INKOMOKO Y’IGIHUGU CY’U RWANDA N’ABANYARWANDA (igice cya Kane)

Publié le 17 janvier 2015 par veritas

Umuhungu wa Superefe Koroni Placide (uri hagati) yasuye Paul Kagame kugira ngo amugaragarize ko yacengewe na gahunda ya "ndi umunyarwanda".

Inkomoko y’u Rwanda hakulikijwe ubumenyi bw’Amateka (Histoire:La genèse de l'Etat

Rwandais): Incamake y’amakimbirane yayogoje u Rwanda.

Abambari ba Kagame bamutegerejeho amakiriro basubize amererwe mu isaho

Ese ubumwe bw’abanyarwanda bushobora gufata kandi bushingiye ku kinyoma? Kuri iyi foto hejuru murabonaho Paul Kagame ari kumwe n’umuhungu wa Koroni Placide wari superefe mu Ruhango i Gitarama, akaba uwo mu superefe yarishwe n’ingabo za FPR ku itegeko rya Paul Kagame zigifata igihugu we n’umuryango we wose, uyu mwana we wifotozanyije na Kagame na Nyiramongi yitwa Claude Koroni, igihe umuryango we wicwaga yari muri Kenya , ni uko yarokotse, ubu akaba aba mu gihugu cy’Ubufaransa! Kwifotozanya n’uwarimbuye umuryango we ni uburyo bwo kwerekana ko yayobotse byuzuye kandi mu Rwanda hakaba hari ubumwe n’ubwiyunge bwazanywe na Kagame; nyamara hejuru y’ibyo, ubutegetsi bwa Paul Kagame bwaciye isomo ry’amateka mu mashuri yo mu Rwanda ndetse n’ibitabo by’amateka y’u Rwanda biri mu gihugu biracibwa kugirango abanyarwanda batamenya ukuri! None se nk’uyu mwana wa Koroni Placide aramutse azi amateka yakwegera Paul Kagame? Ubu Kagame namutuma kumwicira abanzi be azabikorana ingoga kuko ntacyo azi! Nyamara mu mateka y’u Rwanda harimo ingero nyinshi zitwereka ko Paul Kagame azi neza amateka y’u Rwanda kuva kera, akaba akuriza imiyoberere y’abakurambere be! Ibyo Paul Kagame akora arabizi, ariko urubyiruko ashuka ntirubizi, rukazahura n’ingaruka zabyo rutunguwe.

Kagame yarabyivugiye, aho yagize ati: ”aho kugira ngo mve ku butegetsi nzahitamo gusubiza igihugu aho nagisanze”! Abwirwa benshi akumvwa na beneyo! Kagame arabeshya ntabwo avuga aho yasanze u Rwanda ahubwo aravuga aho yarushyize kuva mu 1990; kuko ahantu habi rwageze niwe waruhagejeje. Abantu benshi bibaza impamvu z’intambara z’urudaca Kagame ahora agaba ku gihugu cya Congo, bakibwira ko ngo aba agiye guhigayo aba FDLR cyangwa kwiba amabuye y’agaciro gusa. Nyamara intambara Kagame atera muri Congo zikurikije ibyo itegeko rikuru ry’abiru riteganya kuva mu bisekuru by’ingoma y’abami nk’uko ryavuguruwe Kagame akimara gufata ubutegetsi mu mwaka w’1994. Kuva mu w’1994 ubwiru bwaravuguruwe bwemeza ko umwega wa mbere yicara ku ntebe y’ubwami bw’u Rwanda kandi kizira, ibyo Paul Kagame arabizi.

