Rwanda: Paul Kagame yahinduye abacikacumu ibitambo atanga byo kugundira ubutegetsi no kwica abahutu!

Igitekerezo cy'umugani wa Bakame yariye umwenda w'intare n'uw'ingona, gishushanya neza ubwicanyi Kagame Paul akorera abacikacumu (abatutsi) kandi abeshya ko yaje kubarokora kimwe n'abahutu yica avuga ko ari kurengera abatutsi kandi abica! Kagame akoresha ayo mayeri  ameze nk'aya Bakame mu kuryanisha ayo moko yombi kugirango abone uko ayategekesha igitugu kuburyo nta numwe urabutswe! Kugirango Kagame ashobore kugundira ubutegetsi mu Rwanda kugeza apfuye, yiyemeje gukwiza iterabwoba mu banyarwanda rivanze n'ubwicanyi bukoranye ubugome bukabije buvanze n'amayeri ameze nk'aya Bakame, aribyo abantu benshi bita "ikinyoma kimeze nk'icya semuhanuka"! Ese ayo mayeri ya Bakame ateye ate?

Bakame yariye umwenda w'intare, yizeza iyo ntare ko izayishyura inka y'ikimasa; nabwo Bakame irakugendera irya umwenda w'ingona nayo iyizeza ko izayishyura inka y'ikimasa. Bitewe n'uko ingona iba mu mazi, intare nayo ikaba mu ishyamba, ntabwo ibyo bikoko byombi byigeze bigira aho bihurira ngo biganire, bityo ibyo bikaba byarafashije Bakame kubiteranya byombi kugeza ubwo byicana, Bakame isigara yigaramiye!

Bakame yarakugendeye ishaka umugozi muremure kandi ukomeye cyane iwushyira intare, irayibwira iti: "ngiye kukwishyura ideni wampaye, nkaba niyemeje kuguha inka y'ikimasa. Bakame yabwiye intare ko ikimasa igiye kuyishyura ari kinini cyane kandi kikaba gifite amahane kuburyo yananiwe kukizana. Bakame isaba intare ko yakwemera ikayambika uwo mugozi mu ijosi, hanyuma ikajya kuwambika icyo kimasa kuburyo intare iza ku gikurura ikagitwara! Intare yumvise isubijwe irishima cyane yambara wa mugozi mu ijosi itegereza ko Bakame ijya kuwambika ikimasa igomba gukurura! Bakame, yafashe wa mugozi ijya kureba ingona, irayibwira iti: "ngiye kukwishyura idene wampaye, nkaba ngiye kuguha ikimasa kinini ariko ku kigeza hano cyananiye, none ngiye kukwambika uyu mugozi mu ijosi kuko narangije kuwambika icyo kimasa noneho uhite ugikurura ugitware! Ingona yemeye kwambara uwo mugozi mu ijosi ntamananiza!

Ingona imaze kwambara umugozi mu ijosi yakuruye ya ntare yibwira ko ari ikimasa iri gukurura, intare nayo ikurura ya ngona yibwira ko ari ikimasa iri gukurura, maze Bakame ihagaragara ahirengeye ikajya yogeza ibyo bikoko byombi ibishishikariza gushyiramo  akabaraga kugirango buri cyose gifate ikimasa yagihaye. Ingona n'intare byarakururanye byombi ntihagira na kimwe gikurura ikindi ngo kikivane mu birindiro kirimo. Intare n'ingona byakomeje gukururana bimara umunsi wose, nyuma biza kugwa agacuho, kugeza ubwo wa mugozi wabinize byombi bishiramo umwuka birapfa! Sinjye wahera, hahera intare n'ingona!

Kagame yazirikishije abahutu n'abatutsi umugozi ukomeye w'ubwoba!

Amayeri Bakame yakoresheje yo guteranya intare n'ingona nyuma bikaza gupfa byombi, niyo mayeri Kagame yahereye cyera akoresha yo guteranya abahutu n'abatutsi kugirango bakomeze kumarana naho we yigaramiye! Kuva ku italiki 15 Nyakanga 2019 ubwo Umwari Diane Rwigara yandikiraga ibaruwa Kagame imusaba guhagarika ubwicanyi bukomeje gukorerwa abacikacumu bukozwe n'inzego zishinzwe umutekano; ibinyamakuru mpuzamahanga no ku mbuga nkoranyambaga zihuriraho abanyarwanda benshi, hakomeje gutambutswa ibitekerezo by'abantu benshi cyane, bimwe bitanzwe n'abacikacumu bashima cyangwa se bagaya ibitekerezo bikubiye muri iyo baruwa, ibindi bitekerezo bigatangwa n'abandi banyarwanda banyuranye ndetse n'abanyamahanga.

Umuryango "Ibuka" ushinzwe kurengera inyungu z'abacikacumu b'abatutsi uvuga ko nta mucikacumu numwe wishwe cyangwa ngo ahohoterwe, naho komisiyo y'igihugu ishinzwe kurwanya jenoside CNLG ikaba ivuga ko Diane Rwigara apfobya jenoside yakorewe ubwoko bwe! Ariko yaba Ibuka cyangwa CNLG nta numwe muri bombi ugira icyo avuga ku mazina y'abacikacumu barenga 40 bishwe Diane Rwigara yashyize ku mugereka w'iyo baruwa yandikiye Kagame! Bamwe mu bahutu babonye iriya baruwa bakaba bavuga ko Diane yavugiye abatutsi gusa akibagirwa imbaga y'abahutu Kagame yarimbuye kandi akomeje kwica.

