Perezida Paul Kagame ati : "Urusaku rw'ibikeri ntirubuza inzovu kunywa amazi "(www.leprophete.fr)!

Kamere ntikurwa na reka ! Perezida Paul Kagame yasubiriye gutuka Abanyarwanda no kwishongora ku bazungu birenze urugero mu mbwirwaruhame! Mu ijambo yagejeje ku banyeshuri biga mu mahanga yateranirije mu kigo cya gisirikari cy'i Gako, guhera taliki ya 22 Nyakanga 2011, noneho yakuyeho agahu, yikorera abakene yasenyeye inzu za nyakatsi ,arabacunaguza karahava, yadukira n'abatinyuka kwamagana ako karengane we yita abanzi be, si ukubatuka abihanagurizaho! Ikindi kandi ni uko bigaragara ko noneho ahisemo gutera indi ntambwe mu bugizi bwa nabi mu guhindura abana b'Abanyarwanda ibyihebe no kubohereza guhiga iyo mu mahanga abadashyigikiye ibikorwa by'urukozasoni rw'agatsiko k'Indobanure ! 

1.Abakene basenyewe nyakatsi ngo ni "IBIKERI"

Muri abo banyeshuri hari uwamubajije niba abasenyewe inzu za nyakatsi bazafashwa koko na Leta kubona indi nzu, bakareka gukomeza kwangara nka roho mbi . Uwo mwana wabajije icyo kibazo n'ubwo agize amahirwe yo kujya kwiga mu mahanga asinze iwabo barasenyewe, bari ku gasozi. Ajyanye agahinda kenshi , yari agize ngo ature Umubyeyi !

Igisubizo Paul Kagame yamuhaye cyerekana uko uwo twitaga umukuru w'Igihugu ari umukuru w'Agatsiko k'indobanure z'abaherwe gusa, naho abakene ntakibashaka mu gihugu cye.Yaratinyutse arabacunaguza ngo "izo nzu za nyakatsi n'ubundi ni inzu zitabagaho kuko zavaga..... ! Ngo abasenyewe ni abanze kubaka inzu za kijyambere.. ngo bazafate inzira bambuke umupaka bajye kwibera Abarundi ! Mbega umukuru w'igihugu !! Ni aho babuze! Habe ngo aribaza ati ese abo bakene bafite ubushobozi bwo kwiyubakira inzu y'amabati ? Ibinyoma gusa , ngo Leta izabaha amabati ! Amabati se ni inzu ? Ese ubundi kuki iyo Leta itabanza ikubakira abo bakene nyuma bamara kubona inzu nziza babamo bakabona gusenyerwa iza nyakatsi! Hari uwo bubakiye inzu nziza akanga kuyituramo ? Paul Kagame si umugome gusa, ni n'UMUSHINYAGUZI, guhera ubu Abanyarwanda bamufate batyo !

Mu by'ukuri amagambo Paul Kagame yakoresheje harimo menshi ateye agahinda n'umujinya gusa. Urugero:

2.Ngo "Urusaku rw'ibikeri ntirubuza inzovu kunywa amazi".

Ndabona ikinyarwanda cyo amaze kukimenya ubwo ageze ku rwego rwo guhimba imigani y'imigenurano !

Mu mutwe wa Paul Kagame, INZOVU, ni we ubwe n'agatsiko ke k'Indobanure. Abanyarwanda bandi basigaye ni IBIKERI.  Kunywa AMAZI ni ukurya ibyiza by'igihugu ntawe uguhagaze hejuru.

Icyo uyu mugani usobanuye ni iki : N'ubwo abakene basenyewe nyakatsi zabo bakomeje gutakamba batabaza , inzovu (Agatsiko k'indobanure)  zikomereje gahunda yazo yo gukandagira rubanda no kwikubira ibyiza by'igihugu bonyine, ibikeri (rubanda rugufi) bikanuye amaso gusa ! Abo bakene bajye bakomeza baboroge ntacyo bizahindura kuri gahunda ya Paul Kagame n'Agatsiko ke k'Indobanure.