Itegeko rikuru ritanditse rigenderwaho mu Rwanda ni: UBWIRU cyangwa itegeko nshinga ry’ubwami aribyo mu rurimi rw’igifaransa bita Code ésotérique. Ubwiru, ingoma ya Paul Kagame igenderaho bwavuguruwe bwa mbere nyuma yo guhirika ingoma y’umwami Mibambwe IV Rutarindwa w’umunyiginya mu ntambara yo ku Rucunshu! Icyavuguruwe bwa mbere mu bwiru ni uko hashyizweho abami b’abanyiginya ariko b’ibikoresho by’abatutsi bo mu bwoko bw’abega. Icyavuguruwe mu bwiru mu mwaka w’1994 ni uko ubwami bwambuwe abatutsi bo mu bwoko bw’abanyiginya, bugahabwa abatutsi bo mu bwoko bw’abega bitarigeze bibaho mu Rwanda, naho andi mategeko n’amabwiriza agenga ubwiru yagumye uko ari ariko agashyirwa mu bikorwa mu ibanga.

Ni ubwo itegeko ry’ubwiru ariryo rikurikizwa mu Rwanda mu buryo bw’ibanga, abatutsi b’abanyiginya (bambuwe ingoma) n’abahutu bakuyeho ubwami, nta numwe muri abo bombi wemera itegeko ry’ubwiru Paul Kagame agenderaho nk’uko yarivuguruye mu mwaka w’1994. Iryo vugurura ry’ubwiru niryo pfundo ry’amahano akomereye u Rwanda Paul Kagame yazanye mu gihugu, akaba ariyo azatuma ubutegetsi bwe buzavaho bugaritse ingogo! Abahutu batemera ubwami kandi ntibemere n’ubwiru bagomba kwicwa, abatutsi batemera ivugurura ry’itegeko ry’ubwiru nk’uko byakozwe na Paul Kagame n’ubwo baba bemera ko u Rwanda rwayoborwa n’umwami bagomba nabo kwicwa, niyo mpamvu muri iki gihe hari impunzi z’abahutu n’abatutsi barimo umwami Kigeli V Ndahindurwa Jean Baptiste baheze ishyanga!

Abategereje agakiza kuri Paul Kagame musubize amerwe mu isaho: Dore inkomoko y’intambara arwana muri Congo!

Nubwo agenda abeshya ngo intambara arwana mu gihugu cya Congo ni izo guhiga aba FDLR, bimaze kugaragara ko Paul Kagame ashoza intambara ku gihugu cya Congo akurikije itegeko riri mu Bwiru nk’uko yabirazwe n’ibisekuruza by’abami bamubanjirije. Kugira ngo impamvu z’intambara ze zumvikane kandi azishyigikirwemo n’amahanga, yakoze kuburyo ashakisha umwanzi ashyira imbere avuga ko agiye guhiga , uwo mwanzi akaba yitwa umuFDLR.

Ariko se mu byukuri uwo mu FDLR ni muntu ki?

Kagame akomeje kurwanya abaFDLR, ubu noneho akaba yiteguye kubagabaho igitero cya simusiga n’ubwo avugako atazambuka umupaka, yohereje abacengezi benshi muri Kongo bo kwica impunzi, iyo ntambara yo gukengera akaba ariyo yakoreshejwe n’abami bamubanjirije! Iyo Kagame agiye guhiga umu FDLR agaba igitero ku gihugu cya Congo, ariko yasobanura neza umu FDLR uwo ariwe ,ugasanga ataba muri Congo gusa! Mu bisobanuro bya Paul Kagame n’abambari be batanga usanga umu FDLR ari umunyarwanda wese utibona mu butegetsi bwa Paul Kagame, uwo mu FDLR akaba yaragiye ahabwa amazina anyuranye kuva mu mwaka w’1994, Kagame akimara gufata ubutegetsi,abanzi b’igihugu (Kagame) bo mu bwoko bw’abahutu bagiye bahabwa amazina anyuranye: ibipinga, nyuma baba interahamwe, hakurikiraho kuba abajenosideri,ubu bakaba bari kwitwa ibyihebe.

