Rwanda : Impamvu ngo Paul Kagame ahora azerera, ngo ni uko aba yagiye guhaha !
Ese kuva i Kigali akajya kureba umupira mu burayi ni uguhahira abanyarwanda? aha ni ku mukino wa Réal Madrid na Atlético Madrid mu gihugu cya Portugal.
Kuwa kabiri taliki ya 11/11/2014 Paul Kagame yasuye umurenge wa Jabana mu karere ka Gasabo (Kigali Ngari), yakirwa n’abaturage benshi bari bazanywe ku ngufu bitwaje utudarapo tw’ibendera rishya ry’u Rwanda bahawe n’abayobozi b’Akarere kugira ngo abo baturage batuzunguze imbere ya Kagame nko mu gihe cyo kwiyamamaza mu matora kugira ngo Kagame arusheho kwishima. Mu ijambo yabwiye abo baturage Paul Kagame yabasobanuriye impamvu akunze kuzerera mu mahanga, maze agira ati : «Ubwo mubona kenshi nzenguruka mu mahanga, ntabwo ari ukuzerera, mba nagiye guhaha. Ibi bibazo iyaba bitari bihari rwose nakwishimira guhorana namwe tukibanira gusa singire ibindi njyamo. Buri munsi, buri rugendo, buri mwanya utwarwa no gushaka icyakongerera ubushobozi, icyakubakira ku mbaraga tumaze gushyira hamwe kugira ngo ibibazo duhanganye na byo tudashobora kwikemurira twebwe twenyine, dushobore kuvana imbaraga ahandi» Ibi bisobanuro bya Paul Kagame akaba ari ikinyoma cyambaye ubusa !
Iyi mvugo ya Kagame iravuguruza intero yashyize mu banyarwanda bahora baririmba buri munsi, buri gihe Paul Kagame ahora yibutsa intore za FPR ko ntacyo zigomba gutega ku mahanga, akaba ari muri urwo rwego hashinzwe ikigega cy’Agaciro develppement Fund; mugushinga icyo kigega abanyarwanda bose batojwe imvugo yitwa: «kwigira no kwiha agaciro». Ubwo yakiraga indahiro ya Benard Makuza nka Perezida wa Sena, Paul Kagame yibukije intore zari zimukikije ko zigomba kumenyera gutungwa na duke kuko amahanga yiteguye gufungira u Rwanda amazi n’umuriro, Paul Kagame yagize ati « mu minsi iri imbere utu duke murimo kurwanira nitumara gushira muzaryana» ! Biratangaje rero kumva Kagame avuga ko azerera amahanga agiye guhaha ; biramutse ari uko bimeze ntabwo yabitangira ibisobanuro kuko abanyarwanda baba babona ko mu gihe agiye mu mahanga hari icyo yinjiza mu gihugu ; kuba rero abanyarwanda babona ko ntacyo yinjiza, ubuzererezi bwa Kagame mu mahanga twabugereranya nawa mugabo «waranguraga ahendwa, agacuruza ahomba» !
Izo ngendo Paul Kagame akora zitwara amafaranga menshi cyane igihugu cy’u Rwanda cyakagombye gukoresha ibindi bikorwa nko kurihira abana amashuri cyangwa kuriha mitiweli zo kwivuza kubaturage; iyo Paul Kagame agerageje gukora urugendo aherekejwemo n’abantu benshi ategura igitaramo cyo kwishimisha cya «rwanda day» (ku ifoto Kagame yifataga ifoto n'umusore bari muri rwanda day Atlanta muri USA 2014), icyo gitaramo gitwara akayabo igihugu cyose , kandi muri iyo Rwanda day nta kindi gikorwa uretse kujya kubyinira Kagame mu mahanga ! Rwanda day y’ubushize muri Amerika yatwaye akayabo k’amafaranga yarihira buruse mu gihe cy’umwaka wose abanyeshuri bose b’u Rwanda ! None se mu byukuri izi ngendo za Paul Kagame mu mahanga zinjiriza iki igihugu ?
