Rwanda: Kugereranya Kagame na Yezu Christu birasura ibyago bikomeye by’intambara ku gihugu !

Publié le 3 juin 2015 par veritas

Bisaba kuba umurwayi wujuje ibyangombwa kugirango ngo ugereranye Yezu n'umwicanyi Ruharwa!

[Ndlr : Habayeho umugabo witwaga Semuhanuka, akaba yari azi kubeshya cyane, abyara umuhungu amwita Muhanuka, umunsi umwe bari mu gitaramo umuhungu wa Semuhanuka yarasohotse yikoza hanze asubira mu nzu, akinjira yahise akoma akaruru abwira abari mu nzu bose ko asohotse akajya hanze akinanura agakoza umutwe ku ijuru ! Umubyeyi we Semuhanuka yahise yumirwa ! Afata akaboko Muhanuka ajyana hanze aramubwira ati «mwana wanjye urajye ubeshya ibindi ariko bene icyo kinyoma kiranyagisha ! » Muri iki gihe mu Rwanda naho hateye Semuhanuka witwa Paul Kagame ariko akaba yaribyayemo na ba Muhanuka benshi ! Ngaho namwe nimumbwire uko mu bibona : Abagororwa bakatiwe gufungwa burundu barihanukiriye babwira Gahongayire ushinzwe kubarinda, ngo bamutumye kuri Kagame ko niba adakomeje kuba perezida mu mwaka w’2017 ngo bazemera bakagwa mu munyururu !!! Kagame yabaye Semuhanuka cyane abeshya kuri manda ashaka guhindura ngo yigundirize kubutegetsi ubuziraherezo none abanyarwanda nabo bamubereye ba Muhanuka kugeza ubwo bamubwira ko ameze nka Yezu Christu nawe akabyemera!! Ni mwisomere iyi nkuru murabona ingero nyinshi zitwereka ba Muhanuka] :

Muri iyi minsi mu Rwanda inkuru ivugwa cyane kurusha izindi haba mu binyamakuru bya Leta cyangwa ibyingenga ni injyanye n’ingingo y’101 y’itegeko-nshinga nuko yakurwaho Kagame akazakomeza kuba Perezida nako umwami w’u Rwanda ubuziraherezo kugeza gupfa. Twabibutsa ko iyo ngingo 101 igira iti: "Perezida wa repubulika atorerwa manda y’imyaka irindwi, ashobora kongera gutorerwa incuro imwe. Nta na rimwe umuntu yemererwa gutorerwa manda zirenze ebyiri ku mwanya wa perezida wa repubulika. "

Nk’uko mubizi itegeko-nshinga ririho mu Rwanda ni iryashyizweho na FPR mu mwaka w’2003 nyuma yo gusesa amasezerano y’Arusha yo mu mwaka w’1993 no gufata ubutegetsi ku ngufu mu mivu y’amaraso. FPR ishyiraho iriya ngingo ikaba yari itari yizera neza ubutegetsi akaba ari nayo mpamvu yadadiye iriya ngingo. Ubu none FPR ikaba imaze kubona ko yihagitse igihato ikeka ko ari umutego kuri mukeba none uwo mutego ukaba ariyo ugiye gushibukana (FPR) ndetse ubutegetsi bwayo bukazagenda nka nyomberi. Ibi kandi sinjye ubibona njyenyine gutya kuko byanze bikunze haba mbere y’umwaka w’2017 haba nyuma yaho, ku ruhembe rw'umuheto abanyarwanda bazavudukana buriya butegetsi bwa Kagame na FPR bwigize akari aha kajya he.

Mu gushaka guhaturura igihato, muzi ko FPR ifite abacurabinyoma bazobereye mu mwuga wo gutekinika. Ubu ikarita igezweho akaba ari ukuyobya uburari, FPR ibeshya amahanga ko abaturage miliyoni izi nizi bayibonamo ko ndetse bakoze za petitions basaba kagame kuguma ku butegetsi. Nyamara ntawe utayobewe ko FPR ijya mu baturage ikabatera ubwoba bagasinya ku ngufu ariko ku mutima wabo bayanga urunuka. Muri iyi nyandiko yacu mureke dusubize amaso inyuma twibukiranye uko byatangiye n’udushya tumaze kugaragara muri iri tekinika rya FPR.

Byatangiye gute?