Abatutsi batibona mu butegetsi bwa Paul Kagame biswe: abasopecya (abari mu gihugu) nyuma havutse n’ibigarasha (abavantara baciye umubano na Kagame) muri iki gihe nabo bakaba barabaye abaFDLR. Muri rusange abahutu n’abatutsi batavuga rumwe n’ubutegetsi bwa Paul Kagame bahawe izina rusange ryo kwitwa aba FDLR akaba aribo bagizwe ikiraro cyo kwambukiraho hagabwa ibitero muri Congo kandi bizwi neza ko Paul Kagame aba agiye kwiba umutungo w’icyo gihugu no kubahiriza itegeko ry’ubwiru ryo kugarura intara zitwaga iz’abanyarwanda. Muri make abo Kagame yita aba FDLR, tubasanga mu gisobanuro cyatanzwe n’umuhanga mu guharanira uburenganzira bw’ikiremwamuntu w’umunyamerika Martin Luther King wagize ati: “Pour se faire des ennemis, pas la peine de déclarer la guerre, il suffit juste de dire ce que l’on pense” aribyo bisobanura ngo :”Iyo ushaka kugira abanzi si ngombwa kugaba igitero, birahagije gusa kuvuga icyo utekereza”.

Iyi nteruro ya Luther King iratwereka neza ko Paul Kagame yayifashishije mu gushaka abanzi, agahita avuga ko umwanzi afite “ingengabitekerezo ya jenoside”, FDLR yo avuga ko abayigize bonse mu mashereka yaba nyina ingengabitekerezo! Kuri Paul Kagame nta kindi kigomba gukorerwa aba bitwa aba FDLR uretse kubica kuko yarangije kubacira urubanza! Abanzi b’u Rwanda, ni ukuvuga abanzi b’Abanyarwanda baravuga ngo “FDLR igizwe n’abasize bakoze ibara mu Rwanda, bahunze bamaze gukora jenoside y’Abatutsi”. Ni muri ubwo buryo, mbere gato y’umwaka w’ 2003, mu gihe hategurwaga gusenya burundu ishyaka MDR, Député Rose Mukankomeje wa FPR, yagize atya arihanukira igihe yari mu nteko y’abadepite, aravuga ngo: “Abahutu bari hano mu nteko, bakwiye guceceka kuko nibo bateguye jenoside kuva muri 1959”! Abo bahutu nabo baramusubiza bati:” muri uwo mwaka, abenshi twali tutaravuka”. Mukankomeje nawe ahita ahaguruka nk’umukinnyi wa Volley ugiye gukubita Smatch ati: “N’abari bataravuka, bonse iyo ngengabitekerezo mu mashereka ya ba nyina”.

Nabwo, mu mwaka wa 2005, Radiyo BBC yabajije Inkotanyi yitwa Richard Sezibera (ku ifoto) iti “ ko uvuga ngo FDLR igizwe n’abasize bakoze jenoside mu Rwanda, kandi hakaba hali amaraporo menshi yerekana ko FDLR y’ubu igizwe ahanini na 75% by’abana bali bato muli 1994”. Sezibera mu gusubiza yagize ati “na Yezu Kristu yarapfuye hashize imyaka ibihumbi bibiri, ariko aracyafite abayoboke”. Iyo usesenguye izi mvugo, bigaragara neza ko nta mwanzi w’u Rwanda urenze uriya utwerera abantu ibyaha batakoze, kuko icyaha ni gatozi, niko tubizi twese.

Aha rero murumva umu FDLR uwo aliwe, FDLR menya ko uri hose: Umuhutu uwo ali we wese ni FDLR, Umututsi wagizwe ikigarasha nawe yitwa FDLR. Aliko iyo usomye inkuru zimwe zisohoka mu binyamakuru byo kuri interneti, wakwibaza niba abo bitwa aba FDLR bafite intego imwe kandi bagomba gutunganya ingendo yabo ijyanye ni uko bari guhigwa bukware. Ni ngombwa ko abitwa aba FDLR bose bashyira hamwe bakirinda gutatanya imbaraga, bagatekereza ko mu gihe bazaba bafite igihugu gitekanye“ Umutwa, Umuhutu, Umututsi, Umunyiginya, Umwega, Umunyenduga, Umukiga, bagomba kugira ijambo kuburyo bungana”, aribwo bazatangira kugaragaza ibitekerezo bibatandukanya bakabimurikira rubanda ikazabatoramo abayobozi batabogamye kandi bakunda abanyarwanda.