Kugereranya Abenegihugu n'IBIKERI bivuga ko nta gaciro na busa Paul Kagame abaha. Igikeri uragikandagira kigapfa, nta cyaha kirimo, nta rubanza! Niyo mpamvu Paul Kagame, iyo abonye ibikeri bikomeje gutera urusaku, abiteramo ka gerenade kamwe, ibikeri bimwe bigasandara, urusaku rugatuza, ubuzima bugakomeza.

Ng'iyo imitekerereze ya Paul Kagame, UMUKURU w'Igihugu CY'IBIKERI !!!! Ubwo kandi uwahera ku mugani uvuga ngo "umukuru w'Abatwa ni we ubategeka", ukavuga ko Paul Kagame yatangaje ko ari we GIKERI GIKURU, hari uwagira ngo uratukanye. Harya ubundi akanyamaswa(Totem) kagaragaza ubwoko bw'Abaga si Igikeri nyamabondo ? Wabona Kagame avuga ibyo azi rero !!!

3.Ngo no mu bazungu Kagame asanga harimo IBIKERI !

Ngo iyo bamugiriye inama bati yewe akarengane ingoma yawe ikomeje gukorera abaturage karakabije , gerageza urebe ko warenganura abaturage, hato batazivumbura bakakunyuza mu ryoya , ngo abasubizanya agasuzuguro byo kubikuraho ngo "Yes, Sir"= Ndiyo Bwana, ubundi akikomereza nk'aho abo bazungu ari "INKORABUSA" , ABASWA, FOOLISH...!

Ibi kandi nyagucwa abivugira kukabona bose, n'abo Bazungu bamwumva! Ese ayobewe ko abazungu bo bazi kwandika no gufata amajwi , bakaba batibagirwa? Hari ubuswa burenze ubu muri politiki ? Paul Kagame natiha akabanga, ngo nibura ajye atukana yiherereye azatuma mu byivugo n'ibisingizo asanganywe bamwongereraho n'aka kabyiniriro: "Intagereranywa mu Baswa"!

Ubwo Paul Kagame asigaye yaraciye bugufi akajya mu ishuri ry'imigani ya kinyarwanda reka mumenyeshe ko hari n'undi mugani akwiye kumenya ugira ngo "Utazi ikimuhatse , areba ubugabo bwa se igitsure!" Iyo witegereje ingiro y'umwana w'imyaka 3 gusa, ubona ko n'ubwo aba ataramenya gutekereza ibihanitse, urwo ruhinja ruba rwifitemo muri rwo igisobanuro cy'uyu mugani ! Ibi koko nabyo binanire Paul Kagame ? Ubu koko Abanyarwanda ntidukwiye kujya tugenda twubitse umutwe kubera ikimwaro cyo kuyoborwa n'umuntu nka Paul Kagame ?

Na Kadafi  wa Libiya ageze mu bushorishori bw'ikuzo rye, ntiyigeze akora ibitakaragasi nk'ibyo Paul Kagame akora, ngo atuke abazungu n'abenegihugu mu mbwirwaruhame, nyamara aho ageze ni hahandi umwana arira nyina ntiyumve! Ibya Paul Kagame byo bizarangira bite kandi ryari?

Kuba Paul Kagame atinyuka agatuka abazungu bamuremye, bakamutereka ku butegetsi  abaturage batamushaka,..agasuzugura inama nziza bamugiriye, niho ahera avugako abantu bose bamubwira ko ibyo ari ibidakorwa  ari "Ibicucu, foolish ", we wenyine, mwene Rutagambwa, akaba afite UBWENGE BWINSHI CYANE, gusa ubanza ari bwabundi Abanyarwanda bavuze bugera aho bukamena nyirabwo umutwe ! None se ko ejobundi yihenuraga ku Bufaransa ku mugaragaro, Minisitiri Mushikiwabo yirirwa atitiba inyuma y'Abafaransa ashaka iki? Gusaba uwo wimye ni umugayo utari ukwiye IMFURA , uretse nyine ko zashize mu gihugu! Ubuswa buba bwinshi, ariko ubwa Paul Kagame muri politiki ntiburarangiza kugarika ingogo ! Koko utazi ubwenge(umuswa!) ashima ubwe !