1.Sheikh Mussa Fazzil Harelimana n’ishyaka rye PDI bo batangiye 2010

Mu mwaka wa 2010 nyuma gato y’amatora (nako ingirwamatora) yo muri manda ya Kagame ya kabiri Minisitiri w’ umutekano mu gihugu Bwana Sheikh Mussa Fazzil Harelimana wahawe akabyiniriro k’umuteruzi w’ibibindi kwa Kagame yarihanukiriye avuga ko Itegeko-nshinga rikwiye kuvugururwa kugirango ryo kuzazitira Kagame mu 2017. Ibi Musa Fazil akaba yarabitangaje ngo ashingiye kubyo Perezida w’ u Rwanda Paul Kagame ngo amaze kugeza ku banyarwanda, nta wundi ugaragara mu banyarwanda wayobora igihugu.

Bamwe bumvise aya magambo ya Fazzil mu 2010 hasigaye imyaka 7 yose benshi bamwise umusazi ndetse abandi bati akabaswayire ntikabura Fazzil arashyuhagujwe. Ku batazi uko ibinyoma no gutekinika bya FPR bikorwa ntibabonye ko ari iturufu ya FPR yo gutata no kuyobya uburari kugirango igihe nikigera bizabe byaramaze kwinjira mu mitwe y’abantu ko kagame agomba kwimikwa ubuziraherezo.

Uyu Musa Fazzil hamwe n’ishyaka rye PDI kandi bakomeje gusubira muri iyi ndirimbo iturutse ibukuru kandi bakayisubiramo kenshi gashoboka kugeza ndetse ubwo mu 2013 icyo kibazo cyongeye kugaruka.

2.Ubucabiranya no gufifika amategeko kwa Maitre Evode Uwizeyimana

Mu nama y’abaminisitiri yabaye kuwa 28/03/2014 Maitre Evode Uwizeyimana (uzwi ku kazina k’inkotsa yahawe na Kagame) yagizwe umuyobozi wungirije wa Komisiyo ishinzwe kuvugurura amategeko. Ako kazi ya hawe nta kindi kamaze uretse kuba umumotsi wo guhindura iyo ngingo ya 101 twavuze haruguru.

3.Umunsi w’abari n’abategarugori 2015: imbarutso y’inkubiri yo kwandika amabaruwa mu Nteko !

Tariki 08 Werurwe 2015 kuri stade ya Cyasemakamba mu karere ka Ngoma ahahoze perefegitura ya Kibungo, mu gihe hizihizwaga umunsi mpuzamahanga w’umugore ku rwego rw’igihugu niho Intore za FPR zatangiriye gusohora mu kanwa kazo ko nazo zunze mu ijwi rya Musa Fazzil. Uwavuze mu izina ry’abagore muri uyu muhango w’abagore yavuze ko bifuza ko Itegeko Nshinga rihindurwa Perezida Kagame akongera gutorerwa indi manda.

Guhera kuri uwo munsi w’abari n’abagore inkubiri ishyushye yo kwandikira inteko-ishinga amategeko yaratangiye ariko ifata umurego ukabije umunsi umwe nyuma y’icyunamo cyo kwibuka ku nshuro ya 21. Kw’ikubitiro habanje abacuruzi i Butaro (Rugengeri) bagera kuri 210 bandikiye inteko basaba ko itegeko nshinga rihinduka, Kagame agakomeza kuba Perezida. Hakurikiyeho itekinika mu bahinzi basanzwe n’abahinzi b’icyayi, abanyabukorikori, abakozi ba Leta nabo mu bigo byigenga, abanyeshuri.

Buri munsi Inteko Nshinga-mategeko ikaba yakira abaturage baturutse mu turere dutandukanye tw’igihugu bazanye ibiseke, amakarito ngo byuzuye inyandiko z’abaturage zisaba ihindurwa ry’iyo ngingo ya 101 twavuze haruguru.

Udushya dukomeye twagaragaye muri iri tekinika rya FPR mu guhindura ingingo ya 101 :

1.Gufata umuntu watukaga FPR ko ari agatsiko k'amabandi yitwaje intwaro ukaba ariwe ushinga kuvugurura amategeko birenze ikinyoma cyo gutekinika !

