Ikinyamakuru “The Economist” kiremeza ko Paul Kagame yiyemeje kugundira ubutegetsi ubuziraherezo mu Rwanda kugeza mu mwaka w’2034!

Publié le 1 août 2017 par veritas

Niba abaturage bafite ubwoba nta terambere riri mu gihugu!

Ikinyamakuru “The Economist” cyashyize k’urubuga rwa“youtube”amashusho (vidéo) rugaragazamo insanganyamatsiko ivugako Paul Kagame Perezida w’u Rwanda yiyemeje kugundira ubutegetsi ku ngufu kugeza mu mwaka w’2034. Iyo nsanganyamatsiko ikaba imara iminota igera kuri 4; icyo kinyamakuru kikaba kibaza impamvu Paul Kagame yahahamuye abaturage ayoboye kandi bigaragara ko kuva Kagame yaba Perezida nyuma y’amahano y’ubwicanyi cyari kivuyemo (carnage) cyarakomeje kugaragaramo umutuzo! Mu ncamacye, dore ubutumwa ikinyamakuru “the Economist” gitambutsa muri ayo mashusho (video):

Ikinyamakuru “the Economist” kiragira kiti: “Uyu mugabo (Paul Kagame) yahawe ibisingizo byinshi cyane ngo kuko yahinduye u Rwanda paradizo mu gihe gito. Igihugu cy’u Rwanda akaba ari kimwe mu bihugu biri gutera imbere ku isi, ko Paul Kagame yaciye ruswa itangirwa ku karubanda, agakurura abashoramari b’abanyamahanga kandi akagabanya igipimo cy’ubukene”. Iki kinyamakuru ariko kikibaza kiti: “Ni mpamvu ki Kagame yaba ashimirwa ubwo butwari bwose ariko akabirengaho agahahamura abaturage ayobora?”

Ikinyamakuru “The Economist” gikomeza kivuga ko Kagame yageze ku butegetsi mu mwaka w’1994 ubwo inyeshyamba yari ayoboye za FPR Inkotanyi zari zimaze guhirika guverinoma yashyize mu bikorwa genocide yahitanye ½ cya miliyoni y’abantu; abenshi mubishwe, bakaba bari abatutsi ndetse n’abahutu batari intagondwa (modérés). Icyo kinyamakuru cyahaye ijambo inararibonye muri politiki y’u Rwanda Bwana Faustin Twagiramungu alias Rukokoma. Twagiramungu yagize ati: “Icyo nibuka muri icyo gihe, ni uko byari ibihe bikomeye kandi byababaje abanyarwanda kuko twabuze abantu benshi, njye ubwanjye nabuze abantu barenga 30, barimo bakuru banjye na bashiki banjye, babyara banjye n’abandi”.

Ikinyamakuru “The Economist” gikomeza kivuga ko Paul Kagame ari uwo mu bwoko bw’abatutsi, akaba n’umuyobozi wa FPR-Inkotanyi. Uwo mutwe wa FPR ukaba warakoze uko ushoboye ngo amahoro aboneke mu Rwanda n’ubwo utahwemye gushoza intambara mu gihugu cy’abaturanyi cya Congo. “The Economist” yahaye ijambo Paul COLLIER, umwarimu wigisha iby’ubukungu muri kaminuza ya Oxford, Collier yagize ati “Kagame ni umuntu woroshya ibintu, ndatekereza ko ibigwi Kagame yagize myaka ya za 1990 ni uburyo yagabanyije ubukene bwa rubanda, bigaragara nk’ibintu bidasanzwe muri afrika”.

Ikinyamakuru “The economist” gikomeza kigira kiti: “Mu gihe cyose Kagame amaze ku butegetsi,igipimo cy’ubukungu kiyongereyeho 8% kuva mu mwaka w’2000 kandi u Rwanda ari igihugu gito cyane kandi kidakora ku nyanja. Inzu irabagirana yiswe “Kigali Convention Center” yatwaye akayabo ka miliyoni 300 z’amadolari yubatse muri Kigali igaragaza icyerekezo cya Kagame mu majyambere y’u Rwanda. Biragaragara ko Kagame ashaka guhindura u Rwanda Singapoor ya Afrika, bigatuma bamwe mu mpuguke mu by’ubukungu babyita igitangaza cy’u Rwanda”!

