Karegeya aranenga ikirego cyo kwambura Kayumba Nyamwasa ubuhungiro

Colonel Patrick Karegeya aranenga ikirego cyagejejwe mu nkiko n’itsinda ry’imiryango iharanira uburenganzira bwa muntu muri Afurika y’epfo isaba ko Nyamwasa yakwamburwa uburenganzira bwo kuba impunzi muri iki gihugu.

Nk’uko tubikesha ikinyamakuru BusinessDay cyandikirwa muri Afurika yepfo, amashyirahamwe abiri yo muri iki gihugu arimo iryitwa Southern African Litigation Centre ndetse n’iryitwa Consortium of Refugees and Migrants Rights SA, mu cyumweru gishize, yashyikirije urukiko rukuru rwo muri kiriya gihugu impapuro z’ibirego bisaba ko Lt-Gen Nyamwasa yakwamburwa uburenganzira bwo kwitwa impunzi.

Kayumba Nyamwasa yemerewe ubuhungiro mu mwaka ushize n’urwego rushinzwe ibibazo by’imbere mu gihugu (Department of Home Affairs) muri Afurika Yepfo.

Ariko ikinyamakuru BusinessDay kivuga ko ariya mashyirahamwe ubusanzwe afite icyicaro mu mujyi wa Johannesburg, atishimiye kiriya cyemezo. Avuga ko Lt-Gen Nyamwasa “yagize uruhare rukomeye mu bikorwa byaganishije kuri jenoside yabaye mu Rwanda muri Mata 1994”, ibikorwa ngo birimo n’iraswa ry’indege yari itwaye uwari Perezida muri kiriya gihe Juvenal Habyarimana.

Kubera iyi mpamvu, aya mashyirahamwe avuga ko Nyamwasa akwiriye gufatwa nk’umuntu wacitse ubutabera.

Nyamara, ku wa mbere w ‘ iki cyumweru, Patrick Karegeya ufatwa nk’umwe mu bantu ba hafi ba jenerali Kayumba Nyamwasa, yavuze ko ikirego cy’ariya mashyirahamwe abiri aharanira uburenganzira bwa muntu “cyuzuyemo ubujiji.” ("absurd")

Mu kiganiro na BusinessDay, Karegeya uvuga ko ibya kiriya kirego nawe yabibonye, yagize ati:"… harimo ubujiji bwinshi kuba barimo guhangana n’ibyo badasobanukiwe na busa. Nta kabuza nawe (Lt-Gen Nyamwasa) azabirwanya”.

Lt-Gen Nyamwasa arashakishwa n’ibihugu bitandukanye birimo ndetse n’u Rwanda nyuma y’igihano yakatiwe n’urukiko rwa gisirikare cyo gufungwa imyaka 24, naho mugenzi we Col Patrick Karegeya agakatirwa imyaka 20. Bose bakatiwe badahari.

Urukiko rwa gisirikare rwabahamije ibyaha byitandukanye birimo guhungabanya umutekano w’igihugu no gukwirakwiza amacakubiri ashingiye ku moko.

Banahamijwe kandi icyaha cyo kurema umutwe w’abagizi ba nabi n’icyo gusebya umukuru w’igihugu.

Nyamara ku itariki 02 Kanama umwaka ushize, Karegeya yabwiye ikinyamakuru The Observer cyo muri Uganda ko ibyaha bahamijwe babirezwe kubera impamvu za politiki (politically motivated), akomeza avuga ko biriya byaha “ari ibipapirano, kandi bidafite.” ishingiro

Impapuro zita Kayumba muri yombi

Umushinjacyaha wo muri Espagne (Spain) yasohoye inyandiko zo guta muri yombi uyu mugabo w’imyaka 51 kuri ubu, kubera uruhare ashinjwa kuba yaragize mu iyicwa ry’abakozi b’abenegihugu bayo bagera kuri bane bakoreraga umuryango Medecins du Monde.

Amashyirahamwe Southern Africa Litigation Centre na Consortium for Refugees and Migrant Rights avuga ko bitumvikana ukuntu Afurika y’epfo yahaye ubuhungiro umuntu ukekwaho ibyaha byibasira inyoko muntu.

Gusa, aya mashyirahamwe avuga ko Kayumba atagomba koherezwa mu Rwanda kuko ngo icyo gihe “ashobora gutotezwa”.

Umuvugizi w’urwego rw’ubutabera muri Afurika yepfo, Tlali Tlali yatangarije BusinessDay ko Leta ya Afurika yepfo itaricara ngo yige kuba Nyamwasa yakoherezwa muri kimwe muri biriya bihugu bimushakisha.

Clayson Monyela, umuvugizi w’urwego rushinzwe imibanire n’andi mahanga muri Afurika yepfo we avuga ko kuri ubu bakiri kuganira n’uwari ahagarariye Afurika y’epfo mu Rwanda Dumisani Gwadiso, kuri ubu umaze amezi 10 ahamagajwe igitaraganya na Leta ye.

Ibi byabaye nyuma yo kuraswa mu mujyi wa Johannesburg kwa Lt. Gen. Kayumba Nyamwasa ariko ntagire icyo aba kuko yakomeretse gusa mu nda.

Icyo gihe, Ayanda Ntsaluba, umuyobozi mukuru muri minisiteri y’ ububanyi n’amahanga ya Afurika yepfo yabwiye BBC ko ihamagazwa ry’ambadaderi wabo ridasobanuye gucana umubano kwabo n’u Rwanda.

Yagize ati: "Reka mbivuge neruye. Ntabwo twacanye umubano na Leta y’u Rwanda.

Rudakemwa Sangano G. (igitondo)