Muri Ukraine imbaraga z'abaturage zatsinze intwaro kabuhariwe perezida n'abamurinda barahunga!

Abigaragambya barwanya ubutegetsi bwa Ukraine, bageze hafi ya Perezidansi i Kiev, kuri uyu wa Gatandatu tariki 22 Gashyantare 2014, maze bemeza ko basanze Perezida Viktor Yanukovych yahunze, nyuma y’umunsi umwe hasinywe amasezerano yemeza guhagarika ubushyamirane hagati ye n’abamurwanye.

Umuyobozi w’igice kitavuga rumwe n’ubutegetsi bwa Yanukovych, wahunze, uwahoze ari umuteramakofi kabuhariwe kugeza n’ubu, Vitali Klitschko, yavuze ko ari perezida n’abamurindaga bose bahunze umurwa mukuru bagata inshingano zabo bahawe n’itegeko nshinga.

Hafi aho ku ngoro ya perezida hari hari abakozi bashinzwe gutunganya ubusitani, ndetse n’abarinda ku marembo, abandi bose bigendeye nta muntu urangwamo imbere mu nyubako.

Klitschiko yagize ati : “Ku bw’amahirwe make, Perezida Yanukovych wanze kumva abaturage be yikuye ku nshingano ze yahawe n’itegeko nshinga ubwe. Ubu uyu munsi yamaze kuva mu murwa. Amamiliyoni y’abaturage arabona igisubizo kimwe cyonyine kuri iki kibazo kiriho. Ni ugutegura amatora y’umukuru w’igihugu byihuse.”

Nubwo byafashwe nk’aho Perezida Yanukovych yahunze, umusenateri umwe wa Amerrika yatangarije CNN dukesha iyi nkuru ko kuba Atari mu murwa mukuru ari ibisanzwe kuko ngo yaba yagiye mu mujyi wa kabiri kuri Kiev, witwa Kharkiv aho yitabiriye inama nyuma y’masezerano yaraye asinye n’abamurwanya.

Gusa kuvuga gutya, CNN yo iragaragaza ko yabashije kwigerera kwa Perezida, ndetse ikipe yayo y’abanyamakuru bari i Kiev ikinjiramo yatangaje ko bigaragara ko hari ubusa nta muntu uri kuhaba, ndetse ngo mu burasirazuba bwa Ukraine aho yahungiye niho afite abamushyigikiye benshi bo mu bwoko bwe bw’abafite inkomoko yo mu Burusiya, akaba ari naho hafungiwe Yulia Tymoshenko, umugore wigeze kuba Minisitiri w’intebe kugeza muri 2010, ndetse akaba n’umwe mu baharaniye impinduramatwara zo mu 2004.

Vitali Klitschko, wo mu ishyaka rya UDAR ritavuga rumwe n’ubutegetsi, wifuza guhatanira kuba Perezida wa Ukraine yasabye ko hategurwa amatora bitarenze tariki 25 Gicurasi uyu mwaka wa 2014.

Byavugwaga ko ku wa Kabiri tariki 25 Gashyantare, Ukraine yateganyaga gufungura Ambasade yayo i Kigali.

Source : igihe.com