Ingengabitekerezo yo kurwana Paul Kagame ayikura he?

Umunyarwanda wese asabwe guceceka bitaba ibyo agahinduka umwanzi wa Kagame. Ibihe turimo, tumeze nk’umuntu utwaye imodoka, niwe ugenda areba imbere, agaterera n’akajisho muri za rétroviseurs ngo arebe inyuma ye uko hifashe. Natwe turarwana n’ibibazo tubona ubu ngubu, ariko ni ngombwa ko tujya no kureba mu mateka ngo tumenye icyaba gitera ibi bibazo dufite. Ingengabitekerezo yo kurwana, Kagame ayikura kubakurambere be uko bakurikirana kugera kuri Rwakagara; u Rwanda ruyobowe n’Aba Rwakagara ari nabo bakoze ibara ku Rucunshu, kandi bagendera ku Bwiru bwanditse n’ubutanditse.

Intambara zo mugihe cy’abami bakomoka ku Bimanuka by’Abahima-Tutsi byavuye muri Ankore (1ère dynastie)

Mu ntambara zayogoje u Rwanda n’ibihugu duturanye, tubonamo ahavuye inzangano zakomeje kuduhekura. Abami bahoraga barwana bica, banyaga, nta gahenge Abanyarwanda bigeze bagira. Mu gihe cy’abami b’ibimanuka byavuye muri Ankore y’u Bugande, amateka atwereka ukuntu Abami bayoboye u Rwanda mu bugome butagereranywa, bikaba aribyo byahembereye inzangano mu Banyarwanda. Ku ngoma y’umwami Mibambwe I Sekarongoro I Mutabazi I (1411-1444), Abanyoro bo mu Bugande bateye u Rwanda baje guhana ubugome bw’Abami b’Abahima-Tutsi bari bayoboye u Rwanda, Mibambwe wa I icyo gihe yarahunze kubera icyo gitero cy’abanyoro, arahunga, ariruka we n’abe n’inka ze baruhukira i Rusozi (Bukavu y’ubu) barenze Nduga n’i Kinyaga byari bitaraba iby’u Rwanda muri icyo gihe.

Umwami Mibambwe wa I agezeyo (Bukavu), kubera ubushotoranyi bwe, yarwanye n’umwami Mulira Muhoyo w’i Bushi wari wamucumbikiye, ingabo z’Abashi zitsinda iz’u Rwanda. Umugabekazi w’u Rwanda wari uwo mu bwoko bw’abega ariwe Nyiramibambwe wa I Nyabadaha, arahagwa. Kuva icyo gihe kugeza ubu, ingabo z’u Rwanda n’iz’Abashi (Kongo) zihorana ubushyamirane. Abanyarwanda bari kumwe n’umwami bacitse ku icumu bahungiye i Mururu mu Kinyaga ( ubu yabaye u Rwanda). Mibambwe wa I yagarutse mu Rwanda nyuma y’imyaka ine, mu gutahuka, mbere yo kugera mu rugo rwe rwari i Remera y’Abaforongo mu Rwanda, yabanje kwica Umwami Mashira umubanda w’umuhutu w’i Nduga (Rwanda) amwicira hafi y’i Nyanza ubwo ahita anigarurira ako karere k’i Nduga, ubwo bwicanyi bwakorewe Mashira bwarakaje abahutu kugeza na n’ubu ntabwo barabwibagirwa.

