Siriya: Igitero Turikiya yagabye kubarwanyi ba YPG cyatumye Amerika igwa mu gihirahiro!

Publié le 22 janvier 2018 par veritas

Ingabo za Turukiya zinjira muri Siriya kurwanya abakurudi ba YPG

Mu ntambara ibihugu by'iburayi birangajwe imbere n'igihugu cya Leta zunze ubumwe z'Amerika birwana na leta y'intagondwa z'abayisilamu (EI) mu gihugu cya Siriya yahinduye isura! Umutwe w'abakurudi wa YPG wahawe intwaro zikomeye n'abanyamerika ndetse n'abafaransa kugirango ufashe ibyo bihugu kurwanya intagorwa za kisilamu muri Siriya, wagabweho ibitero bikomeye n'igihugu cya Turikiya nacyo gifatanyije n'Amerika ndetse n'ibihugu by'uburayi mu kurwanya ibyihebe! Icyo gitero cya Turikiya ku mutwe ushyigikiwe n'abanyamerika n'abafaransa cyateye urujijo rukomeye ku migendekere y'urugamba rw'Amerika mu kurwanya ibyihebe byo muri Siriya!

Turikiya, Amerika n'Ubufaransa bihuriye mu muryango umwe wo gutabarana wa OTAN, ibyo bihugu kandi bikaba bihuriye ku rugamba rumwe rwo kurwanya umutwe w'ibyihebe bya kisilamu wayogoje ibihugu bya Siriya na Irak. Mu ngamba ibihugu by'Amerika n'Ubufaransa byafashe ni uko ibyo bihugu byanze kohereza abasilikare babyo kujya kurwana muri Siriya ahubwo biha intwaro imitwe itavuga rumwe n'ubutegetsi bwa Perezida Assad wa Siriya kugirango abarwanyi b'iyo mitwe abe aribo bakora akazi ko kurwanya ibyihebe bya kisilamu (EI). Umwe mu mitwe ikomeye Abanyamerika n'abafaransa bahaye intwaro zikomeye muri Siriya kugirango barwanye izo ntagondwa ni abaturage bo mu bwoko bwa nyamuke b'abakurudi bibumbiye mu mutwe wa YPG.

Ikibazo gikomeye cyane, ni uko abo barwanyi bo mu mutwe wa YPG ari abanzi bakomeye b'igihugu cya Turikiya nacyo gifitanye ubushuti bukomeye n'Amerika ndetse n'abafaransa! Kugirango Amerika n'abafaransa bagire agace bigarurira muri Siriya bityo babone uko bashyira igitutu kuri Perezida Assad wa Siriya ndetse n'abarusiya bamushyigikiye, Amerika n'Ubufaransa bafashe icyemezo cyo gushyiraho umutwe w'abarwanyi bafite ingabo zirenga ibihumbi 30 zigomba kwigarurira igice cy'ubutaka bwo mu majyaruguru ya Siriya gihana imbibi n'igihugu cya Turukiya! Amerika n'Ubufaransa bikaba byarashatse ko ingabo zigomba kugira uwo mutwe zigomba kuva mu ba kurudi bibumbiye mu mutwe wa YPG bitewe nuko bagaragaje ubutwari mu mirwano inyuranye yo kurwanya intagondwa zo muri EI.

Ikibazo gikomeye ni uko abo barwanyi bo muri YPG igihugu cya Turukiya kibanga urunuka ndetse kikaba kivuga ko ari ibyihebe kigomba kurwanya! Kugirango Amerika n'abafaransa badashyiraho ingabo zirimo abo barwanyi, perezida wa Turukiya yahise atanga itegeko ryo kugaba igitero ku mutwe wa YPG uri muri Siriya! Turikiya ikaba ifite umugambi wo kwigarurira ubutaka bwo muri Siriya bungana n'ibilometero 30 kugirango ibwirukaneho abo barwanyi ba YPG. Kuwa gatandatu taliki ya 20 Mutarama 2018 saa tanu z'amanywa ku isaha ya Turikiya nibwo ingabo z'icyo gihugu zinjiye ku butaka bwa Siriya zigabye igitero kuri YPG. Ingabo za Turikiya zinjiranye intwaro zikomeye zirimo amatanki manini y'intambara arenga 30 ndetse n'indege z'intambara zirenga 32!

Ejo ku cyumweru hakaba harabaye imirwano ikaze yahuje abarwanyi ba YPG n'ingabo za Turukiya ku butaka bwa Siriya. Turikiya ikaba yemeza ko yasenye ububiko 45 bw'intwaro z'uwo mutwe. Umuryango w'abatabazi bigenga muri Siriya wemeza ko iyo mirwano yahitanye abaturage 18 harimo n'abana. Turikiya yemerako abo barwanyi basenye ibimodoka byayo bikomeye by'intambara 2 ndetse bakarasa n'ibisasu bikomeye mu mijyi ya Turukiya yegereye umupaka wayo na Siriya. Mu minsi 2 bamaze barwana Turukiya ikaba yemeza ko imaze gufata ahantu hangana n'ibilometero 5. Perezida wa Turukiya akaba asaba Imana ko iyo mirwano yarangira vuba agashobora gutsinda abanzi be bo mu mutwe wa YPG kandi mu gihe gito!

Ingabo z'Uburusiya zari mu karere k'amajyaruguru ya Siriya zahise zihava kugirango Turikiya ibone urubuga rwo gusenya umutwe wa YPG ushyigikiwe n'abanyamerika n'abafaransa! Ministre w'ingabo z'Amerika Mattis yabuze ayo acira n'ayo amira kuko akeneye kubana neza n'igihugu cya Turukiya kandi abarwanyi ba YPG nabo bagakomeza gufatanya, yasabye Turikiya guhagarika ibitero byayo kuri uwo mutwe ariko akaba yabwiye Turikiya ko igikorwa cyo kurwanya YPG gifite ishingiro, iyo mvugo ikaba yuzuye urujijo! Ministre w'ingabo w'igihugu cy'Ubufaransa Florence Parly yagaragaje impungenge z'uko abo barwanyi ba YPG bashobora kutazongera kugirira ikizere abanyamerika n'abafaransa, igihugu cy'Ubufaransa kikaba cyasabye ko akanama ka Loni gashinzwe umutekano ku isi gaterana mu muhezo kagasuzuma ikibazo cy'ibitero bya Turukiya kuri YPG! Perezida wa Turukiya yavuze ko umuturage wese uragaragaza ko atishimiye ibitero Turikiya iri kugaba kuba kurudi ba YPG, afatwa nk'umwanzi w'igihugu!

Uwavuga ko intambara abanyamerika n'abafaransa barwana muri Siriya yababereye nka wa munara wa babeli ntabwo yaba abeshye!

Veritasinfo