Mu bintu byatunguranye kandi bitumvikana ni ukuntu Maitre Evode Uwizeyimana wari uzwiho kunenga ubutegetsi bwa FPR akoresheje amaradiyo nka BBC n’ijwi ry’Amerika yavuye mu gihugu cya Kanada, agatahuka mu Rwanda ikubagahu ndetse agezeyo ubutegetsi bwa FPR bugahita bumugororera agashyirwa mu Kanama gashinzwe kuvugurura amategeko. Ku bazi uko FPR ikora itekinika bo ntibibitangaza: bazi ko iyo FPR igukeneye igufata ikagukoresha yarangiza ikakujugunya muri Rweru, filimi ikizinga.

Uyu Maitre Evode Uwizeyimana akaba yarigeze kuvuga ko ubutegetsi bwa FPR/ Kagame bwitwara nk’agatsiko k’amabandi yitwaje intwaro! Uwo Evode kandi niwe uyu munsi uri gukoreshwa muri ibi binyoma bya FPR byo gutekinika ngo arasobanura amategeko. Uretse ibyo kujishisha ngo arasobanura uyu Evode ararengwa akarahira ntatinye no kuvuga ko Kagame ari intwari kandi ko Kagame aramutse atabaye umukuru w’igihugu, ibintu byose mu Rwanda byasenyuka.

2.Bamwe mu baturage ngo bakwiyahura ngo kagame atiyamamaje.

Tariki ya 17/03/2015, umuturagekazi wo mu Murenge wa Muko mu Karere ka Musanze witwa Uwiragiye Emérence, yatangarije Ministre Kaboneka amutuma ko ngo no kwiyahura aziyahura niba Kagame adakomeje ngo abategeke.

3.Kagame ngo azigumire ku butegetsi kugeza Yesu/Yezu agarutse

Umwe mu baturagekazi wo mu karere ntibuka neza we yunzemo agira ati Kagame azigumireho kugeza Yezu agarutse.

4.Kugereranya Kagame n’impanga ya Yesu : bizakururira umuvumo mubi ku Rwanda

Umukecuru witwa Nyirabahutu Daphrose wo mu kagari ka Raranzige umurenge wa Rusenge mu karere ka Nyaruguru aherutse gupakirwamo itekinika arihanukira agereranya Kagame n’impanga ya Yesu, uwo mukecuru yagize ati: ’’...yaduhinduye icyaremwe gishya…’’ Amashitani aragwira ariko ayateye u Rwanda yo ntasanzwe ! Birababaje cyane kubona itekinika rya FPR rigeze aho bagereranya ishitani nzima Shefu Lusufero ariwe Kagame wamaze abantu ku misozi y’u Rwanda yica abahutu, abatutsi n’Abatwa bakamugereranya no kuba impanga na Yesu. Haragahazwe pe! Ntibyoroshye kandi u Rwanda rugeze kure.

5. Kagame asa nk’intumwa yoherejwe n’Imana:

Dr. Ntabomvura Venant uvugwa ko ari we wari uhagarariye abaturage bo mu Karere ka Gisagara nawe yakorewe ibya mfura mbi, aho itekinika rya FPR ritamwibagiwe ; uyu musaza Ntabomvura Venant yagereranyije ko Kagame asa nk’intumwa yoherejwe n’Imana. Akumiro karagwira pe!

Uyu umusaza Dr Venant Ntabonvura ku bamuzi niwe munyeshuri wa mbere winjiye muri kaminuza y’u Rwanda(UNR), bityo agafatwa nk’urumuri rwa mbere (Illuminatio et Salus Populi/urumuri n’agakiza bya rubanda) nk’uko intego ya Kaminuza y’u Rwanda ribivuga. Kumukoresha mu itekinika bamuvugisha amangambure, FPR ibifitemo inyungu cyane mu kumukoresha mu itekinika.

Kuyobya uburari kwa FPR Kagame agatangaza ko adashaka manda ya 3.

Muri iri tekinika ryayo FPR ntiyibagiwe no kuyobya amarari, aho Perezida Kagame we yivugira ko adashaka manda ya gatatu cyangwa akavuga ngo « abayishaka bazabanze babimwumvishe neza » kugirango bizabe aka wa mugani wa bakame beretse agasozi bashaka ko itegeka maze ikiraza i Nyanza yerekana ko idashaka ubutware kugirango babanze bayinginge. Kagame nawe rero amayeri ye ameze nk’aya Bakame yaratahuwe. Kagame arashaka kugirango abantu barushanwe mu mihigo bazana impampuro bamusaba kwiyamamariza manda ya gatatu, hanyuma abanze yiraze i Nyanza, abanyarwanda batangire gukubita ibipfukamiro hasi bamuramya !

