RDC: Urugamba rwa demokarasi rurakomeje muri Congo! Kurikirana uko byifashe

16H30 : Abapolisi b'i Goma barimo bakoresha ingufu nyinshi mu kwirukana abaturage bishoye mu mihanda kuburyo abo bapolisi bari no gusanga abaturage mu ngo zabo bakababuza gusohoka; iyo mikorere y'igipolisi cya Congo ikaba yamaganywe n'ingabo za ONU ziri i Goma zibona ko abaturage bari guhohoterwa. Muri aya masaha abapolisi i Goma bari gutoragura amabuye abigaragambyaga bajugunye mu muhanda.

13H00: Imyigaragambyo itangiye gufata indi ntera mu mujyi wa Goma! Abaturage batangiye gufunga imihanda no gutwika amapine y'imodoka mu gace k'umujyi wa Goma kitwa Bireré. Abapolisi batangiye gutatanya abigaragambya kuburyo bishobora gukurura ihangana rikomeye ry'abigaragambya n'abashinzwe umutekano. Umuvugizi w'ingabo za ONU ziri muri Congo arahamagarira leta ya Congo kwirinda gukoresha imbaraga nyishi muguhagarika imyigaragambyo y'abaturage kandi agasaba abigaragambya nabo kugira umutuzo. Monusco iramagana ihagarikwa ry'itumanaho rya telefoni na interneti kubaturage kuko ibyo nabyo ari kimwe mu bikorwa byo kubangamira uburenganzira bwa muntu!

12H35: Umuturage uri mu mujyi wa Goma amenyesheje itangazamakuru ko imirwano y'abanyeshuri n'abashinzwe umutekano iri kubera mu mujyi wa Goma. Iyo mirwano ikaba yatewe ni uko abapolisi bahagaritse abarimu babiri bigisha muri kaminuza y'i Goma babashinja ko bari gukangurira abaturage baturiye uwo mujyi kujya mu myigaragambyo! Abapolisi bakaba bari gukoresha imyuka iryana mu maso ubu hakaba hari n'inkomere nyinshi zitangiye kugaragara. (Abumva uruimi rw'igifaransa ni mukande aha mwiyumvire).

12H21 : Leta ya Congo imaze gufata icyemezo cyo gufunga itumanaho rya telefoni na interneti mu mijyi ya Bukavu na Goma. Abaturage batuye mu bice by'uburasirazuba bwa Congo baremeza ko ubu batangiye gukoresha itumanaho rya telefoni ryo mu bihugu bibegereye! Abanyamakuru n'abaturage muri Congo batangiye gutabaza ngo ibihugu bikomeye by'uburayi birimo n'Ubufaransa ngo bibatabare kuko ingabo za Kabila zigiye kubamara. Mu mujyi wa Kinshasa hamaze gutoragurwamo imirambo y'abantu bishwe barenga 28!

Imyigaragambyo yo Kwamagana Kabila n'itegeko ryo gukoresha ibarura ry'abaturage yatangiye gusatira n'ibice by'igihugu cya Congo biherereye i burasirazuba! Muri iki gitondo cyo kuwa gatatu taliki ya 21/01/2015 ibintu ntibyifashe neza i Bukavu; muri uwo mujyi mu gace ka Karhale muri komine ya Kadutu abanyeshuri bafatanyije n'abaturage bigabije imihanda barayifunga. Abari mu myigaragambyo i Bukavu bakaba bahanganye n'abashinzwe umutekano bashakaga gufungura iyo mihanda. Umuyobozi wa komine ya Kadutu yatangaje ko ibiro by'abapolisi biri muri iyo komine byatewe n'abaturage bakabisenya ndetse bakanabisahura! Abanyeshuri bo muri iyo komine boherejwe mu ngo iwabo, abaturage bafatanyije na bamwe mubashinzwe umutekano batangiye ibikorwa byo gusahura n'ubwo hari abafunzwe bafatiwe muri ibyo bikorwa!