Muri iyo baruwa ariko Diane yavuze ko hari abahutu benshi bishwe kandi bakomeje kwicwa ndetse avuga n'amwe mu mazina y'abo bahutu bishwe, ariko ashimangirako mu ibaruwa ye yibanda kubacikacumu b'abatutsi kuko Kagame ahora avuga ko aribo yaje gukiza! Abacikacumu b'abatutsi bahunze ubutegetsi bwa Kagame nibo basesengura neza ibaruwa ya Diane Rwigara bakamushimira ubutwari yagize bwo kwandika akarengane gakorerwa abacikacumu b'abatutsi ariko bakaba baratinye kukavuga kubera ubwoba bashyirwaho na leta ya FPR!

Isesengura ryimbitse ku ibaruwa ya Diane Rwigara no kubwicanyi bw'abacikacumu b'abatutsi  ryakorewe mu kiganiro cyanyuze kuri "radiyo UBUMWE". Mu batumirwa batumiwe muri icyo kiganiro harimo impirimbanyi y'uburenganzira bwa muntu kuva cyera Bwana Joseph MATATA. Kuburyo busobanutse neza Bwana Matata yagaragaje ko Kagame yagize abatutsi bose ibitambo byo kugera ku butegetsi, ubwo yahanuraga indege yarimo prezida Juvénal Habyarimana, agakora n'igikorwa cyo kuvanga inkotanyi n'interahamwe kugirango bice abatutsi benshi mu 1994; kugirango kandi Kagame ashimangire ubutegetsi bwe, yafashe gahunda yo kujya yica abacikacumu b'abatutsi kugirango abagire impamvu yo kujya kwica abahutu no kujya gusahura umutungo wa Congo yitwaje kujya kurwanya abajenosideri!

Matata yavuze ko Kagame yatangiye kwica abacikacumu b'abatutsi mu gihugu cyose guhera mu mwaka w'1996 ari gushaka impamvu yo kujya gutera inkambi z'abahutu bahungiye muri Zaïre ariyo Congo y'ubu! Matata avuga ko ubwo bwicanyi bw'abacikacumu b'abatutsi muri icyo gihe bwakorewe raporo n'impuguke z'umuryango mpuzamahanga, iyo raporo ikaba ibitse muri ONU ariko Matata akaba afite kopi yayo! Matata avuga ko muri icyo gihe (1996) Kagame yatangiye kwica abacikacumu b'abatutsi, Diane Rwigara akaba yari afite imyaka 14 gusa, bityo rero akaba atari Diane Rwigara ugaragaje bwa mbere ko Kagame agiye gutsemba abacikacumu b'abatutsi kandi abeshya isi yose ko ariwe wabarokoye! 

Ikintu cyatumye ibaruwa ya Diane Rwigara itera ubwoba Kagame n'intore zimugaragiye ni uko bibaye ubwa mbere mu Rwanda umucikacumu w'umututsi yandikira Kagame ku mugaragaro kandi akabimenyesha isi yose, yerekana ko ubutegtsi bwe bwica abacikacumu  b'abatutsi kandi abeshyako yaje kubakiza! Indi mpamvu ikomeye yatumye ibaruwa ya Diane Rwigara ititiza inkotanyi ni uko bitangiye kugaragara ko hari abatutsi n'abahutu batangiye kuzamura ijwi berekana ko umuntu wica ayo moko yombi kandi akaba akomeje kuyateranya ari Kagame ubwe kubera inyota y'ubutegetsi! Tugarutse kuri ya mayei ya Bakame , ni uko iyo intare iza kumenya ko atari ikimasa iri gukurura cyangwa ingona ikamenya ko iri gukurura intare, ntabwo byombi biba byarapfuye, ahubwo byari kumenya ko Bakame yabibeshye!

Iyo akaba ariyo mpamvu Kagame yirinda ikintu cyose cyatuma abahutu n'abatutsi bahuza urugwiro bakavuga ku bibazo byabo! Niba abahutu n'abatutsi batangiye kubona ko umuntu ubateranya kandi ubica bombi ari Kagame, birumvikana ko ayo moko yombi ashobora gufatanya akamurwanya kandi byaratangiye! Iyo witegereje uko politiki yo mumashyaka atavuga rumwe n'ubutegetsi bwa Kagame ihagaze muri ibi bihe,  urabona imyumvire iri guhinduka kuburyo ikibazo cy'amoko kidafite uburemere cyane nk'uko byari bimeze mu 1994! Dufashe urugero, ni uko mu mpuzamashyaka ya MRCD harimo abahutu n'abatutsi no mu mpuzamashyaka ya P5 naho hakaba harimo abahutu n'abatutsi! 

Niba abahutu n'abatutsi bafatanyije gushaka impinduka mu gihugu ,ubwo ni nde uzabakoma imbere? Ndabarahiye kiriya kiziriko cy'ubwoba Kagame yashyize muri ayo moko yombi kizacika vuba cyane kuburyo Kagame atazabona amahirwe nk'ayo Bakame yagize!

Hasi aha mushobora gukurikirana ku buryo burambuye ikiganiro ku isesengura ry'ibaruwa ya Diane Rwigara cyakozwe na radiyo Ubumwe

Veritasinfo