Impuguke za ONU zikomeje gushinja u Rwanda gufasha M23 naho Kagame akaba ashaka kwegura !

                  Iyi nimwe mu makarita u Rwanda rwakoreye ingabo zohereje muri M23

Impuguke za ONU zikomeje kugeza ku kanama gashinzwe amahoro ku isi ibimenyetso bigaragaza ko u Rwanda rukomeje gufasha umutwe wa M23 urwanira muburasirazuba bwa Congo. Kuwa gatatu w’icyumweru gishize taliki ya 08/08/2012, impuguke za ONU zatanze ibindi bimenyetso bishinja u Rwanda, mu bimenyetso batanze harimo icy’uko u Rwanda rwiganye ibyangombwa birimo amakarita ya gisilikare n’abashinzwe umutekano b’igihugu cya Congo maze bakora ameze nkayo bayaha ingabo z’u Rwanda binjiza mu mutwe wa M23 (ikarita z'ingabo z'u Rwanda zanditse nabi)kugira ngo nibaramuka bafatiwe kurugamba bazitirirwe abasilikare ba M23 bahoze mu ngabo za Congo.

Hari umumaneko w’u Rwanda wafatiwe muri Congo mu minsi ishize n’ingabo za Congo yiyita uwo mu mutwe wa M23, bamubaza ibyangombwa bye maze atanga ikarite y’uko ari maneko wa Congo nkuko igaragara hejuru ; ingabo za Congo ziyisuzumye neza zisanga harimo ikosa mu myandikire yayo, uretse n’ijambo u rwanda ryari ryanditseho , basanze n’ijambo « défense » ry’igifaransa ryanditse n’inyuguti ya « C » bivuga ko ryari ryanditse mu cyongereza, kuri iyo karita hakaba hari handitse « Forces Rwandaises de Défence » ubwo  ingabo za Congo zahise zimushyikiriza impuguke za ONU zikurikirana ikibazo cy’uwo mu maneko. Impuguke za ONU zasanze ari umusilikare w’u Rwanda woherejwe muri M23 maze asobanurira izo mpuguke uko byose byagiye bikorerwa ingabo z’u Rwanda ziri gufasha mu mirwano uwo mutwe. Ibimenyetso byose izo mpuguke zabonye zabishyikirije akanama gashinzwe amahoro ku isi ku italiki twababwiye haruguru, ubwo akaba ari ubugira kabiri izo mpuguke zishyikirije ibimenyetso bigaragaza ko u Rwanda rukomeje gufasha umutwe wa M23 mu gihe kitarenze amezi 2.

Kuba rero ingabo za ONU ziri muri kariya gace bibangamiye u Rwanda cyane kuko amanyanga yose rukora muguhungabanya umutekano wa Congo ahita agera mu kanama gashinzwe umutekano ku isi bikozwe n’impuguke za ONU zirimo zikurikirana ibibera muburasirazuba bwa Congo kandi imyanzuro y’izo mpuguke amaherezo ikaba izatera abayobozi b’u Rwanda gukurikiranwa mu nkiko mpuzamahanga mpanabyaha kubera ibyaha bikorwa n’umutwe wa M23 !

Ibisobanuro by’u Rwanda biratangaje !

Nyuma y’uko ibimenyetso bishinja u Rwanda by’uko rufasha umutwe wa  M23 bishyiriwe ahagaragara, ibisobanuro abayobozi b’u Rwanda batanga biratangaje. Bimwe mubisobanuro by’u Rwanda turabihabwa na Kagame Paul ubwo yitabiraga inama y’Afurika y’iburasirazuba ku itangazamakuru, Kagame Paul akaba yaragize ati : 

« Ubwo bakoraga iyo raporo, ni gute abantu biyita impuguke bibagiwe kubaza u Rwanda ibyo ruvuga ku byo rushinjwa. Nyuma yaho icyo twaje kuvumbura ni uko umuyobozi w’izo mpuguke zakoze raporo ari umuntu ukwirakwiza ibitekerezo bya FDLR nk’uko bigaragazwa n’inyandiko yagiye asohora 2004, 2006 n’iyindi myaka. Twashakashatse izo nyandiko zose tubwire Loni tuti “ Uburyo mwakoze raporo burapfuye none nimurebe n’izi nyandiko”. Babuze aho barigitira nubwo batajya bakorwa n’ikimwaro ariko nyine barabyivurugutamo byarabayobeye. »

Perezida Kagame yongeye no gushimangira ko ntaho U Rwanda ruhuriye n’ikibazo cya Congo, kuko ngo intambara yaho yazutse kubera abanyamahanga bakomye rutenderi bagashuka Kabila ngo gufata General Bosco Ntaganda bizamurinda ibibazo ku buyobozi.

