KOKO AKABAYE ICWENDE NTIKOGA

Uyu mugani waciwe n’abanyarwanda bo hambere iyo bashakaga kuvuga imico y'umuntu itajya ikunda guhinduka, nubwo yakwigishwa bihagije cyangwa se akerekwa ingero z’ibintu bifatika.

Muri iyi minsi FPR na Paulo Kagame bagize ubwoba bwinshi, kuva aho baboneye abayihunze bashyira hamwe bakavuga ibikorwa bigayitse bikorwa na leta ya Kagame,  ariko icyaba cyarazengereje Kagame bikomeye ni uruhurirane rw’amabanga yibyaha bye rwagiye rusohoka, harimo; Rwanda briefing ya Kayumba Nyamwasa, Rwanda mapping repport ya LONI; yakomeje kwikanga bikomeye bitewe nigitutu cyabatavuga rumwe nawe barimo cyane FDU na RNC nabandi, ibyo byatumye Kagame ahindura imikorere, maze yerekeza mubamuhunze baba mu mhanga.

Kagame n’abambari be bazwi kukazina k’intore, basanze ikihutirwa muri iki gihe ari ugusanga izo mpunzi hirya no hino, zigashukishwa ubuhendabana bw’amafaranga, hagakoreshwa z'amabassades mu kwamamaza izina rya Kagame, maze intore zigakwirwakwizwa hirya hino, ibihugu abantu bahungiyemo bigahatirwa kubacyura kungufu.

None koko nuwahoze ari Minisitiri w’intebe Petero Selesitini Rwigema aremeye koko asubiye gucinya inkoro ibukuru ngo yongere guhakwa (Ndr: ku ifoto iri hejuru murabona uwari Ministre w'ububanyi n'amahanga GASANA Anastase nawe wahunze Kagame amuramutsa n'ibyubahiro byinshi mu ihuriro ryateguwe na leta y'u Rwanda ryo kwihesha agaciro i Chicago muri leta zunze ubumwe z'Amerika), burya koko akabaye icwende ntikoga koko.

ITURUFU YA JENOSIDE ITANGIYE GUHINDAGURWA

Abantu bakurikiranye imibereho ya Colonel Alexis Kanyarengwe ya nyuma, bemeza ko yapfanye agahinda gakomeye, kuko yari yarabujijwe kuba yasohoka mu gihugu ngo ajye kwivuza, ndetse bikanavugwa ko kuva atakiri mu butegtsi atashoboraga kuba yatumirwa mu minsi mikuru ya FPR nkumuntu wigeze kwitwa umukuru wayo, byateye abantu kwibaza byinshi igihe babonye hatangwa imidari yo kubohoza igihugu ariko mubayihawe bose hakaba hatarigeze humvikana izina rya Kanyarengwe wari ukuriye FPR. nyamara abasesenguzi bibintu nibindi mu Rwanda bemeza ko icyo yaziraga ngo ryari ijambo yaba yarigeze kuvuga kera, aho yavuze ko atazibagirwa na rimwe icyatumye amera uruhara imburagihe aricyo cyamupfuye umusatsi, aha nababwira ko amateka avuga ko insoresore za lunari zigeze gukurubana Kanyarwengwe hasi, maze akomereka mu mutwe apfuka umusatsi ntiwongera kuhamera bibaho. Iyo nzigo y’iryo jambo ngo yaba ariyo yakomeje kuzira kugeza ubwo yapfuye ngo asigaye yarahindutse umurobyi, ubwo yirirwaga kubyuzi bye yororeragamo amafi i Kabuga yarimwe akandi kazi hamwe nicyubahiro, nyamara amaze gupfa ntibabuze guteza ubwega batwikiriza umurambo we ibendera rya FPR.

Petero Selestini Rwigema umenyereye ubuhake, yabonye Twagiramungu Faustini wari Minisitiri w’intebe ahambirijwe azira kwamagana ingoyi no kwicwa kwabantu byakorwaga na Kagame, yihutira guhakirizwa ngo amusimbure maze koko uwo mwanya aba arawuhawe, ariko ntibyatinze abona ko rwose Kagame atagira Roho Mutagatifu maze aba ahimbiwe jenoside akizwa namaguru nkabandi bose. Abannyarwanda bacitse kwicumu bakomeje kwibaza uwaba apfobya jenoside mu byukuri, niba ari utavuga rumwe na Kagame cyangwa niba ari Kagame uyikoresha nkiturufu ya politiki (Ndr:ifoto ya Rwigema aha ku ruhande).

