Rwanda: Paul Kagame azi kujijisha, amakosaye akayagereka ku bandi maze bagakoma amashyi!
Amahanga azaze kwigira mu Rwanda uko abakene babaho bakitwa abakire!
Kuri uyu wa kane taliki ya 14 Ukuboza 2017, Paul Kagame yatangije kongere y'umuryango wa FPR-Kagame! Mu ijambo yabwiye intore zari zakereye kumutega amatwi, yavuze ko zirirwa zisetsa rubanda zibabwira ko u Rwanda rwateye imbere cyane kuburyo amahanga aza kurwigiraho! Kagame akaba yabujije izo ntore ze kuzongera gukoresha iyo mvugo kuko ntaterambere bafite barata amahanga aza kubigiraho!
Iyi mvugo ya Kagame ikaba igaragaza ko we nk'intore izirusha intambwe azi kujijisha bikomeye! Kagame afata amakosa ye akayagereka kubantu bose kugira ngo abacishe bugufi maze bigaragare ko ariwe mushishozi wenyine kandi w'umunyakuri kandi bizwi neza ko ari "Semuhanuka". Mbere y'uko arangiza manda ye yo kuba perezida wemewe n'itegeko nshinga muri Kanama 2017, Paul Kagame yabwiye abanyarwanda n'amahanga ko yiyongeje indi manda y'imyaka 7 kubera ibikorwa by'indashyikirwa yagejeje ku gihugu! None uyu munsi Kagame ari kuvuga ko intore ze zibeshya ko u Rwanda rwageze ku bikorwa by'iterambere kandi ntabyo! Iyi mvugo ya Kagame ivuguruzanya igaragara ku muntu wigira "nyononyinshi", agamije kuyobya uburari no gutera urujijo mu bantu! None se Kagame we ibikorwa byatumye yiyongeza manda yagejeje ku banyarwanda ni ibihe?
Paul Kagame afite uburwayi bwo "kwikunda cyane (cynisme)", Kagame atinyutse kuvuga ko u Rwanda ntabikorwa by'agatangaza rwagezeho nyuma yaho afashe ubutegetsi ku ngufu ngo abitewe n'uko u Rwanda rwabaye Singapulu y'Afurika! Bitewe nuko ibikorwa aribyo byivugira, Paul Kagame amaze kubona ko u Rwanda rugeze habi, abaturage inzara igiye kubamara, abakozi batagihembwa, ateye indirimbo yo kuvuga ko ntacyo u Rwanda rurageraho kandi agaya abirirwa birata ko amahanga aza kubigiraho! Ibyo Kagame akaba abivuze kugira ngo agaragare nk'umunyakuri wenyine washoboye kuvugisha ukuri, bityo ibinyoma byose leta ye ibeshya ko yateje u Rwanda imbere bigerekwe ku bandi !
Ikizwi kandi kidashidikanywaho ni uko ibyaha byose Kagame akora azajya abigereka ku ntore ze maze akazivuna, nyuma agasobanurira abanyarwanda n'amahanga ko abo bose yabahoye amakosa yabo! None se ko Kagame yivugiye ku mugaragaro ko abanyarwanda atazabanyereza gusa, ko ahubwo azajya abarasa ku manywa y'ihangu, yatsinyutse kubwira HRW yatanze raporo y'abanyarwanda barashwe ku manywa yihangu kandi bizwi neza ko iryo tegeko ariwe waritanze? Kagame yararuciye ararumira, nyamara, igihe nikigera ngo Kagame abibazwe kumugaragaro, azavuga ko ibyo bikorwa byose bibi yabyamaganiye kumugaragaro, ko ababikoze aribo babibazwa, ko we ari umwere! Ba nyoninyinshi baragwira!
Veritasinfo