Burundi: Imyigaragambyo yo kwamagana manda ya gatatu ya Nkurunziza yatangiye !

Publié le 26 avril 2015 par veritas

Mu gihugu hose birashyushye

(Fungura kenshi iyi page urebe amakuru mashya kuri iyi nkuru !)

14H00: Ubuyobozi bwateguye imyigaragambyo mu Burundi bwatangaje ko iyo myigaragambyo ihagarara ku isaha ya saa munani ku isaha y'i Bujumbura,iyo myigaragambyo ikazakomeza ejo mu gitondo cya kare. Ubuyobozi bw'imyigaragambyo bukaba bushimira abarundi bose bayitabiriye, bukaba bwamaganye imyitwarire mibi y'igipolisi cy'u Burundi kandi bukaba bwifatanyje n'imiryango ifite ababo bahohotewe n'igipolisi cy'u Burundi kimwe n'abitabye Imana. Ubuyobozi bw'imyigaragambyo i Burundi buramagana igikorwa cyo gufunga amaradiyo yigenga ari mu ntara z'u Burundi ndetse n'igikorwa cyo gushaka gufunga radiyo ya RPA; ubwo buyobozi burahamagarira abarundi bose kutazohereza abana babo mu mashuri ejo kuwa mbere ahubwo bagahagurukira gukora imyigaragambyo.

13H34: Abantu babiri bari mu myigaragambyo i Burundi bamaze kuraswa n'abapolisi b'icyo gihugu bahita bitaba Imana. Guhangana hagati y'abapolisi n'abari mu myigaragambyo bikaba bikomeje gufata intera ikomeye, abantu benshi mu Burundi bakaba batangiye kwikanga ko n'itumanaho rya interineti leta ya Nkurunziza ishobora kurihagarika mu gihugu cyose cyane cyane uburyo bwa whatsapp, twiter na facebook. Kubera izo mvururu abarundi benshi bari guhungira mu bihugu bihana imbibi n'u Burundi cyane cyane muri Congo na Tanzania, amakuru atangwa n'abaturage b'abarundi aremeza ko leta y'u Rwanda yafunze abasilikare benshi k'umupaka w'u Rwanda n'u Burundi.

12H30: Abaministre boherejwe kugota inzu radiyo RPA ikoreramo basboye kumvikana n'ubuyobozi bw'iyo radiyo; mu cyemezo bumvikanyeho ni uko imirongo ya telefoni yose ya radiyo RPA ifungwa kugira ngo abigaragambya badashobora kumenyesha abanyamakuru b'iyo radiyo uko ibintu byifashe mu gihugu.

12H10: Ministre w'ubutegetsi bw'igihugu NDUWIMANA Edouard na Ministre w'umutekano NIZIGAMA Gabriel bakikijwe n'abapolisi benshi bagose inzu radiyo RPA ikoreramo. IMBONERAKURE ziri i MUTAKURA na CIBITOKE zambaye imyenda y'abapolisi zikaba ziri guhiga abigaragambya. Guverinema y'u Burundi imaze gutanga itegeko ryo gufunga amaradiyo yose yigenga mu gihugu, umuyobozi wa RTNB akaba yahise ashyira mu bikorwa icyo cyemezo cya leta. Ubu mu gihugu cyose nta radiyo yigenga iri kumvikana uretse i Bujumbura gusa.

12H03: Iyi myigaragambyo ntabwo irasiga ubusa, amaraso atangiye kumeneka, umwe mubigaragambya amaze kuraswa isasu mu muhogo n'igipolisi cy'u burundi

Uyu wishwe ni uwo i Musaga abandi benshi bakomekejwe n'amasasu.

11H45: Mu gace ka Cibitoke mu majyaruguru y'umujyi wa Bujumbura imirwano hagati y'abigaragambya na polisi irakomeye, abigaragambya bagizwe ahanini n'urubyiruko bashoboye kwirukana polisi mu muhanda mu nini wa Cibitoke, nyuma abapolisi bagarutse bafite imbaraga nyinshi bari kurasa n'amasasu menshi mu kirere, abigaragambya bahita bava mu muhanda munini bajya mu mihanda mito ya Cibitoke, polisi isigara iri gukura bariyeri zari zashyizwe mu muhanda. Ikindi kibazo gikomeye ni uko abapolisi bagose inzu radiyo RPA ikoreramo, abigaragambya nabo bagota abo bapolisi, ubu aka kanya abantu bari guhamagarana ari benshi kugira ngo bajye kwirukana polisi yagose radiyo ya RPA kuburyo hashobora kuvuka imirwano.