Ubwo intore za Kagame zari zimaze gukwirakwizwa isi yose kubuza abantu bayihunze kwishyirahamwe, bakomeje no gushakisha abigeze gukorana nayo harimo nabacuruzi bari bakomeye nka ba Kajeguhakwa Valens basubijwe kwisuka nabandi, maze Petero Selesitini Rwigema aboneraho akanya ko kongera guhakwa ngo asubizwe imitungo ye yari yarambuwe barabimwemerera kandi bamusezeranya ko azahita akurwa kuri listi yabakoze jenoside bashakishwa, ibyo rero byatumye Petero Selesitini Rwigema atavuga ikintu na kimwe kibi kubutegetsi bwa kagame nkuko twumva abandi bahoze ari abanyapolitiki bakomeye bavugira ku maradiyo mpuzamahanga, harimo nka Yozefu Sebarenzi Kabuye nabandi benshi.

Nyamara Rwigema najye yibuka amagambo yavuze ku maradiyo mpuzamahanga akimara guhunga, ubwo yasabaga abanyarwanda bose kuva hasi bagashyigikira Perezida Pasiteri Bizimungu wari umaze gufungwa, none se ubwo yibwira ko ubwo Kagame atibagiwe ijambo ryavuzwe na Kanyarengwe, azibagirwa iryo ryavuzwe na Petero Selesitini Rwigema?

Amagambo aherutse kuvugwa na Petero Selesitini Rwigema kuri BBC  ubwo yakurwaga kuri iyo listi yabajenosideri, yatangaje abantu cyane bumvishe umuntu nkawe uzi ubwenge atinyuka akavuga ko ashima parike ya Kagame ! Biteye gusetsa cyane, ese Parike yita abantu abanyabyaha kuko batavuga rumwe na Kagame ikwiye gushimwa? parike yita abarwanyi ba FDRL abajenosideri iyo bari mu mashyamba, ariko bamara kwezwa na FPR  bemeye kuba intore za Kagame bagahita bitwa abatagatifu,  maze bagatangira gushinja ubuterahamwe Rujugiro Tribert, Ingabire Victoire, Kayumba Nyamwasa, Rusesabangina nabandi. Aya magambo yavuzwe na Rwigema kuri BBC agaragaza kutagira umurongo ngederwaho, yibukije abanyarwanda bazirikana, andi magambo yavugiye ahahoze hitwa i Cyangugu ubwo yajyaga gutangiza umwaka w’amashuri nyuma yintambara ubwo yari Minisitiri w’amashuri, icyo gihe yikomye cyane impunzi zari muri Kongo hakurya ye,  icyo gihe Rwigema yabakubiye mu gatebo kamwe abita bose abicanyi, ndetse ntibyatinze kuko nyuma gato yayo magambo ya Rwigema, Fred Ibingira yahise yambuka yica impunzi zitagira ingano zari zarahungiye mu kirwa bita IJWI, urupfu rw’izo mpunzi ntirukunze kwibukwa. Nyamara bamwe mu banyarwanda bamukomeye mu mashyi icyo gihe ubwo yavugaga ijambo barongoreranye bati: Ruriye abandi rutamwibagiwe, kandi niko byagenze koko, kuko bidatinze nawe yiswe umwicanyi nkabandi.

UBUBWA NTIBUVA MU MBWA

Umuntu wari uvuye mu giturage yatembereye i Burayi ahageze atangazwa no kubona imbwa zaho zirara mu nzu kandi zikuhagirwa kimwe nabantu, maze aratangara cyane aravuga ati: mwa mbwa mwe babuhagire bagire bate, babaraze munzu nkabantu, ariko ububwa bwanyu ntibuzabavamo kuko mutazigera murisha intoki kandi ngo murire no kumeza nkabantu.

Petero Selesitini Rwigema wahoze yita impunzi zahunze Kagame zose abicanyi, akabona Kagame aramumenesheje, abantu bakagira ngo noneho amenye ubwenge arahumutse ariko byabaye ibyubusa. Rwigema wageze hanze akakirwa neza nimpunzi bagenzi be yitaga abicanyi, arongeye aratannye kubera inda nini. Ese yibwira ko Parike ya Kagame itangiye kwivuguruza mu rwego mpuzamahanga igeze he koko? Parike ishinja Deo Mushayidi wiciwe umuryango muri jenoside gufungwa burundu azira kutavuga rumwe na Kagame, maze abamwiciye bemeye kuba intore za Kagame bakitwa abamalayika agatinyuka akavuga ko ayishima?

Reka nsabe Petero Selesitini Rwigema kuzansuhuriza mucuti we Perezida Pasiteri Bizimungu nagera i Kigali, ariko mugire inama yo kwitonda kugirango atongera gusubizwa kuri listi yabajenosideri ikorwa uko babyumva, aragende yitonze kuko natagendera kumurongo wa munyangire nk’izindi ntore, ashobora kuzisanga  iruhande rwa Karoli Ntakirutinka. Ariko ikibabaje n’uko naramuka apfuye atazabona ibendera bamutwikiriza nka Kanyarengwe kuko azasanga MDR ye barayihinduye ayo ifundi igira ibivuzo.

Koko ububwa ntibuva mu mbwa!

MUKAMUGEMA Prudencienne

BELGIQUE