Nubwo bimeze gutyo ariko, uwahoze ari ministre w’intebe mu Rwanda, muri iki gihe akaba aba mu buhungiro mu gihugu cy’Ububiligi, avuga ko imiyoborere ya Kagame ishingiye ku gitugu no gupfinagaza rubanda. Bwana Faustin Twagiramungu abivuga muri aya magambo: “Nta burenganzira bwo kuvuga icyo wifuza buri mu Rwanda, umuntu agomba gusingiza ubuyobozi cyangwa agahunga, ariko kubujora byo ntibishoboka! Umuntu iyo abivuze ukundi baramubwira bati “niba utifatanyije na Kagame, ibyawe birarangiye”! The Economist ikomeza ivuga ko mu mwaka w’2003, Twagiramungu yahanganye na Kagame mu kwiyamamariza kuba perezida w’igihugu, bikaba byaragaragaye ko ari we wenyine wari uhanganye nawe nk’umunyepolitiki utemera ubutegetsi bwe(opposant).

Kubyerekeranye n’ayo matora, Twagiramungu akaba yarayabwiye “The Economist” muri aya magambo, yagize ati: “Mu ntara navukiyemo nahabonye amajwi 0,06% muri rusange nkaba naragize amajwi 3%!”. The Economist isobanura ko muri icyo gihe Kagame yagize amajwi 95%, the Economist ikaba ihamya ko Twagiramungu atari we wenyine wavuze ko intsinzi za Kagame ziba zivuye mu kumwibira amajwi mu matora”. Twagiramungu akaba yarabwiye The Economist ko we akeka ko Kagame muri aya matora y’2017 azagira amajwi nka 97% cyangwa 98%, bigaragaza intsinzi idasanzwe! Twagiramungu yongereyeho ati: “Kuri njye kuba kure y’igihugu cyanjye byarampinduye mu mikorere yanjye ya politiki et sur le plan psychologique (no mu mitekerereze). Njye mpora ntekereza buri gihe ku gihugu cyanjye, cyane cyane kubera n’imyaka mfite. Ndumva ngomba kuba mu gihugu cyanjye mu bwisanzure ».

The Economist iti : «Havugwa ko hari amashyaka ya opposition mu Rwanda ariko mu by’ukuri, u Rwanda n’igihugu kiyobowe n’ishyaka rimwe, kandi benshi mu batavuga rumwe na leta bahora binubira ko baburabuzwa, bafungwa cyangwa bakicwa. Kagame ubona ko ashaka kuguma kubuyobozi bw’igihugu no kugeza mu bihe bizaza». Mu mwaka w’2015, ishyaka rye ryahinduye itegeko nshinga, bityo yemererwa kuba yayobora kugeza muri 2034. Mu gihe Kagame w’imyaka 59 ibigaragara ku maso ko ayobora igihugu gisa n’igitekanye, ibihugu bikomeye ku isi bisa naho bibyishimiye. Ni muri urwo rwego, Paul COLLIER wo muri Kaminuza ya Oxford agira ati : “Rimwe na rimwe ubuyobozi bw’igihugu bwihariwe n’umuntu umwe bugira akamaro mu kugabanya byihuse ubukene bwa rubanda, ariko kandi demukarasi nayo irabugabanya. Ibihugu biratandukanye, icyo tuzi twese ni uko nta demukarasi yumvywa kimwe n’abantu bose ibaho”.

The Economist ikomeza ivuga ko abanyamakuru b’abanyamahanga bashobora gusura u Rwanda ariko ibinyamakuru by’imbere mu gihugu ntibitinyuka kujora ubutegetsi. Kuri iyo ngingo Twagiramungu yongeraho ko abanyamakuru bagomba kwandika ibishimisha abategetsi, ati :”ariko icyo dushaka bwa mbere ni ubwisanzure na demukarasi mu gihugu cyacu. Kagame ntiyaguze u Rwanda, u Rwanda ni urwacu”. Ikinyamakuru the Economist gisoza kivuga kiti “U Rwanda rushobora kuba rutekanye kandi rwiyubashye, ariko niba ibyo biterwa n’ubwoba buri mu baturage, nta byishimo, nta majyambere, nta n’amahoro arambye arurimo”.

Me KUBWIMANA Jacques