Umwami Mibwambwe wa I amaze kongera kwicara ku ntebe ye i Remera y’Abaforongo, yaritonze ategura igitero cyo kujya guhorera nyina Nyabadaha wishwe n’abashi. Bitewe ni uko umwami Mibambwe wa I atari gushobora Abashi wenyine, asaba u Burundi, n’u Bugesera baramuherekeza, batera u Bushi barabuyogoza. Kuva icyo gihe intambara z’u Rwanda na Kongo ntizigeze zihagarara, keretse igihe abahutu bategekaga u Rwanda niho izo ntambara zacogoye. Abatutsi b’Abega bayobowe na Kagame ka Rutagambwa aho bagarukiye ku ngoma, bakurikije itegeko ry’ubwiru ryo guhorera umwegakazi Nyabadaha wishwe n’abashi; ibyo akaba ari imwe mu mpamvu zatumye Kagame w’umwega atangira kugaba ibitero ku gihugu cya Kongo afatanyije n’ibihugu by’u Burundi n’u Bugande ndetse n’amahanga ariko na n’ubu intambara ikaba igikomeje! Ibi bikaba bitwereka ko amateka yisubiramo koko!

Mibambwe wa I yari yaratonesheje umugore we w’umwega witwaga Shetsa, uwo mugore akaba yari yaramuhawe na nyina Nyabadaha. Shetsa yabaye aho yicara yiteguye ko umwana we Hondi ariwe uzasimbura se bityo nawe akaba umugabekazi. Siko byagenze kuko igihe kigeze Abiru babwiye Mibambwe wa I ko umugabekazi uzakurikira Nyabadaha ko atazaba ari umwega, ahubwo ko azaba ari uwo mubwoko bw’Abaha. Mibambwe wa I akibyumva, yarongoye Matama w’u Muha amukuye i Buha hafi ya Bugufi ho muri Tanzaniya y’ubu. Mibambwe wa I na Matama babyaranye umwana witwa “Gahima” ari nawe wavukanye imbuto z’ubwami. Mibambwe wa I yahise yica umugore we w’umwega Shetsa n’abana bose babyaranye ahereye kuri Hondi kugirango aburizemo intambara zizungura zashoboraga kuba amaze gutanga (kwitaba Imana). Ibyo byababaje cyane Abega. Nguko uko Inzangano zahemberewe mu Banyarwanda, hagati y’abega n’abanyiginya !

Inkomoko y’Abagogwe n’Abanyamurenge

Buri gihe amakimbirane hagati y’Abanyiginya n’Abega rwahoraga rugeretse. Nyuma y’ingoma y’umwami Yuhi II Gahima II (1444-1477), intambara yararose hagati y’Abega n’Abanyiginya, bibaviramo gukwira imishwaro. Abagogwe mubona banyanyagiye mu majyaruguru y’igihugu bakomoka ku gice cy’Abanyiginya b’i bwami bavuka kubagore b’abega. Abagogwe babaye impunzi muri Kingogo ya Kibirira, ubwo Cyamatare mwene Yuhi II Gahima II, yicaga mwene nyina Juru nawe ubyarwa na Gahima II ariko badahuje nyina, uwo Juru akaba yari amaze kwima ingoma yo gusimbura se Gahima wa II. Ariko umuvandimwe wa Juru bahuje nyina witwa Bamara yahise arwanya Cyamatare aramwirukankana. Cyamatare ahungira i Gatagara ya Gitarama, Bamara amukurikirayo, amwambutsa Nyabarongo. Kuko yari azi ko amugejeje mu misozi ikikijwe n’abanzi, ahita agaruka aza kwima ingoma y’u Rwanda. Cyamatare na nyina witwaga Nyirangabo w’umwega n’abagore be bose, bahungiye mu Kingogo. Muri icyo gihe Ntsibura I Nyebunga umwami w’i Bushi, yarimo agaba ibitero byo kwagura ingoma ye ku kirwa cy’Ijwi no mu burasirazuba bw’ikiyaga cy’i Kivu, afatanyije na Nzira ya Muramira umwami w’u Bugara (amajyaruguru ya Kingogo). Abo bami bombi bagabye igitero kuri Cyamatare wari wigize ikigomeke (rebellle) kuri Juru ariwe yishe akirukanwa na mwene nyina Bamara.

