Rwanda : Umuryango w’Amnesty uramagana umwuka w’ubwoba ugaragara mu gihugu mbere y’uko itora ry’umukuru w’igihugu riba!

Publié le 7 juillet 2017 par veritas

Amatora yo mu Rwanda arangwa n'icuraburindi

Hashize imyaka irenga 20 abanyepolitiki batavuga rumwe n’ubutegetsi mu Rwanda bahohoterwa buri munsi kandi iryo hohoterwa rikagera no kubanyamakuru ndetse n’abari mu mashyirahamwe arengera uburenganzira bw’ikiremwamuntu. Iryo hohotera rihoraho, ryatumye abanyarwanda babaho mu buzima burangwa n’ubwoba, uwo mwuka w’ubwoba ukaba wararushijeho gukaza umurego muri ibi bihe mu Rwanda hategurwa itora ry’umukuru w’igihugu riteganyijwe ku italiki ya 4 Kanama uyu mwaka ! Umuryango mpuzamahanga uharanira uburenganzira bwa muntu « Amnesty International »ukaba wamagana uwo mwuka mubi w’ubwoba wakwijwe mu banyarwanda mu itangazo wasohoye kuri uyu wa kane taliki ya 6 Nyakanga 2017.

Tugenekereje mu rurimi rw’ikinyarwanda, iyo raporo yasohowe n’Amnesty international, yayihaye umutwe ugira uti : «u Rwanda : igihugu kirangwa n’ibitero, ihohoterwa ry’abatavuga rumwe n’ubutegetsi n’ubwicanyi mu gihe cy’imyaka 20, kigiye gutora umukuru w’igihugu mushya ». Iyo raporo ikaba igizwe n’amapaji 30, ikaba isobanura kuburyo burambuye ibikorwa bibangamiye uburenganzira bwo kuvuga icyo utekereza, ihohoterwa ry’abanyamakuru, abanyepolitiki n’abashinzwe uburenganzira bw’ikiremwamuntu guhera mu mwaka w’1995 ; nyuma y’umwaka umwe gusa FPR iyobowe na Paul Kagame wigize umukuru w’igihugu, ifashe ubutegetsi mu Rwanda.

Amnesty International igira iti : «abo bose barafunzwe, bakorerwa ibikorwa by’iyica rubozo, babahitishamo guhunga igihugu cyangwa se guceceka, abandi baricwa». Nk’uko Amnesty ibivuga, abahoze ari inyeshyamba z’abatutsi zo muri FPR zirukanye k’ubutegetsi mu kwezi kwa Nyakanga 1994 ubutegetsi bwa leta y’abahutu, zihagarika jenoside yahitanye abantu barenga ibihumbi 800000, iyo jenoside ikaba yaribasiye abatutsi, ikaba yaramaze amezi 3. Amnesty International ikomeza igira iti:«kuva icyo gihe, ibinyacumi bibiri birashize, abanyepolitiki batavuga rumwe n’ubutegetsi bahigwa kimwe n’abanyamakuru n’abashinzwe kurengera uburenganzira bw’ikiremwamuntu; iyo migirire ikaba yarashyize ubwoba buhoraho mu mitima y’abanyarwanda»; cyane cyane muri iki gihe hategurwa itora ry’umukuru w’igihugu mushya.

Amnesty International ikomeza igira iti : «Muri uwo mwuka w’ubwoba, ntabwo bitangaje ko abanenga ubutegetsi biheza mu mpaka za politiki cyane muri ibi bihe amatora yegereje, bityo impaka zishingiye kubitekerezo bya politiki binyuranye zikabura». Urugero Amnesty itanga muri iyo raporo rugaragaza impamvu yo kwiheza kw’abanyepolitiki batavuga rumwe n’ubutegetsi ni: iyicwa rya Jean Damascène Habarugira mu kwezi kwa gatanu uyu mwaka, akaba yari umuyoboke w’ishyaka rya FDU Inkingi, ishyaka leta yanze kwemera ko rikora ibikorwa bya politiki ku mugaragaro mu Rwanda. Hari kandi ishimutwa rya Madame Illuminée Iragena mu mwaka w’2016 nawe wari umuyoboke w’ishyaka rya FDU-Inkingi riyoborwa na Madame Victoire Ingabire nawe ufunze.

Muri iryo tangazo ryayo, Amnesty International iributsa ko abakandida ku mwanya wa perezida aribo Diane Rwigara na Philippe Mpayimana batangaje ko abantu babashyigikiwe hirya no hino mu gihugu, bagiye bahohoterwa bakanashyirwaho iterabwoba mu gihe bakiraga imikono y’abantu bari biyemeje gusinyira abakandida babo. Amnesty ivuga ko mu minsi micye cyane Diane Rwigara amaze gutangaza ko aziyamamariza umwanya w’umukuru w’igihugu; amafoto agaragaza ubwambure yitiriwe Diane Rwigara yakwijwe ku mbuga nkoranyambaga; ibyo bikaba byaragaragaje gahunda yo kumuharabika no gushaka kumutesha agaciro.

Abakandida 5 batavuga rumwe n’ubutegetsi harimo 4 bigenga nibo bagaragaje ubushake bwo kwiyamamaza kugira ngo bahangane na perezida uriho ucyuye igihe; Uwo mu perezida akaba yaremerewe kwiyamamaza bwa gatatu nyuma yo guhindura itegeko nshinga kuburyo butavugwaho rumwe na benshi. Mucyumweru gishize, komisiyo y’igihugu ishinzwe amatora (NEC) yemeje kandidature ya Paul Kagame n’iya Frank Habineza, umuyobozi w’ishyaka ry’Ibidukikije ari naryo shyaka ryonyine ritavuga rumwe n’ubutegetsi ryemerewe gutanga umukandida! Ariko iyo komisiye yanze kandidatire z’abakandida bigenga isobanura ko zituzuye. Komisiyo y’amatora ikaba yarahaye abo bakandida iminsi 5 yo kuzuza dosiye zabo .Kuri uyu wa gatanu taliki ya 07 Nyakanga akaba aribwo urutonde ndakuka rw’abakandida bemewe rwatangajwe!

Abakandida bemerewe na NEC kwiyamamaza ni Paul Kagame, Frank Habineza na Philippe Mpayimana! Abasesengura politiki yo mu Rwanda bakaba basanga Kagame yatinye guhangana n’abakandida bafite imbaraga barimo Diane Rwigara na Mwenedata. Amnesty ikaba isaba leta y’u Rwanda guhagarika vuba na bwangu ibikorwa byose byo guhohotera abakandida batavuga rumwe na leta kimwe n’abayoboke babo kandi leta igafungura urubuga rwa politiki kuburyo budasubirwaho mbere y’itora ryo mu mwaka w’2024!

Kanda aha usome iyi raporo kuburyo burambuye mu rurimi rw'igifaransa

Source : AFP