Ibindi bibazo bwite bijyana Kagame buri kanya muri Amerika n’ikibazo cy’imyigire y’abana be no kujya gushaka abaterankunga bo kugura amabuye yiba muri Congo binyuze mu idini rya Illuminati ; kandi abo baterankunga akaba ari nabo bagomba kumuvuganira ibukuru (mu butegetsi bw’Amerika) ngo bumukingire ikibaba mu mahano menshi y’ubwicanyi akomeje gukorera mu karere k’ibiyaga bigari (raporo mapingi n’imirambo yagaragaye mu kiyaga cya Rweru byaracecetswe). Abo baterankunga barimo umuherwe Mitt Romney wiyamamarije umwanya wo kuba perezida wa USA n’umunyamasengesho Rick Warren.
Nubwo abantu benshi bemeza ko izo ntwaro zishaje ntabwo zibuze ubumara bwo kugira nabi, ahubwo ikibazo akaba ari ukumenya umubare w’amafaranga izo ntwaro zaguze ku gihugu gikennye nk’u Rwanda no kumenya icyo izo ntwaro zizamarira u Rwanda. Abantu benshi babonye iriya nkuru y’igurwa rya ziriya ntwaro bahise bavuga ko ari ubuhanuzi bugiye gusohora ! Ubusanzwe umwanzi w’igihugu kuri Kagame ni abanyarwanda, abenshi bakaba bicwa bakajugunywa mu mazi ngo bafatanyije n’umwanzi, abo banyarwanda bitwa abanzi ntibisaba ko bagurirwa intwaro ihanura indege nk’iyo muri buriya bwoko kuko batagenda mu ndege ; ahubwo iriya ntwaro ishobora kuzahanura Paul Kagame mu ndege kuko ariwe uyigendamo ! Nta gitangaza rero ko Paul Kagame yaba yariguriye ikizamuhitana akazarasirwa mu kirere cyo mu Bugesera (nk’uko abahanuzi babivuze) hakoreshejwe intwaro iri i Kigali kandi bikozwe n’inshuti ye nk’uko kuva kera byavuzwe ! Birabe ibyuya…

Nibyo koko abakuru b’ibihugu bitandukanye bakorera ingendo mu bindi bihugu bagiye gushaka ubushuti ndetse n’ubutwererane. Uko bigaragara ni uko abakuru b’ibihugu bakora ingendo nk’izo baba baherekejwe n’abantu bo mu byiciro binyuranye, mu nzego zinyuranye z’igihugu, ibyo byiciro by’abantu bakora imirimo inyuranye baherekeje umukuru w’igihugu bigahura n’ibindi byiciro by’abantu bakora imirimo bahuriyeho, bakaganira. Abakuru b’ibihugu nabo bagahura, abaministre b’ibihugu byombi bagahura, abacuruzi bagahura…Kenshi uruzinduko nk’urwo rurangizwa no gushyira umukono ku masezerano y’ubufatanye muby’amajyambere hagati y’ibihugu byombi kandi urugendo nk’urwo rukaba rumara iminsi mike. Bene urwo rugendo rw’umukuru w’igihugu nirwo abaturage babonamo ko umukuru w’igihugu cyabo yagiye gushaka inshuti no kubahahira.
Iyo Paul Kagame ari kuzerera amahanga nk’uko abyivugira ntabwo ibintu nk’ibyo bikorwa , kenshi agenda ari wenyine cyangwa aherekejwe n’abantu ba hafi bo mu muryango we n’abashinzwe umutekano we, ubundi akajya kumara amezi menshi muri Amerika ari gusura amashuri ! Iyo agiye mu bihugu by’i Burayi aba agiye kwakira igihembo yateguriwe n’ikigo cy’ishuri runaka, nta masezerano y’ubutwererane hagati y’ibihugu ashyirwaho umukono kuko ingendo Paul Kagame akora mu mahanga bavuga ko ari ingendo ze ku giti cye (voyage privé),Iyo Paul Kagame avuye i Kigali akajya kureba umukino w’amakipe ku mugabane w’u Burayi ntabwo aba ari guhahira igihugu !