Igitero cya Ntsibura wa I Nyebunga na Nzira ya Muramira cyahitanye Cyamatare yicirwa ku gasozi ka Rugarama kaje kwitwa i Rubi-rw’i Nyundo mu Kingogo, Nyirangabo nyina wa Cyamatare n’abandi bagore be bose bagizwe imfumgwa nyuma bicwa bamanitswe ahitwa Ku-Rwegekangabo hafashe n’izina ryo Mu-Miko-Y’Abakobwa (aux érythrines des nobles dames). Icyo gihe umupaka wa Kongo n’u Rwanda wageraga kuri Nyabarongo! Ntsibura I Nyebunga yategetse Kingogo imyaka 11 iyoborwa na n’umutware witwaga Mateke. Muri icyo gihe,Ntsibura I Nyebunga ntiyagarukiye aho, yavogereye u Rwanda rwa Ndahiro II Bamara, aca mu NDUGA ntiyagira icyo ayitwara, ajya gutera u Bugesera, arabufata bwose ari kwihimura kuko bwari bwaraherekeje Mibambwe I gutera u Bushi.

Mu ntambara yo mu Kingogo, abana ba Cyamatare (Hima-Tutsi) barokotse ni Mucokori ariwe gisekuru cy’Abacokori biganjemo Abagogwe, undi mwana we warokotse icyo gitero ni Kibogo se wa Mugunga ariwe Abagunga bakomokaho. Abo bagogwe n’abagunga bagumye muri ako karere. Abagogwe n’Abagunga ntabwo bari bakibarirwa mu mfura z’abatutsi (noblesse Tutsi). Abacokori bagizwe ahanini n’Abagogwe aribo tuzi muri iki gihe. Naho Abagunga benshi bigize Abahutu kubera kuzinukwa no guhunga Ubwami. Abagogwe n’abagunga, n’ubwo bava inda imwe bamwe bakomeje kuba abatutsi abandi bigira abahutu kandi birafata! Abo bose banyanyagiye mu majyaruguru y’u Rwanda no mu gice cya Kivu y’amajyaruguru yo muri Kongo, ni ukuvuga Masisi na Rutshuru. Icyo gihe, Umwami Ndahiro II Bamara yayoboye u Rwanda mu mutuzo, amaze gutanga, asimburwa n’umuhungu we Nsoro II Byinshi. Nawe wayoboye mu mutuzo nka se. Abana babo bari bunze ubumwe ku buryo nta muntu washoboraga kubatandukanya, bityo bahabwa izina ry' Abanyabyinshi.

Mu gitero cya Ntsibura wa I na Nzira kuri Cyamatare, uwitwa Binama nawe uvuka kuwundi mugore w’umwega witwa Nyankaka nawe wari umugore wa Gahima II, akaba yari ari kurwana kuruhande rwa Cyamatare yaburiwe irengero, biza kugaragara nyuma ko yashoboye guhunga. Binama yongeye kugaruka mu Rwanda azanye n’ingabo z’amahanga (Gisaka, Karagwe, Kyamutwara, Bugesera) zagabye igitero ku Rwanda, icyo gitero cyahitanye Nsoro II Byinshi umwami w’u Rwanda w’umunyiginya utavuka ku mwega, nyina yari umushambo. Iki gitero cyimitse Ruganzu umunyakaragwe w’Umu Hinda-Tutsi, yima Ingoma y’u Rwanda gutyo. Ingoma ikomoka kuri Gihanga (1ère dynastie) iba irazimye, hatangira ingoma ikomoka kuri Ruganzu (2ème dynastie). Abanyabyinshi n’abayoboke b’Abahutu bo kwa Mashira, barisuganyije bakomeza kurwanya Ruganzu , maze ingabo z’amahanga zamufashaga zimaze gusubira iwabo, Ruganzu agaragaza intenge nke, abo bacengezi b’abanyabyinshi (Hima-Ttutsi) n’Ababanda (Hutu), bamutegeye ahantu heza (igico) iyo mu misozi ya za Kibuye bamurasa umwambi w’ingobe mu jisho, baramwica. Abo banyabyinshi n’abahutu bari kumwe nabo bahita bahunga u Rwanda, bariruka baruhukira i Murenge muri Kongo. Niho Abanyamurenge bavuye, hari mu mwaka w’1543.

