Leta y'u Rwanda ishobora gufatira ibihano leta ya Mozambique!

Mu ijoro ryo kuri uyu wa gatanu rishyira kuwa gatandatu taliki ya 17 Werurwe 2018, umunyarwanda ukorera ibikorwa by'ubucuruzi mu gihugu cya Mozambique witwa HITIMANA Vital Alias Général, yarashwe amasasu menshi mu nda no mu gatuza arakomereka bikomeye kuburyo yajyanywe mu bitaro ari intere. Ikinyamakuru "igihe" gikorera i Kigali cyakurikiranye inkuru y'iraswa ry'uwo munyarwanda maze kigira giti: "Hitimana ni umwe mu banyarwanda baba muri Mozambique bitabira ibikorwa byose bigamije iterambere ry'u Rwanda ndetse mu bihe bitandukanye ajya ataha agasura igihugu avukamo nk'uko bisobanurwa na Louis Baziga ukuriye Diaspora muri icyo gihugu". Niba leta ya FPR isaba ibisobanuro leta ya Uganda bitewe n'uko yafunze abanyarwanda biyita impunzi ariko bagakora ibyaha muri Uganda, birumvikana ko ihohoterwa rya Général Vital ufatwa nk'umunyarwanda uharaniranira inyungu z'igihugu rishobora gutuma leta ya Kagame ifatira ibihano ikigihu cya Mozambique! 

Uyu Général Vital yarashwe n'umuntu utaramenyekana kugeza ubu, ariko amakuru aturuka muri maneko za Kigali ndetse no mu bantu ba hafi mu muryango wa Général Vital, baratunga agatoki urwego rw'ubutasi rwa leta ya Kigali DMI ko ruri inyuma y'ihohoterwa rye! Nubwo ikinyamakuru "igihe"kivuga ko uyu Vital yakoreraga igihugu cye neza, urwego rushinzwe ubutasi rwa Paul Kagame ruramushinja kuba yaramennye amabanga yakazi yahawe n'urwo rwego bigatuma umurimo yahawe atawukora uko bikwiye.

Mu minsi yashize uyu, Général Vital yafashwe amajwi n'umwe mu bantu baganiraga nawe mu rugo, yigamba ko afite imbunda yahawe na leta y'u Rwanda yo kwica abanyarwanda b'impunzi zahunze leta ya FPR ziba muri Mozambique! Amajwi yigambagamo ako kazi yahawe yasesekaye ku mbuga nkoranyambaga, bituma ibikorwa bye bimenywa na bose cyane cyane impunzi zahigwaga! Kubera uko kumena ibanga, Leta ya Kigali yarakajwe n'iyo myitwarire ye maze ifata umwanzuro wo kumwica ariko urupfu rwe rukabyazwa umusaruro wo kurugereka ku mpunzi z'abanyarwanda ziri muri Mozambique kugirango iyo leta ifate icyemezo cyo kwirukana izo mpunzi! Iryo turufu ryo guteza umutekano mucye mu bihugu by'amahanga DMI ya Kagame ikaba yararikoresheje mu gihugu cya Zambia maze impunzi z'abanyarwanda ziriyo zirahohoterwa bikomeye!

Leta ya Kagame yari imaze iminsi iri mu biganiro na leta ya Mozambique byo kugirango icyo gihugu cyambure ubuhunzi abanyarwanda bahunze leta ya Kagame kandi impunzi Kigali ishinja ibyaha bya jenoside zifatwe zoherezwe i Kigali! Kugirango iyo gahunda yihutishwe, byabaye ngombwa kurasa Général Vital kugirango Kigali yerekane ko yarashwe n'impunzi z'abahutu! Kigali rero ibonye impamvu yo gusaba Mozambique gukemura ikibazo k'impunzi ivuga ko ziteza umutekano muri icyo gihugu bitaba ibyo leta ya Kagame igafatira ibihano leta ya Mozambique!

N'ahandi mu bindi bihugu mwitegure ihohoterwa ry'impunzi rikozwe na FPR nyuma itere akamo ko ari abantu bayo bari kwicwa n'interahamwe z'abahutu! 

Veritasinfo