Rwanda –Burundi : «Petero Nkurunziza abereyeho kwirirwa yica abantu kuva mu gitondo kugera ku mugoroba» (Paul Kagame)!

Publié le 8 novembre 2015 par veritas

Burya Kagame yasekeraga Nkurunziza naho mu mutima rusibana!

Bisanzwe bizwi ko «akuzuye umutima gasesekara ku munwa», ariko ku buryo bw’umwihariko Paul Kagame akaba ari umuntu ukunda kurata ubutwari bwe iyo amaze kubona ko ari hafi yo kugera ku ntego y’imigambi ye yo kwikiza umwanzi! Kuri uyu wa gatanu taliki ya 06/11/2015, Paul Kagame yagejeje ijambo kubagaragu be bakuru n’abafasha babo kimwe n’abahoze ari abagaragu bakuru ariko yambuye ubutoni bagakomeza kumugaragariza ko bakimukomeyeho; abo bose bakaba bibumbiye mucyo bise «unity club». Mu ijambo rye, Kagame yabahishuriye ko ariwe uri kuvugurura itegeko nshinga, ko batagomba kuvuga Imana ko ahubwo ariwe bagomba kuvuga, ko abajenosideri babariwe bityo abanyepolitiki bakaba batagomba gutaka ko abahohotera, ariko yumvikanisha cyane impamvu afitiye urwango rukomeye Petero Nkurunziza perezida w’u Burundi, imbere y’abo baturage Paul Kagame akaba yarandagaje kuburyo budasubirwaho Perezida w’u Burundi n’abayobozi b’icyo gihugu !

Imbere y’inkomamashyi z’abayobozi b’intore bibumbiye muri « unity Club » Paul Kagame yariniguye, yeranako ko ari rudasumbwa muri Afurika,yereka intore ze ko Afurika ibeshejweho na serumu (umushahara w’intica ntukize) ihabwa n’abazungu ariko iyo mibereho ikaba iterwa n’uko Afurika iyoborwa n’abayobozi babi, ashaka kumvikanisha ko ariwe mwiza muri Afurika yose! Paul Kagame yahise atanga urugero rw’igihugu cy’u Burundi aho yashinje kumugaragaro Perezida Nkurunziza icyaha cyo kwica abaturage be ayoboye, ndetse avuga ko abifashwamo n’abayobozi bose b’u Burundi abenshi muribo baje gutema abanyarwanda muri jenoside yo mu mwaka w’1994 !

Amagambo Paul Kagame yavuze kuri perezida w’u Burundi n’abayobozi b’icyo gihugu yanyuze kuri radiyo Rwanda na televiziyo y’u Rwanda mu rurimi rw’ikinyarwanda, ibyo bitangazamakuru byombi bikaba byumvikana mu gihugu cy’u Burundi mu rurimi abaturage bose b’abarundi bumva! Usibye kandi no kuba iryo jambo ryaranyuze kuri ibyo bitangazamakuru, Paul Kagame nka Perezida w’igihugu cy’u Rwanda, yandaritse perezida n’ubutegetsi bw’ikindi gihugu imbere y’abaturage b’igihugu cye ayobora ! Mu mibanire y’ibihugu, ijambo Paul Kagame yavuze kubayobozi b’i Burundi rikaba rifite uburemere bungana n’ubw’igitero cya gisilikare k’u Burundi! Ijambo Paul Kagame yavuze ryandagaza perezida w’u Burundi na leta ye, riramutse rivuzwe n’ambasaderi (aho yarivugira hose) ahita yirukanwa muri icyo gihugu ; ariko noneho kuba ryavuzwe na perezida bivuga ko umubano w’ibihugu byombi ushingiye kuri z’ambasade uhita uhagarara !

Ikibazo abantu bakomeje kwibaza badafitiye igisubizo ni ukumenya impamvu Paul Kagame yiyemeje kwandarika kumugaragaro Perezida w’u Burundi n’abayobozi bicyo gihugu kandi ibihugu byombi bigifite umubano ushingiye kuri z’ambasade ! Veritasinfo yashoboye kubaza abanyepolitiki b’abarundi icyo babitekerezaho, bamwe basubije ko Kagame yavuze ririya jambo bitewe ni uko azi neza ko muri iki gihe u Burundi yamaze kubufata, akaba azi neza ko leta ya Nkurunziza idashobora gufata icyemezo cyo guhagarika umubano wayo n’u Rwanda. Abandi banyepolitiki b’abarundi bakavuga ko Kagame yaharabitse Nkurunziza mu itangazamakuru no mu rurimi abarundi bumva kugira ngo abarundi bose bumve ko Nkurunziza na let aye ntabayobozi babarimo maze babivumbureho, muri macye Kagame akaba ahamagarira abarundi kurwanya Nkurunziza kuko ntamuyobozi umurimo ! Ibyo aribyo byose amateka azatwereka ko ibyo aba banyepolitiki b’abarundi bavuga ari ukuri cyangwa se atari ukuri ! Dore kuburyo burambuye uko Paul Kagame yandagaje Nkurunziza n’ubuyobozi bwe ; Kagame yagize ati :