Intambara zo mugihe cy’abami bakomoka kuri Ruganzu Ndoli u ukomoka i Karagwe

(2ème dynastie)

Mbere y’uko Umwami Ruganzu I Ndoli yicwa n’abanyabyinshi, agasimburwa n’umuhungu we Mutara wa I Semugeshi (1543-1576), yatangije indi ngoma (2ème dynastie) idafite aho ihuriye n’iya Gihanga. Ruganzu yaje afite amakuru yose y’ubwami bwo mu Rwanda kuko yavuye i Karagwe yarashatse Nyirakabogo umwega ukomoka mu Rwanda. Ruganzu yari yariyise Cyambarantama, kuko yemeraga umwami w’u Burundi witwaga Ntare I Rushatsi Cyambarantama.

Impamvu yamwemeraga, ni uko uwo Ntare Rushatsi ari umunyarwanda wagiye i Burundi ( hari ku ngoma ya Mibambwe I) akima ingoma amaze kwica intare. Ubutegetsi bwari busanzwe bufitwe n’Abega b’i Burundi, Cyambarantama agezeyo ahita abubanyaga, umwami wa nyuma w’igoma y’Abega b’i Burundi ni Mwezi alias Kiyobera-babi cya Mwaga umwami w’Imiheto. Ntare I Rushatsi yahise atangiza ingoma y’Abaganwa. Ntare I Rushatsi Cyambarantama yavuye mu Rwanda yitwa Karemera mwene Sinzi, Sinzi mwene Nyamuhanzi, Nyamuhanzi mwene Ndoba, Ndoba wabaye umwami w’u Rwanda akaba ari uwo mu bwoko bw’Abenenyamuhanzi b’Abanyiginya (Hima-Tutsi).

Mu Rwanda, intambara y’Abanyiginya n’Abega yarakomeje kugeza ibyaye Rucunshu, biturutse ku bana babyarwa na Rwakagara musaza w’Umugabekazi Nyiramavugo II Nyiramutara Nyiramongi nyina wa Mutara II Rwogera. Uwo Nyiramavugo II Nyiramongi yari yarifuje ko Abega bavamo umwami kuva mu myaka y’i 1850 ubwo yagiraga ati: “nanjye sinzapfa ntabonye umwami w’Umwega”. Kuberako Ubwiru bwateganyaga ko Umwami utanze adasiga kw’isi Umugabekazi we, Mutara II Rwogera ubwo yari agiye gutanga kubera indwara y’igituntu yarozwe, ibwami bashatse kunywesha Nyiramongi aranga kuko yashakaga kwiberaho Mutara wa II amaze gutanga, kugirango avugurure ubwiru ashyireho umwami w’umwega. Ntabwo byamuhiriye kuko amaze kwangira intumwa ebyiri kunywa uburozi babahaga, Abiru bamwoherereje umwe muri bo, akaba na musaza we witwaga Rwakagara ari nawe Paul Kagame (perezida w’u Rwanda muri iki gihe) akomokaho, amunywesha amata ku ngufu, arakomeza kugeza apfuye.

Umwami Mutara II Rwogera mbere yo gutanga yahise afata icyemezo cy’uko nta Mwega uzongera kuba Umugabekazi. Niyo mpamvu Nyirakigeri IV Murorunkwere alias Inyamibwa nyina wa Rwabugiri yari umu Kono. Ubutoni bw’Abakono ntibwateye kabiri. Impamvu ingana ururo, umutware witwa Gisiribobo wo mu Ndorwa (Byumba), yahaye umugabekazi Murorunkwere inka 30 z’urwirungu (brun tacheté) mu rwego rwo kwihakirwa i bwami ngo hatazagira umuntu uzabohoza inka ze kumaherere. Igikomangoma Nkoronko wigeze kuba umugabo wa Murorunkwere, abonye izo nka, ashaka gupima umubano we na Murorunkwere, arazimusaba. Murorunkwere arazimwima, ahubwo azigabira Seruteganya. Seruteganya yari yaragizwe umututsi ariko se yari umuhutu na nyina ari umututsi. Seruteganya yari umwizerwa k’umuganekazi kubera ko yari umukozi uzira amakemwa.

