Kimwe mu bibazo byajyanye Kagame Paul muri Congo Brazza harimo n'impunzi z'abanyarwanda baba muri icyo gihugu!

Publié le 18 février 2013 par veritas

Paul Kagame yasoje uruzinduko yakoreye muri Congo Brazza ku cyumweru taliki ya 17 Gashyantare 2013. Urwo ruzinduko akaba yararumazemo iminsi 2 ari mu mujyi witwa OYO ari naho perezida Sassou- Nguesso wa Congo Brazza avuka.

Abo bakuru b’ibihugu byombi bakaba biyemeje kugaragaza ubushake mu gushakira igisubizo ikibazo cy’umutekano muke uri muburasirazuba bw’igihugu cya Congo Kinshasa mu ntara ya Kivu aho inyeshyamba za M23 zikomeje guca ibintu. Twabibutsa ko intumwa za leta ya Congo ziri mu mishyikirano n’uwo mutwe mu mujyi wa Kampala zatangaje ko imishyikirano yarangiye zikaba zitegereje umwanzuro wa perezida Museveni wa Uganda.

Perezida w’u Rwanda Paul Kagame yavuze ku kibazo k’impunzi z’abanyarwanda barenga ibihumbi 7 bahungiye muri Congo Brazza, yibutsa ko ubuhunzi bw’abo banyarwanda buzarangira ku italiki ya 20 kamena 2013 nk’uko byumvikanyweho na leta y’u Rwanda n’ishami rishinzwe impunzi rya HCR, bityo kuri iyo taliki bakazaba batakaje ubuhunzi bwabo.

Congo Brazza yahaye ubuhungiro abanyarwanda barenga ibihumbi 7 ;abo banyarwanda bakaba babanye neza n’abaturage ba Congo Brazza kandi bakaba bakora imirimo y’ubuhinzi ,ubworozi n’ubucuzi biteza imbere ubukungu bw’icyo gihugu. Abo banyarwanda bageze muri icyo gihugu mu mwaka w’1997 ubwo Kagame Paul yiyemezaga gutera inkambi z’abanyarwanda bari muri Congo Kinshasa (Ex-Zaïre) agakorera izo mpunzi ibikorwa bya jenoside nk’uko bigaragara muri raporo maping ya ONU, abacitse ku icumu bagahungira mu bihugu binyuranye harimo na Congo Brazza.

Mu mwaka w’2011 Congo Brazza yavuze ko impunzi z’abanyarwanda ziri muri icyo gihugu zizaba zifite uguhitamo gutatu nyuma y’uko ubuhunzi bwabo buzaba burangiye. Uguhitamo kwa mbere ni uko impunzi z’abanyarwanda ziri muri Congo Brazza zizahitamo guhabwa ubwenegihugu bw’icyo gihugu ; uguhitamo kwa kabiri ni uko impunzi z’abanyarwanda ziri muri Congo Brazza zishobora kujya kuba mu bindi bihugu ; uguhitamo kwa gatatu ni uko impunzi z’abanyarwanda ziri muri Congo Brazza zishobora kwiyemeza gusubira mu Rwanda kubushake bwazo ; buri wese akaba afite uburenganzira bwo kuzahitamo ikimunogeye.

Mu mwaka w’2012 Marcel Gatsinzi ushinzwe impunzi muri leta ya Kagame yanyarukiye muri Congo Brazza kujya gushishikariza abanyarwanda bahungiye muri icyo gihugu gutaha mu Rwanda ;yabijeje ko umutekano wabo utazahungabana mu gihe bazaba batashye ; kimwe mu bibazo impunzi z’abanyarwanda zabajije Marcel Gatsinzi muri urwo rugendo, ni uko zamusabye ko yabanza gucyura umuryango we uri hanze mbere yo gushishikariza abandi gutaha.

Ishami ry’umuryango w’abibimbye ryita ku mpunzi (UNHCR) rigaragaza muri raporo yaryo ko abanyarwanda 20 gusa bafite icyemezo cy’ubuhunzi aribo bafata icyemezo cyo gutaha mu Rwanda buri mwaka, mu gihe abanyarwanda b’impunzi bari hanze ubu barenze ibihumbi 71 !

Veritasinfo.fr