Rwanda: Politiki ya "Gira inka" igiye gusimbuzwa "Gira imbwa"!

Publié le 22 mars 2018 par veritas

Ubworozi bw'imbwa bugiye gusimbura ubworozi bw'amatungo asanzwe!

Ingoma ya Paul Kagame ikomeje kuzana udushya twishi tubabaje mu mibereho bwite y'abanyarwanda! Ubusanzwe umunyarwanda uramutse umugaburiye inyama z'imbwa cyangwa injangwe avuga ko umuhaye uburozi! Igitangaje ariko ni uko politiki ya Paul Kagame yahaye amabwiriza abayobozi b'intore yo gusaba abaturage kwikuraho amatungo yabo ya kinyarwanda (inka, inkoko, ihene , ingurube, inkwavu..) kugirango bayasimbuze ubworozi bw'imbwa n'injangwe! Umenya abanyarwanda bashobora kuba bageze muri bya bihe byavuzwe byo "kurya akataribwa"! Niba Kagame yiyemeje kugaburira abanyarwanda inyama z'imbwa n'injangwe, ubwo abanyarwanda bagomba kumufata nk'umurozi!

Aya makuru yo gutegeka abanyarwanda korora imbwa n'injangwe ntabwo yavuzweho cyane, kuko abanyarwanda bageze mu bihe byo kwiheba kandi bakaba bazi neza ko ushatse kunenga imiyoborere ya Kagame acibwa umutwe! Politiki yo gutegeka abaturage korora imbwa n'injangwe ifatwa mu rwego rumwe na politiki yo gutegeka abanyarwanda guhinga igihingwa kimwe, none indwara ziterwa n'imirire mibi harimo na "Bwaki" zikaba zigiye kubamarira ku icumu. Ubutegetsi bwa FPR Kagame bwambuye kandi abaturage imirima yo mu bishanga, maze ibyo bishanga ibigurisha abanyamahanga ngo babiteremo indabyo n'urubingo bitaribwa, iyo politiki yo guhima abanyarwanda ikaba yarateye inzara mu gihugu cyose izwi ku izina rya "NZARAMBA"!

Abaturage batuye akarere ka "Gasabo" (Kigali Ngari), bashavujwe n'uko intore ziyobora ako karere, zabategetse kugurisha cyangwa se kwica amatungo yabo bafite arimo inkoko, ihene, inkwavu ndetse n'inka. Abo baturage bakaba bari kugurisha amatungo yabo ku giciro gito cyane kugira ngo bayikureho ndetse bamwe bakaba bari kuramburuza amatungo ahaka kugirango babone abashobora kubagurira inyama zayo. Abo baturage babajwe cyane n'uko babuzwa korora amatungo yabo yabazaniraga amafaranga yo kwigisha abana mu mashuri kandi bigatuma babona n'ifumbire bashyira mu mirima yabo! Abaturage bemeza ko amatungo yemewe kororerwa muri ako karere ari imbwa n'injangwe gusa! Ibi byemezo bibangamiye umuturage bikaba bigejeje abanyarwanda aho umwanzi ashaka!

Amakuru atangwa na zimwe mu ntore zikomeye muri FPR, yemeza ko ikigo cy'ubucuruzi cya Kagame kitwa "Crystal ventures" gikora mu izina rya FPR kandi kikaba cyarigaruriye ubucuruzi bwose mu Rwanda kiyemeje gucuruza imiti ivura imbwa n'injangwe, akaba ariyo mpamvu leta ya Kagame igiye gutegeka abanyarwanda bose cyane cyane abatuye mu nkengero z'imijyi korora imbwa n'injangwe gusa! Iki cyemezo cyo gutegeka abanyarwanda korora amatungo batarya n'imwe muri gahunda ya leta ya Kagame igiye kongerera abaturage inzara, indyo nkene ndetse n'ubukene budashira! Ese aho ya politiki ya "Gira inka" ntigiye kugenda nka nyomberi nk'uko byagendekeye politiki ya "vision 2020" none ubu tukaba twinjiye muri politiki ya "Gira imbwa"?

Abanyarwanda benshi bakaba bibaza impamvu u Rwanda ruvuga ko rushyigikiye isoko ry'ubuhahirane hagati y'ibihugu by'Afurika, mu gihe abanyarwanda bakomeje gukeneshwa n'iyo leta no kudindiza imirimo ishingiye ku buhinzi n'ubworozi! Ko bizwi neza ko u Rwanda nta nganda rufite kandi rukaba ruri gusubiza inyuma ibikorwa by'ubuhinzi n'ubworozi, ruzacuruza iki mu bindi bihugu by'Afurika?

Veritasinfo