Leta ya Kagame yangiye Madame Ingabire gufungurwa by’agateganyo

Uyu munsi urukiko rukuru rw’u Rwanda rwanze ubujulire bwa Madame Victoire Ingabire, Perezida wa FDU-Ikingi, bwo  kurekurwa by’agateganyo.

Nyuma yaho Madame Ingabire asabiye gufungurwa by’agateganyo akaburana ari hanze, dore ko  bivugwa ko ibirego aregwa by’uguhungabanya umutekano w’igihugu ari ibihimbano by’abashinzwe  umutekano muri Leta ya  Kagame, bikaba bigamije kumwihimuraho kubera kutavuga rumwe nabo muri politiki.

Madame Ingabire akaba yatwawe mu rukiko rukuru rwa Gasabo yambaye amapingu, akagera mu rukiko bakabura umucamanza ari bwo abarinda gereza baje kumumenyesha ko yasomewe kandi ko yimwe uburenganzira bwo kurekurwa by’agateganyo kugeza ubushinja bumaze gukusanya ibirego aregwa.

Twabibutsa ko Perezida Kagame yavuze mu minsi ishize ko Madame Ingabire aregwa ibyaha bigera kw’icumi, kugeza ubu ubushinjacyaha bukaba bumaze gukusanya ibirego biri hagati ya 5 na 7, mu gihe abakurikiranira hafi ibya politiki mu Rwanda bemeza ko ijambo rya Kagame ari ryo rikunze guha umurongo-ngenderwaho  ubushinjacyaha hamwe n’inkiko z’u Rwanda.

Ibi bije mu gihe ubushinjacyaha bukomeje kwandikira ibihugu bitadunkanye bicumbikiye abavadimwe ba Madame Victoire Ingabire bibasaba gusaka imiryango yabo kubera ko bufite ibimenyetso ko akorana n’imitwe y’iterabwoba ariyo FDLR hamwe na CDF, abenshi bakaba bemeza ko CDF yashinzwe n’umutwe w’iperereza rya Perezida Kagame.
Amakuru atugeraho na none yemeza ko inzego za Perezida Kagame zikomeje kugenda zitera ubwoba abantu batandukanye b’abarwanashyaka ba FDU zibasaba gushinja madame Ingabire ko akorana n’imitwe y’iterabwoba kandi ko ngo bari banagamije gutera u Rwanda. Abantu bagera kw’icyenda bamaze gutabwa muri yombi bakaba bafungiwe muri gereza za Gisenyi na Kigali, bategereje gushinja Madame Ingabire,  naho 4 bamaze gutegekwa gusaba imbabazi ko bakoranye n’imitwe y’iterabwoba kandi bakaba banategereje kuzamushinja.

Ikindi nukwo banamaze kugenda bashakisha bamwe mubayoboke ba FDU-Inkingi  hirya no hino mu Burayi, babasaba kwemera kuzashinja Madame Ingabire ko yabakoresheje mu   bikorwa bigamije guhirika Leta ya Kagame, k’uburyo amakuru dufitiye gihamya kandi tuzagarukaho mu nkuru zacu z’ubutaha, yemeza ko bamwe mu bayoboke banze kwifatanya na Leta y’u Rwanda mu gushinja Madame Ingabire ikinyoma, bamerewe nabi cyane mu bihugu batuyemo.
 
Twabibutsa ko ibihugu byinshi birangajwe imbere na Leta y’ubwongereza biherutse gusaba Kagame gufungura uriya mubyeyi akanangira, asobanura ko akorana n’imitwe y’iterabwoba, ariyo mpamvu akomeje gukoresha amafaranga aturuka mu misoro y’abaturage hamwe no mu nkunga ahabwa n’amahanga agura abajya gushinja Madame Ingabire ikinyoma kigamije kumucisha umutwe hamwe no kumuheza muri gereza.

Gasasira