Iyi ni inzu radiyo RPA ikoreramo yagoswe n'abapolisi

Aha ni ibarabara rinini rya Cibitoki ryigaruriwe n'abigaragambya

11H35: i Bujumbura abigaragambya bagizwe cyane cyane n'urubyiruko bigabuyemo udutsiko twinshi turi mu duce dutandukanye tw'umujyi, utwo dutsiko tukaba duhanganye n'abapolisi bashaka kubuza abigaragambya kujya ku rubuga rw'ubwigenge. Muduce tumwe na tumwe tw'umujyi hari kugaragara ibikorwa byo guhangana hagati y'abapolisi n'abigaragambya. Abapolisi bari kubamenamo ibyuka biryana mu maso abandi nabo bakabatera amabuye. Abapolisi babiri bamaze gukomereka naho umusore umwe mubigaragambya yatawe muri yombi.

11H10:Abarwanashyaka ba CNDD FDD batemera manda ya gatatu ya Nkurunziza nabo biteguye gutanga umukandida wabo ku mwanya wo kwiyamamariza kuba perezida w'u Burundi! Umukuru w’inama nshingamateka Piyo Ntavyohanyuma, Gerevazi Rufyikiri na Yeremiya Ngendakumana yahoze arongoye umugambwe CNDD FDD bose bakuwe mu rwego rukuru rw’inararibonye z’uwo mugambwe,Yeremiya Ngendakumana, umushingamateka wo mu karere k’Afrika y’Ubuseruko, akaba we yirukanywe no mu mugambwe CNDD FDD, Izo nararibonye zirukanywe zivuga ko Petero Nkurunziza yemejwe nk'umukandida kuburyo bunyuranye n'amategeko, bakaba bavuga ko nabo biteguye gutanga izina ry’umukandida wabo, babakaba bemeza ko amazina atatu y’abaziyamamariza kuba umukandida wa NCDD FDD kuruhande rwabo yamaze kuboneka.

Ejo kuwa gatandatu taliki ya 25/04/2015 nibwo abarwanashyaka ba CNDD FDD bemeje ko Nkurunziza ariwe mukandida w’ishyaka ryabo batitaye ku nama zose bagiriwe z’uko Nkurunziza atagomba kwiyamamariza manda ya gatatu, Imbonera kure zarabyinnye biratinda zishimira umukandida wabo. Uyu munsi ku cyumweru taliki ya 26/04/2015, abayoboke b’amashyirahamwe yigenga n’amashyaka atavuga rumwe n’ubutegetsi bazindukiye mu mihanda mu gihugu cyose nk’uko bari barabimenyesheje ko niba Nkurunziza yiyemeje kwiyamamariza manda ya gatatu inyuranye n’itegeko nshinga ndetse n’amasezerano y’Arusha, bazigaragambya !

Mu mujyi wa Bujumbura, abigaragambya biyemeje guhurira ku makomine ya kera, nyuma bakerekeza ku rubuga rwitiriwe ubwigenge (ku kibanza citiriwe ukwikukira) naho mu gihugu hose abaturage bagahurira mu makomine no ku mirwa mikuru y’intara. Abayoboye iyo myigaragambyo barasaba abaturage kubahiriza ibyo abashizwe umutekano babasaba, ko iyi myigaragambyo ari iyo kwerekana ko batishimye ku cyemezo CNDD FDD yafashe, ko iyi myigaragambyo atari ibikorwa byo kwivumbura ku butegetsi. Dr. Jean Minani uyobora FRODEBU asanga abarundi barasuzuguwe n’ishyaka CNDD FDD na Nkurunziza, bakaba bagomba kubyamagana.

Agathon Rwasa we yavuze ko hagomba imishyikirano na CNDD FDD kugira ngo Nkurunziza ntatangwe nk’umukandida kuko byica itegeko nshinga ry’igihugu aho kugira ngo abaturage bajye mu mihanda ariko umuvugizi we Aimé Magera kimwe n’abayoboke ba FNL bo bazindukiye mu myigaragambo, bakaba bavuga ko Agathon Rwasa adashobora kwigaragambya kuko ashobora kugirirwa nabi n’ubutegetsi bw’i Burundi.

Imihanda yose yinjira mu mujyi wa Bujumbura irinzwe n’abapolisi, kuva mu gitondo cya kare ahantu hose abigaragambya bavuze ko bajya guteranira harinzwe bikomeye n’abapolisi benshi cyane. Imyigaragambyo yatangiye mu gitondo cya kare mu makomine ya Nyakabiga, Musaga na Cibitoke ariko abaplosi bahise batangira gutera ibyuka biryana mu maso abaje muri iyo myigaragambyo.

Ubwanditsi