Venezuwela: Bwana Guaido yavuze ko ariwe perezida w'igihugu w'agateganyo!
Bwana Juan Guaido wihaye umwanya w'umukuru w'igihugu cya Venezuwela
Ntabwo ari muri Repubulika Iharanira Demokarasi ya Congo RDC intebe imwe y'umukuru w'igihugu iri kurwanirwa n'abantu 2 gusa, no mu gihugu cya Venezuwela rurageretse! Bwana Juan Guaido uyoboye inteko ishinga mategeko ya Venezuwela yatangaje ko ariwe mukuru w'igihugu w'agateganyo! Ibyo akaba yabikoze nyuma y'imyigaragambyo ikomeye iri kubera muri icyo gihugu yamagana perezida uriho Nicolas Maduro. Ibihugu byinshi birimo "leta Zunze Ubumwe z'Amerika" bikaba byamaze kwemera ko Guaido ariwe mukuru w'igihugu cya Venezuwela!
Nyuma y'aho Guaido atangarije ko yigize umukuru w'igihugu, Leta Zunze ubumwe z'Amerika zahise zitangaza ko zimwemeye, Perezida usanzwe "Maduro" yatangaje ko ahagaritse umubano w'ububanyi n'amahanga Venezuwela ifitanye na Leta zunze Ubumwe z'Amerika! Mu gihe twandika iyi nkuru ibintu bikaba ari urujijo muri Venezuwela kuko bigoye kumenya uyoboye igihugu mu byukuri hagati ya Guaido na Maduro uwo ariwe! Bwana Guaido yavuze ko ariwe mukuru w'igihugu w'agateganyo wa Venezuwela ashingiye ku itegeko nshinga ry'icyo gihugu rivuga ko igihe perezida w'igihugu afite imiziro imubuza kuyobora igihugu asimburwa na Perezida w'inteko ishingamategeko!
Bwana Guaido yavuze ko yatinze gufata ubutegetsi kuko yari ategereje inkunga y'abaturage n'ingabo z'igihugu. Imyigaragambyo ikomeye yabaye kuri uyu wa gatatu taliki ya 23/01/2019 ikaba yamuteye akanyabugabo ko gutangaza ko ariwe mukuru w'igihugu, gusa ntibiramenyekana niba koko ingabo z'igihugu zimuri inyuma. Perezida wa Leta zunze Ubumwe z'Amerika , Donald Trump yavuze ko igihugu cye kiteguye kohereza ingabo muri Venezuwela niba ibintu bikomeje kumera nabi muri icyo gihugu!
veritasinfo