Rwanda: Paul Kagame yasimbuje ururimi rw'ikinyarwanda ururimi rushya rwitwa "Ikinyangele"!

Publié le 10 février 2018 par veritas

Ese iyi midari Kagame ahabwa n'abanyamahanga ihabwa akahe gaciro n'abanyarwanda?

Raporo y'ishami ry'umuryango w'abibumbye Loni (UNESCO) rishinzwe ubumenyi n'umuco irerekana ko ururimi rw'ikinyarwanda ruri mu ndimi zishobora kuzimira burundu ku isi mu mpera z'iki kinyejana turimo niba nta gikozwe ngo urwo rurimi rurengerwe! UNESCO ikaba igira inama abategetsi b'u Rwanda gukora ibishoboka byose bakarengera ururimi rw'ikinyarwanda kuko ururimi arirwo shingiro ry'umuco n'iterambere ry'igihugu cyabo! UNESCO yemeza ko iyo abaturage batakaje ururimi rwabo baba batakaje igihugu cyabo ndetse bagasigara nta gaciro bafite!

UNESCO itewe impungenge z'uko ururimi rw'ikinyarwanda ruvugwa n'abantu barenga miliyoni 40 ariko ubutegetsi buriho mu Rwanda bukaba ntacyo bukora ngo burengere urwo rurimi ruri kugenda rucyendera! Kuri leta ya Habyarimana , ururimi rw'ikinyarwanda rwigishwaga mu mashuri abanza, ayisumbuye ndetse na kaminuza kuburyo "ikinyarwanda" cyari gifite ishami ryihariye muri kaminuza y'u Rwanda n'abanyamahanga bakaza ku kiga kandi bakagikuramo impamyabumenyi y'ikirenga yubashye n'amahanga! Ikinyarwanda akaba ari ururimi rwari ruhagaze neza muri Afurika mbere y'uko inkotanyi zibohoza u Rwanda mu w'1994; mbere y'uwo mwaka, ikinyarwanda cyari kimaze kugera ku rwego rw'indimi 4 zihagaze neza muri Afurika kuko ikinyarwanda cyari gifite imyandikire ya gihanga (ikibonezamvugo n'ubuvanganzo bihamye) yagiheshaga kuba ururimi rwihagazeho kuburyo muri iki gihe iyo bikomeza gutyo, ikinyarwanda kiba kigeze ku rwego mpuzamahanga kandi gishobora guhindurwa mu ndimi z'amahanga zikomeye (icyongereza n'igifaransa) hakoreshejwe ikoranabuhanga mu mvugo no munyandiko!

Kuva aho inkotanyi ziyobowe na Paul Kagame zimariye gufata ubutegetsi mu Rwanda taliki ya 4 Nyakanga 1994 k'uruhembe rw'umuheto, ibintu byinshi mu gihugu byarahindutse: Imiterere y'ubuyobozi yariho yakuweho, amazina n'imbibi z'uturere tw'ubuyobozi byari bisanzweho bikurwaho hashyirwaho ibindi bishya, umuco nyarwanda wari usanzweho ugenda uhinduka buhoro buhoro kuburyo mu Rwanda rushya nta muco rufite! Ubufatanye n'ururwiro byarangaga abanyarwanda byavuyeho bisimburwa n'ubwigunge n'urwikekwe ndetse no kwishishanya bigaragara cyane mu bavandimwe bonse ibere rimwe! Imico n'ingeso zitandukanye zo mu bindi bihugu byahawe intebe mu Rwanda! Byabaye ngombwa ko abanyarwanda bari basanzwe mu gihugu bitabira gukurikiza imico yazanywe n'inkotanyi zavukiye kandi zigakurira mu mahanga kugirango bashobore kurebwa neza n'ubutegetsi bushya cyangwa se kugirango babitwa ibipinga (gusuzugura ubutegetsi)!

Ubwoba abanyarwanda batewe n'inkotanyi kugirango baticwa nibwo bwatumye bibagirwa ururimi n'umuco wabo maze bose batangira kuvuga ururimi Paul Kagame avuga! Kugirango umunyarwanda yerekane ko yacengewe n'amahame y'inkotanyi nuko agomba kuvuga nkazo, akavuga ikinyarwanda akigoretse, akakivanga n'izindi ndimi z'amahanga cyane cyane icyongereza n'igiswahili, akibagirwa ururimi rw'ikinyarwanda kuko byamuviramo kwitwa "interahamwe" cyangwa "umujenosideri"! Ngiyo intwaro ikomeye cyane Kagame n'inkotanyi bakoresheje mu gutsemba ururimi rwiza rw'ikinyarwanda n'umuco nyarwanda! Hashize imyaka 24 abanyeshuri bo mu Rwanda batigishwa ururimi rw'ikinyarwanda ndetse n'amateka y'igihugu cyabo, umunyeshuri ugerageje kuvuga ikinyarwanda kuburyo bwiza ku ishuri arabihanirwa cyangwa akitwa umwana w'interahamwe!

Ikinyangele: Ururimi rushya rwa leta ya Kagame!

Muri iki gihe mu Rwanda havutse ururimi rushya rwasimbuye ikinyarwanda. Urwo rurimi rwazanywe na Kagame n'inkotanyi bafatanyije kuboha igihugu, iyo wumva urwo rurimi rushya usanga ari urusobekerane rw'indimi zivugwa mu karere k'ibiyaga bigari : Ikinyarwanda, ikirundi, ikinyamulenge, ikigande, icyongereza n'igiswahili! Niba ururimi rw'ikinyarwanda rushobora kuzimira burundu mu mpera z'iki kinyejana nk'uko UNESCO ibivuga, Paul Kagame azahabwa umudali wo gusenya ururimi rw'ikinyarwanda n'umuco nyarwanda kimwe no gusiba u Rwanda ku ikarita y'isi kuko kugirango u Rwanda rubeho ni uko rugomba kuba rufite ururimi n'umuco biruranga!

Dore urugero rw'ururimi ruvugwa muri iki gihe mu Rwanda:

Uru rugero rwasohotse ku mbuga nkoranyambaga rwerekana uko abayobozi ba leta ya Kagame bavuga urwo rurimi rushya rw'ikinyangele: "Bagezwaho ishuzi bakazasesinga, bagasanga ari porobulemu zikomeye bagomba kudilinga binyuze muri mobilayizeshoni. Bagahita binfominga izindi nzego bahereye kuri meya na gavana. Invesitigeshoni zigakorwa ubundi ripoti ikaba sheyadi kubo bireba, bagahita binshuwaringa otoritizi ko iyo kese yabaye sovudi ahanini babikesheje kopareshoni buri wese yamanifesitinze"

Igiteye impungenge n'agahinda ni uko n'itangazamakuru ryo mu Rwanda rikoresha urwo rurimi rushya! Urwego rushinzwe umuco rwa leta ya Kagame rwavuze ko ubu rwatangiye ibikorwa byo kwigisha abanyamahanga ururimi rw'ikinyarwanda ngo rubinyujije muri z'ambasade z'u Rwanda ziri mu bihugu binyuranye! None se icyo kinyarwanda bigisha abanyamahanga kandi abanyarwanda ubwabo batakivuga ni kinyarwanda bwoko ki?

Veritasinfo