Rwanda: Birangiye Kizito Mihigo apfuye!(update)

Nyuma y'aho RIB itangarije ko umuhanzi KIZITO MIHIGO yitabye Imana aguye mu maboko yayo, "Veritasinfo" ikomeje kubona ubuhamya buri gutangwa n'abantu bo mu muryango wa Kizito bavuga ko urupfu rwe barumenyeshejwe na RIB kuwa gatandatu taliki ya 15/02/2020 nyuma y'iminsi 2 gusa amaze gutabwa muri yombi. Umuryango wa Nyakwigendera Kizito Mihigo ukaba watangajwe n'uko RIB yatangaje ko Kizito yitabye Imana kuri uyu wa mbere taliki ya 17/02/2020 ngo kandi yiyahuye!

Ku mbuga nkoranyambaga zihurirwaho n'abanyarwanda benshi, hakaba hakomeje kunyuraho amakuru anyuranye yemezako Kizito Mihigo yishwe n'ubutegetsi bwa Paul Kagame. Akimara gufatirwa ku Gikongoro, RIB yagiye gufungira Kizito i Kami ari naho yiciwe nyuma umurambo we bawujyana muri station ya polisi i Remera! Kuvuga ko Kizito Mihigo yiyahuye ni uguca umugani ku manywa kuko nta buryo yari kwiyahura ari mu cyumba gito cyane kandi kirinzwe n'abapolisi bafite intwaro zikomeye, ikindi ni uko abantu bafungirwa muri kasho zo mu Rwanda nta biryamirwa bahabwa (amashuka) kandi abo bafungiramo baba bamaze kubasaka ngo barebe ko nta gikoresho bakwinjiranamo nka telephone, icyuma n'ibindi, none se Kizito yari kurira ate urukuta akimanika mu idirishya rihagazeho umupolisi umurinze?

Uko byagenda kose, ibisobanuro byose byatangwa ntabwo bikuraho ko urupfu rwa Kizito Mihigo ruhama leta ya Paul Kagame kuko yaguye mu maboko yayo kandi yishwe! Kizito azahora yibukwa iteka mu muryango nyarwanda! 

Imana imuhe iruhuko ridashira.

Urwego rw'Ubugenzacyaha bwa Kagame RIB bwihutishije cyane urupfu rw'umuhanzi Kizito Mihigo! Mu itangazo urwo rwego rw'igipolisi gihiga abatavuga rumwe n'ubutegetsi bw'umwicanyi n'umunyagitugu Paul Kagame rwashyize ahagaragara kuri uyu wa mbere taliki ya 17/02/2020 ruvugako Umuhanzi Kizito Mihigo yitabye Imana aguye mu kasho ka RIB kari i Remera!

Kizito akaba apfuye urupfu rumeze kimwe n'urwo umunyamategeko Me MUTUNZI Donat wunganiraga Mugesera Léo mu by'amategeko yapfuye, uwo munyamategeko yabanje kunyerezwa nyuma umurambo we uza gusangwa mu kasho k'igipolisi cy'abicanyi ba Kagame, abo bicanyi bakaba barasobanuye ko uwo munyamategeko yiyahuye kandi bari babanje kuvugako batazi irengero rye! Na Kizito Mihigo niko byagenze! Umuntu yiyahura ate ari mu kasho karindiwe umutekano n'igipolisi cy'umwuga? Ese abaturage baufashe Kizito bakamuha abicanyi baziko nabo ariko bazicwa?

Imana imuhe iruhuko ridashira!