwa ko ngo abandi boherejwe mu kigo cya Mutobo ngo aho bagiye mu Ngando muri gahunda yo kubaforomata, nkuko James Kabarebe yakunze kujya abyigamba.

Mu byukuri nkuko byatangajwe n'ikinyamakuru «IGIHE», kigaragaza bamwe mu batwawe i Mutobo, ishyaka RRM (Rwandan Revolutionary Movement) rihangayikishijwe cyane no kuba mubagaragajwe hatabonetsemo Bwana CALLIXTE NSABIMANA (ALIAS SANKARA) ndetse n’abo twabajije bo mu muryango we, bakaba baturabwiye ko bataramuca iryera.

Tukaba tuboneyeho uyu mwanya wo kumutabariza, tunasaba leta y'uRwanda ko yamugaragaza byihuse, ndetse n'abandi bafunguranywe, bakagaragazwa umwe ku wundi, kandi bagahabwa uburenganzira bwo guhura n'Imiryango yabo, hamwe n'itangazamakuru.

Tukaba tunibaza kuri izo mpuhwe zimeze nk’iza Bihehe, zo kwitwa ko utanze imbabazi ngo ufunguye abantu, ukabakura mu ibohero rimwe, ukajya kubabohera mu rindi!!

Bikorewe i Cape Town kuwa 28 Werurwe 2023.

TWIHANGANE PACIFIQUE SHAREEF

Umuyobozi wa RRM.

E-Mail: rrm-2017@gmail.com Cell: +27 825 025 311