Nkoronko yahise akwiza ikinyoma hose ko Seruteganya yateye inda Murorukwere. Icyo kinyoma nicyo cyabaye intandaro y’ubwicanyi bwose bwakurikiye. Ku itegeko ry’umwami Rwabugiri hagabwe igitero k’umugabekazi Murorunkwere kiramuhitana kimwe na Seruteganya. Rwabugiri yaje kumenya ko Murorunkwere atari atwite, atangira guhiga abantu bose bagize uruhare mu rupfu rwa nyina yakundaga cyane; Umwami Rwabugiri yicishije umugore we Nyiraburunga nawe wo mu bwoko bw’Abakono, akanaba nyina wa Rutarindwa, akaba aricyo cyatumye atsindirwa umubekazi w'umwega Kanjogera, mushiki wa Kabare ba Rwakagara. Ubwo bwicanyi bwose nibwo bwabaye umusemburo w’intambara yo ku Rucunshu kuko ifumba yabwo yari yarakongejwe n’Umugabekazi Nyiramavugo Nyiramongi.

Amateka yerekana ku buryo burambuye ukuntu intambara hagati y’Abega n’Abanyiginya yashegeshe igihugu ikarangira Abega bashyize ku ngoma uwo bashakaga ariwe Musinga wabyarwaga n’umugabekazi Kanjogera mwene Rwakagara w’umwega. Nyamara abishyize ku ngoma nyuma y’intambara yo ku Rucunshu basubiranyemo vuba na bwangu. Ndetse iyo abazungu batinda kuza, igihugu cyari hafi kuzima. Abega bakoreraga muri Musinga ntibari bagishoboye gukumira Abanya Gisaka bashakaga kwigenga. Yewe n’abari bashyigikiye umwami Rutarindwa bari bamaze kwigarurira amajyaruguru y’igihugu basigaje kwambuka Nyabarongo gusa. Musinga n’Abega bamukoreragamo babakijijwe n’Abadage bahise babatabara bakoresheje ingufu za gisirikare. Icyo gihe Kabare nawe yanganye na Kanjogera kuburyo Kabare yari atagikandagiza ikirenge cye i bwami!

Harya Paul Kagame yaravuze ngo igihugu giheruka kuba kizima mbere y’umwaka w’1959! Turabibona koko! Igihugu cy’u Rwanda gifite ibibazo byinshi cyane byakomeje gupfukiranwa. Paul Kagame arabizi byose, kwunga Abanyarwanda ntiyabishobora kuko ntabyo afite mu maraso, keretse uwemeye kujya muri “Ndi umunyarwanda” itegeka umuhutu guhora atera ivi uko abonye umututsi; mbese nkuko Ryangombe rya Babinga ukomoka i Kyamutwara yo muri Tanzaniya, uyu wazanywe na Ruganzu I Ndori, yari yarabishyize mu Banyarwanda! Ryangombe na Ruganzu I Ndori bahimbye idini ryo kubandwa aho umuhutu ahora apfukamye imbere y’umututsi. Twabigereranya nka gahunda yo gusana imitima akoresheje urudodo ariko yajya kurupfundika akazirikaho grenade. Buriya mujye mwicara muzi ko Abanyarwanda bose batezemo ibisasu ku mitima. Mwebwe se ntabwo Kagame abatera ubwoba?

Twakizwa na Demokarasi isesuye, ifite n’ingabo z’inkorokoro kandi zikerebutse zo kuyirinda, naho ubundi n’abanyarwanda basigaye bazashira! Murakagira ubumwe nifuriza abanyarwanda b’ingeri zose!

Biracyaza

Mubigejejweho n’Umusomyi wa VERITASINFO

w’i Rubona - rwa - Nzoga ya Murambi / Byumba