Urugero twabaha muri ibi byo kuyobya amarari kwa FPR: Nko ku itariki ya 27 Gashyantare 2013 mu kiganiro Kagame yagiranye n’abanyamakuru yavuze ko nta manda yindi akeneye. Kagame alias Semuhanuka yarihanukiriye imbere y’abanyamakuru ati "nta nyota y’indi manda mfite, ati "Mundebe, sindi umuntu ukeneye manda ya gatatu. Sinyishaka!" Urundi rugero rutari kure ni mu ijambo Kagame yigeze kwivugira we ubwe mu biterane by’amasengesho aho yagize ati:

“…Jyewe ku gipimo cyanjye nipimiraho, impamvu imwe abantu bakoresha bavuga ko batazava ku butegetsi, jye niyo nkoresha mvuga ko nzabuvaho. Impamvu ni ebyiri: Ni uko mu buyobozi, mu bintu bimwe bikwiye kuba biherwaho harimo kuvuga ngo “ariko umaze imyaka 10, umaze imyaka 20… mu byo wakoze wafashije abantu kuba bazamuka bagakomeza mu nzira wabayoboragamo. Niba ntabo, ni ukuvuga ngo wayoboye nabi. Niyo mpamvu jyewe ntakomeza kuko naba narayoboye nabi, ngeze igihe nkwiriye kuba ngenda akaba nta muntu wansimbura. Ntabwo nabikoresha ngo ntabwo nabonye umuntu uzansimbura, ngo niyo mpamvu nkwiye gukomeza. Oya! Ni ukuvuga ko ukomeza nabi kuko wananiwe kugira uwagusimbura…’’

Abenegihugu barabeshyerwa ntaho inyandiko zoherejwe mu nteko zihuriye nugushaka kwabo !

Nubwo byagiye bivugwa mu binyamakuru na radiyo ndetse bikerekanwa no kuri televiziiyo y’igihugu berekana abantu bacicikana ku nteko bikoreye ibiseke abandi bazanye n’amakarito ngo yuzuye impapuro zasinywe n’abaturage bo mu ngeri nyinshi ; ni ukubeshya kuko mu banyarwanda hafi ya 90% batinya ubugome n’ubwicanyi bwa Kagame kandi mu mitima yabo bakaba banga Kagame urunuka. Kuvuga ko Abaturage baturuka mu turere dutandukanye tw’igihugu bazanye inyandiko zisaba ivugururwa ry’ingingo ya 101 y’Itegeko Nshinga, byabeshywa abatazi uko abanyarwanda badakunda kwerekana ikibari ku mutima.

Nk’uko benshi mwabibonye kandi abahagarariye abo baturage iyo bageze ku Nteko ishingamategeko bakirwaga neza cyane na Mukabalisa Donatille, Perezidante w’inteko ishinga amategeko umutwe w’abadepite. Nyamara ishyaka rimwe rya Green Party ryo ryanditse risaba ko itegeko nshinga ritahinduka, ntabwo ryigeze ryakirwa mu nteko! Urundi rugero dufite rwerekana ko abaturage bahatirwa kwandika ku ngufu mushobora kurubwirwa n’abandikira amaradiyo akorera mu gihugu barenga 65%, abo bandikira ayo maradiyo baba bayasaba kubatambukiriza ibitekerezo by’uko badashaka gukomeza kuyoborwa na Kagame kuko bakeka ko bohereje amabaruwa ku nteko barara bashyizwe mu magereza cyangwa bakicwa.

Muri iyi youtube mwiyumvire uko bamwe mu baturage bamwe bahabwa n’amafaranga y’inyoroshyo

Itekinika rya FPR rigiye gukurikiraho ni irihe?

kugira ngo manda za perezida zongerwe bisaba KAMARAMPAKA. Iyi KAMARAMPAKA nta muntu ku giti cye cyangwa ishyaka rya politiki bemerewe kubisaba ahubwo hashingiwe ku ngingo ya 193, igena ko kugira ngo manda z’ umukuru w’ igihugu zongerwe bisaba Kamarampaka, birumvikana kandi biragaragarira buri wese ko ikigiye gukurikiraho ari ugutekinika mu nteko-nshinga mategeko umushinga w’ihindurwa ry’ itegeko-nshinga ugacamo hanyuma hagakurikiraho igikorwa cyo kujya kujijisha abaturage babajyana mu ngirwakamarampaka zidafite umumaro.