/http%3A%2F%2Fbwiza.com%2Fwp-content%2Fuploads%2F2014%2F09%2F1411286612_15118423840_1bd8c09e3c_z.jpg)
Mu ngero Paul Kagame yatanze z’uko ngo aba yagiye gushakira igihugu ubukungu yavuzemo « Gare ya Moshi », icyo ni ikinyoma cyambaye ubusa, uwo mushinga wa gare ya moshi uhuriweho n’ibihugu by’Afurika y’iburasirazuba kandi abakuru b’ibyo bihugu ntabwo bazerera nka Kagame ! Umushinga wa Gare ya moshi ntabwo wagenewe u Rwanda, ahubwo ni umushinga ufite intego yo kugera mu gihugu cya Congo (RDC) kugira ngo ubukungu bw’icyo gihugu bushobore kugera i Burayi no muri Aziya mu buryo bwihuse, niyo mpamvu igihugu cy’Ubushinwa kiyemeje gutanga inkunga yo gukora uwo mushinga !
Impamvu zo kuzerera kwa Kagame zishingiye ku mpamvu ze bwite !
Byakunze kuvugwa kenshi ko impamvu Paul Kagame ahoza akarenge muri Amerika zishingiye kubibazo bye bwite kandi izo ngendo akazikora mu mutungo w’igihugu. Impamvu zikunze kuvugwa kuri Kagame zimuhoza muri Amerika n’ikibazo cy’uburwayi bwa kanseri y’uruhu afite, ubwo burwayi bukaba bwariyongereyeho ikibazo cyo kutabona ibitotsi. Birumvikana ko uburwayi atari ikinegu kandi ntanubwo ari ingeso, si nangombwa ko Paul Kagame atangariza abanyarwanda ko arwaye, ariko kandi nk’umukuru w’igihugu si ngombwa ko ajya kubeshya abanyarwanda ababwira ko iyo agiye muri Amerika (USA) abagiye kubahahira kandi aba afite ikibazo cy’ubuzima bwe, ibyiza yakwicecekera !

Abo bagabo bombi, nibo bashakiye Paul Kagame abahanga mu itangazamakuru n’abashakashatsi bo kwamamaza Kagame mu gihugu cya USA, ni muri urwo rwego abo baterankunga (lobbies) ba Kagame bashoboye kumuhuza n’abashakashatsi bo mu bigo by’amashuri akomeye muri Amerika, Kagame yemerera abo bashakashatsi n’abo banyeshuri kuza mu Rwanda uko bishakiye ; icyo byabyaye ni uko abo bashakashatsi ubu aribo bashinja Paul kagame guhanura indege yari itwaye perezida Habyarimana bigakurura amahano ya jenoside mu Rwanda (cfr : rwanda’s untold story)bihereye kubushakashatsi bikoreye mu rwanda.
Mu kuzerera mu mahanga Paul Kagame atangiye kugira ibibazo by’uko isura ye yahindanyijwe na filime ya Rwanda’s untold story kimwe n’ibibazo bikomeje gusakuzwa byo gushyigikira imitwe ihungabanya umutekano mu karere kose harimo na M23 n’ikibazo cya demokarasi ; ubu Kagame akaba ari guhindura ibyerekezo, ni muri urwo rwego muri iyi minsi ari kwibanda ku bihugu byo muri Aziya. Muri gahunda ye yo gushaka amaboko n’imbaraga, Paul Kagame akaba yarashoboye kugurishwa n’igihugu cy’ubushinwa intwaro zo guhanura indege za misile TL-50 zishobora kurasa indege iri ku birometero 50 (50 km) mu kirere ; tugereranyije izo ntwaro zishobora kurasa indege iri mu kirere cy’igihugu cy’u Burundi ihagaze i Kigali.Ntabwo twavuga ko izi ntwaro hari icyo zimariye umunyarwanda wabuze icyo ashyira mu kanwa !

Ingendo za Kagame rero biragaragara ko nta mutungo zazaniye abanyarwanda ahubwo ni izo gukemura ibibazo bya Kagame,zigakenesha igihugu kurushaho. Biratangaje kuba umukuru w’igihugu cy’u Rwanda ariwe uhora azera ku isi yose mu gihe umukuru w’igihugu cy’u Burundi atazerera nkawe kandi u Burundi ataribwo bukize kurusha u Rwanda !
Umusomyi wa veritasinfo
Paul Kanimba i Kigali