[«Reba ibihugu bimwe bidukikije, i Burundi serumu barayifunze cyangwa bariho barayifunga, ariko se biturutse kuki ? Ku mateka ajya gusa n’ayahano! Ubuyobozi bwaberaho kwirirwa bwica abantu kuva mu gitondo kugeza kumugoroba ! Perezida akifungirana aho yifungiranye, ntawe uzi aho aba, ntawe umuvugisha. Ayobora ate abantu ? Abantu bagapfa bakirirwa bakurura imirambo ku sitiki ; nibyo Afurika isanzwe kuri serumu, abantu bashobora kumva ko nakoze n’ishyano ngo navuze ikindi gihugu kiri aho ngaho, iyo nayo ngo ni diplomasi cyangwa politike, niko bimeze naniko bidufiteho ingaruka twebwe nk’abanyarwanda!

Ubuyobozi bukirirwa bwica abantu, imirambo itemba mu nzuzi, abantu bari ku mihanda, abana, abato, abagore, warangiza ukajya kubigira politike ! Politike nyabaki ! Uteye u Burundi ibibazo nk’ibyo yaturutsehe ? Hari undi muntu wagiye kubatera ibyo bibazo ? N’uwaba akwifuriza inabi ahera kumafuti yawe! N’ubwo byaba ari ahandi bituruka biriya byo mubaturanyi b’i Burundi, n’uwavuga ngo ni u Rwanda rubitera ; mu Rwanda umuntu w’umugome wifuriza inabi abarundi agomba kuba yarahereye ku bubi bw’abarundi.

Yahereye kubayobozi babi b’i Burundi bakorera nabi abantu babo, wenda nawe abijyamo ; ariko ikibazo ni icy’abantu ubwabo, bari bakwiye kuba barize isomo kubyabaye hano bamwe bagizemo uruhare, mubatemye abantu harimo abavuye hariya hakurya y’umupaka ! Abanyafurika rero turwaye iki ? Ariko nkuko nabibabwiye mbere yo kurwana kuri interesi z’Afurika cyangwa akarere, tubanze turwane kunyungu zacu ; abanyarwanda tubanze dukumire ikibi, kitazadusubiramo ! Twakoze ishyano bihagije, ntabwo twakwemera ko hagira urigarura hano. Uwo mu perezida mvuga, n’abayobozi b’i Burundi bose biyita ko bemera Imana, ari abantu b’Imana, ndetse bamwe ni abapasteri! Imana bemera ni iyihe ? Hee ! Bakora ibyo biyita ko ari n’abantu bemera Imana bafite za Bibiliya birirwa bagendana, hari ahantu bibiliya iyo ariyo yose, yabwira abayobozi kwica abantu babo bibaho ?… »]

Iryo niryo jambo Paul Kagame yavuze kuri perezida w’u Burundi n’abayobozi b’icyo gihugu, buri wese ashobora kurisesengura uko abyumva ariko ikigaragara cyo ni uko iri jambo riteye urujijo n’ubwo Paul Kagame we ashaka kumvikanisha ko yavuze ukuri kose afite ku mutima, kucyo atekereza kuri perezida w’u Burundi n’abayobozi babwo ! Paul Kagame avuga ko abanyarwanda bica abaturage i Burundi bafatanya n’abayobozi babi b’u Burundi.

None se ko Paul Kagame ashinja kumugaragaro Nkurunziza kwica abaturage be, Paul Kagame arashaka kutwumvisha ko afatanyije na Nkurunziza kwica abarundi ? Ni abahe bayobozi babi bandi b’abarundi Paul Kagame afatanyije nabo kugirira nabi abarundi ? Iyi mvugo ya Kagame yuzuyemo urujijo rwinshi, tukaba duhaye urubuga abasomyi ba veritasinfo ngo batubwire uko bumva abo bayobozi b’abarundi Paul afatanyije nabo mukugirira nabi abarundi !

Imana ibe hafi y’abanyarwanda n’abarundi kuko bigaragara ko ishyamba atari ryeru hagati y’ibihugu byombi.

Kanda aha wumve uko Kagame yandagaje perezida w’u Burundi n’abayobozi b’icyo gihugu!