Urwishigishiye aranarusoma:

Abanyarwanda bamenye ko Kagame namara kubona itegeko-nshinga rihindutse noneho asigaje kujya ababwira ati « nimwasame akabanyara mu kanwa ». Hariho koko abanyarwanda bacye bashaka ko itegeko-nshinga rihinduka kugirango Kagame abe umwami ubuziraherezo. Abanyarwanda rero bitegure ikizakurikiraho: gukatwa amajosi buri munsi. kujugunywa mu nzuzi, kujugunywa mu magereza nibindi byinshi. uwasinyiye Kagame wese ubwo yiyemeje gusinyira urupfu ntihazagire ubyicuza nyuma ngo twarashutswe kuko azaba arimwe mwamwigemuriye mumuha uruhushya rwo kubica urw’agashinyaguro.

Ni gute abanyarwanda bari bakwiye kwifata muri uru rugamba?

Icyo abanyarwanda bari bakwiye kumenya cya mbere ni uko ingingo ya 101 atariyo izabohora u Rwanda. Guhindura ingingo ya 101 no kongera umubare wa manda za Kagame byo biri muri gahunda yo gushimangira politiki yo kujijisha, itekinika n’ikinyoma byimakajwe na FPR- Inkontanyi. Abanyarwanda ntibakwiye kwibagizwa ko ubutegetsi bwa FPR na Kagame ari bubi cyane kuko Kagame n’agatsiko ke ka FPR kayoboye u Rwanda bakoze ibyaha byinshi ndengarugero ; muri ibyo byaha twabibutsa ibi bikurikira:

-Gutegura no gukora jenoside yakorewe abahutu, itsembatsemba ryahereye mu Mutara, Byumba na Rugengeri, itsembabahutu rikomereza mu Rwanda hose aho FPR-Inkotanyi yanyuze za Gitarama, Butare, Kibungo, Kigali, Kibeho-Gikongoro, Gisenyi Ruhengeri mu ntambara yiswe iy’abacengezi n’ahandi

-Kugira ibitambo abatutsi bagamije gufata ubutegtsi bwose ku ngufu, kwicisha no kwica nkana bamwe mu batutsi mbere ya 94, muri 94 na nyuma yahoo: FPR ariyo yakomye imbarutso ya jenoside n’ibyaha byibasiye abatutsi nyuma y’uko FPR ihanuye indege y’uwari Perezida w’u Rwanda Juvenal Habyarimana.

-Gukomereza Jenoside y’abahutu ku butaka bwa Kongo aho FPR n’abambari bayo batsembatsembye impunzi z’Abahutu mu mashyamba y’inzitane no kwica abanyekongo.

-Hari n’ibindi byaha byinshi byo mu ntambara n’ibyibasiye ikiremwa muntu tutarondoye.

Bityo kandi Abanyarwanda ntibakwiye kwibagirwa ko FPR ntacyo yamariye rubanda rugufi rwo mu cyaro muri iyi myaka 21 yose imaze yica igakiza: Ntawe utazi Rubanda rugufi rwicirwa n'inzara n'amavunja mu byaro byinshi byo mu Rwanda

Abari n'abategarugori b’u Rwanda ntibakwiye kurindagizwa babeshwa ko Leta ya Kagame yabateje imbere nyamara mu gihe benshi muri mwe mwirirwa mutonze imirongo ku magereza no mihanda mugemuriye abagabo banyu bafunzwe bazira akamama.

Mwibuke ko hari kandi abategarugori benshi bagenzi banyu nabo FPR yafungiye mu magereza, mu gihe kandi abandi bategarugori benshi bagizwe abapfakazi na FPR yabiciye abagabo, abandi bagirwa inshike kuko FPR yatsembatsembye abana babo. Ibyo byose ntimuzabiceho ngo murongeza za manda Kagame wamariye kw'icumu urubyaro n’urushako.

Banyarwanda rero aho muvamukagera nimuhaguruke mumenye ko ukubohora (libération) igihugu cyacu aribyo byihutirwa.

biracyaza....

Source :Ijwi rya Demokarasi