Iyo witegereje ibisubizo bya Kagame ku kibazo cya Congo usanga bisekeje kandi bivuguruzanya ! Kuriwe asanga kuba ibimenyetso byinshi byaravumbuwe n’impuguke za ONU by’uko u Rwanda rufasha umutwe wa M23 byaratewe n’impuguke iyoboye izindi yakwirakwije ibitekerezo bya FDLR mu myaka ya 2004,2006 !! Ubwo byaba bishatse kuvuga ko uyu mugambi wo guhungabanya Congo Kagame yari awusangiye na FDLR mbere y’iriya myaka avuga kuburyo muri uyu mwaka w’2012 atangiye gushyira gahunda ze mu bikorwa abagize FDLR bakamuvamo bagaha impuguke za ONU ibimenyetso byose kuko bari babizi mbere !

None se ni gute Kagame yarega impuguke ya ONU ko yakwije ibitekerezo bya FDLR bigatuma bavumbura ibimenyetso byose bigaragaza uko ahungabanya umutekano muri Congo uyu mwaka ? None se kugira ibitekerezo bya FDLR bihita biha umuntu kumenya ibyo kagame azakora mu myaka 6 n’uburyo azabikoramo ? Kagame arongera agasimbuka akavuga ko amahanga yashutse Kabila ngo afate Ntaganda bigatera umutekano muke ! None se amahanga ni FDLR, ari amahanga ari na FDLR ni nde washutse Kabila ? Ese FDLR niyo yatoresheje Kabila ku ngufu kuburyo imurwanirira cyangwa ni M23 yatoresheje Kabila ?

Kuri Kagame , amahoro agomba kubaho igihe cyose badahannye umugizi wa nabi ? Ese yamenye ate ko Ntaganda agiye gufatwa kandi ntaho ahuriye n’ibibera muri Congo ? Birumvikana neza ko igisubizo cya Kagame gishobora gutangaza abagize akanama gashinzwe umutekano ku isi ! Mbese muri make n’igisakuzo !

Ibihihiswa : Kagame ngo yaba ashaka kwegura !

Nyuma y’inkuru ivuga ko Karenzi Karake yaba ariwe ibihugu by’ibihangange byifuza ko yasimbura Kagame Paul mu gihe cya vuba maze akagarura umutekano mu karere akanashyiraho guverinema y’inzibacyuho ihuriweho n’amashyaka yose (ari hanze n’imbere mu gihugu) maze iyo guverineme igategara amatora muri demokarasi isesuye, ubu Kagame Paul yaba arimo ashakisha inzira y’ubusamo yatuma aburizamo uwo mugambi!

Amakuru arimo acicikana mu bantu benshi bari hafi y’inzego zifata ibyemezo mu muryango wa FPR inkotanyi i Kigali ni uko Kagame Paul ashaka kwegura ku mwanya w’ubuyobozi maze agahita asimburwa n'umugore we Jeanette Kagame kuri uwo mwanya, bityo igihugu kigashobora gufungurirwa inkunga y’amahanga kandi umugore agakomeza kumurengera ndetse na Kagame akamutegekeramo! Hari abandi banyamuryango ba FPR basanga bitagira icyo bihindura bagasanga byaba byiza Kagame Paul yasimbuwe na Jean Paul Ndindamahina (umuntu utazwi muri politiki y'u Rwanda), bityo bikaba byahita bigaragara ko habaye impinduka bikanafasha Kagame kumukoreramo nta nkomyi ! Kugeza ubu umwanzuro ukaba utarafatwa !

Ngizo ingaruka zo gutinda kuva kubutegetsi no kwica abantu ukazapfa utabarangije !

Ngoga Jean veritasinfo