Kuba atinyuka agatuka abenegihugu ngo ni IBIKERI, icyo gitutsi akagituka abakene b'Abanyarwanda ahora anyunyuza imitsi , byerekana ko Paul ageze aha wa mugani ugira uti "Umukobwa wagashize aryama aheneye iwabo !" Bene uyu bishyira kera agasendwa, nuko akabura imishwaro(kubura aho ushwrira cyangwa umwarira!): kwishyira mu kagozi nibyo byonyine bishobora kumugirira akamaro! Paul Kagame na we akomeje rwose guhenera Abenegihugu, gusa amenye ko rurya abandi rutamwibagiwe!

4.Ibyerekeye guhindura ibyihebe urubyiruko rw'Abanyeshuri biga hanze y'igihugu.

Ku batabizi, mumenye ko ibihugu by'abazungu biri maso. Aho intore ya Kagame ikandagiye haramenyekana byanze bikunze! Abo bana Kagame ari guhindura ibyihebe ngo bakunde bemere kugira uruhare mu bikorwa bihungabanya umutekano mu Bulayi na Amerika, bamenyeko ubwo abashyize kuri "mteremko"!Ari kubasaba kwiyahura. Polisi y'i Bulayi yarangije kurita mu gutwi, amashusho yabo yageze mu byuma, Polisi irajya ibagendaho. Nimwakira uburozi ngo ni inyigisho muriguhabwa aho i Gako, mukikorera urwo ruboho rwa kabutindi ngo mujyanye Ibulayi , ntimuzarenga umutaru mutarafatwa, nuko muzarangirize ubuzima bwanyu mu buroko muzira UBUJIJI bwa shobuja!

Naritegereje ngo ndebe niba mu bana bariho bashorwa muri ibyo bikorwa haba harimo CYOMORO KAGAME, ndaheba! Abana ba rubanda rugufi, twa dupfubyi tutakigira ubaza ibyatwo, bamwe bafite ababyeyi basenyewe nyakakatsi...nibo Kagame ashaka guhindura imashini zo kuroga, no kwica abanze kuba abarenzamase b'Agatsiko!

N'ubwo gushuka urubyiruko byoroshye, ariko mfite icyizere ko aba bana b'Abanyarwanda bafite Malayika murinzi ubwira umutima  ko UMWANZI nyawe bakwiye kurwanya ari uwo nyine ubohereza muri "mission suicide"! Nibagera mu mahanga , icyo bagomba kwihutira gukora ni ugutobora bakavuga ukuntu Paul Kagame ari we "MUSAZI-Foolish", wamaze kwicwa n'umurengwe kubera kunyunyuza imitsi y'abenegihugu ( we udasiba kwigurira indege, amazu, amahoteli hirya no hino ku isi, amato mu nyanja...!.) agasubira inyuma agafata ibyemezo byo kubasenyera utururi ntacyo bamutwaye, gukona abagabo ngo batazongera kubyara, kwirukana abana babo mu mashuri makuru, kubicisha amarozi, kujya kubarasira mu buhungiro....n'ibindi by'urukozasoni bidakwiye umukuru w'igihugu.

Bana b'Urwanda  nimukanguke, dore twajwemo: Ingoma ya Paul Kagame n'Agatsiko ke, si ingoma nk'izindi, yo ni "Rujukundi". Gukunda igihugu no kwihesha agaciro ni ugutanga uwawe muganda kugira ngo Paul Kagame n'Agatsiko ke k'Indobanure  bafatwe bashyikirizwe ubutabera, Abenegihugu biruhutse, barye, baryame, basinzire, bagone.

Umwanzuro

Iyo witegereje neza ibibera mu Rwanda muri iki gihe wagira ngo urareba ya sinema yerekana igihugu cyafashwe n'Inguge (Singes), akaba ari zo zitegeka abenegihugu(les humains), zikabayoboresha imbunda n'ikiboko gusa!  Muzagerageze mushake iyo sinema muyirebe, yakozwe n'uwitwa Franklin J.SHAFFNER, ikaba yitwa "La Planete des Singes" cyangwa "Planete of the Apes". Niho Urwanda ruhagaze!Ni urwo gutabarwa.

Aimable RUKUNDO