Rwanda: Ni iyihe mpamvu ituma FPR yarahisemo iterabwoba ryo gushimuta Abanyarwanda ? Hakorwa iki ngo rihagarare ?

Taliki ya 30 Kanama buri mwaka ni umunsi mpuzamahanga wahariwe kwibuka abantu bashimutwa. Kuri iyo taliki, Abanyarwanda benshi bibuka kandi bakarushaho gutekereza ku mibereho igoye y’abavandimwe babo, inshuti, n'abandi banyarwanda bakomeje gushimutwa n’ubutegetsi buriho mu Rwanda muri iki gihe. Mu gihe leta ya FPR-Inkotanyi ikomeje kotswa igitutu n'amahanga ndetse n'abanyarwanda ubwabo, niko iri kugenda irushaho kongera ibikorwa by’iterabwoba byo gushimuta abanyarwanda.

Nk’uko abasesenguzi mu bya politiki babivuga, ibibazo by'uburenganzira bwa muntu byakomeje kwiyongera mu Rwanda kuva FPR yafataga ubutegetsi muri Nyakanga (7) 1994. Ibikorwa byo gushimuta abantu, kuburirwa irengero, no gucecekesha abashobora gutanga ibitekerezo bitandukanye n'iby'ubutegetsi bwayo birakomeje kandi ubwo bugizi bwa nabi bukaba bugera no ku baturage basanzwe.

Impamvu zituma Ubutegetsi bwa FPR bukomeza gushimuta abaturage :

Abasesenguzi batandukanye bemeza ko kimwe mu by’ingenzi bituma leta ya FPR ikoresha iterabwoba ryo gushimuta abantu ari «uburyo bwo gushaka gucecekesha amajwi y’abantu banenga imikorere yayo mibi». Mu gihe ubutegetsi bwa Kagame bwakunze kuvugwaho kurwanya cyane abarwanya ubutegetsi bwe, ibi bikorwa by'iterabwoba byo gushimuta abantu bigamije gutera ubwoba buri wese watekereza gutanga ibitekerezo binyuranye n'ibya leta ye. Hari kandi n'abavuga ko ibi bikorwa bifitanye isano n’uburyo bwo «kugerageza kubungabunga umutekano w'igihugu», ariko hifashishijwe uburyo bw’iterabwoba no guhonyora uburenganzira bwa muntu ; muri gahunda yo «gushimangira ubutegetsi buriho ubuziraherezo»!

Ibishobora gukorwa kugirango iri terabwoba rihagarare:

Kugira ngo ibikorwa bibi nk’ibi bya FPR bihagarikwe burundu, abasesenguzi bavuga ko hakenewe ingamba zikomeye zivuye mu rwego mpuzamahanga , mu rwego rw’ubutabera ndetse no mu baturage ubwabo. Izo ngamba zishobora kuba:

Le 30 Août 2024: Journée Internationale des Disparus.

Au #Rwanda, les disparus sont nombreux, beaucoup plus nombreux que le régime de #PaulKagame ne cesse de faucher leurs vies chaque jour.

Ça fait plus de 30 ans que le régime #FPR_Inkotanyi commette des crimes contre les… pic.twitter.com/mu3uwCspYg

— MPOZEMBIZI Théophile (@TheoMpoze) August 30, 2024

1.Gushyira igitutu kuri leta y'u Rwanda: Imiryango mpuzamahanga, harimo Umuryango w’Abibumbye (UN) n’Umuryango w’Ubumwe bw’u Burayi (EU), bakwiye gukomeza guhatira leta y'u Rwanda guhagarika ibikorwa byo gushimuta abaturage no kubanyereza.

2.Gukora iperereza ryimbitse: Inzego z’ubutabera zo mu Rwanda ndetse n’izindi nzego mpuzamahanga, nk’Urukiko Mpuzamahanga Mpanabyaha (ICC), zigomba gukurikirana no guhana abagaragara mu bikorwa byo kwica no gushimuta abantu baba babikoze ku giti cyabo cyangwa babitumwe n’ubutegetsi bwa FPR-Inkotanyi.

3.Kongera ubushobozi bw’abaharanira uburenganzira bwa muntu: Imiryango itegamiye kuri leta n’abanyapolitiki bagomba kugira uruhare mu kurwanya no kwamagana ibikorwa byo gushimuta abantu bikorwa n’ubutegetsi bwa FPR no guharanira ko abanyarwanda bagira amahoro n’uburenganzira busesuye.

4.Gushyira imbere ibiganiro by’amahoro: Kuganira hagati ya leta n’abatavuga rumwe na yo bishobora kuba imwe mu nzira yo kugabanya ibi bikorwa bibi, cyane cyane niba ibyo biganiro bigamije gushyira imbere iyubahirizwa ry’uburenganzira bwa muntu kandi umuryango mpuzamahanga ukabigiramo uruhare.

Mu gihe abantu benshi basaba ko ibi bikorwa bibi bya FPR byo gushimuta abantu bihagarara, ubutegetsi bwa FPR bugomba kumva ko bufite uruhare runini mu kubahiriza amategeko mpuzamahanga no kurwanya iterabwoba rikomeje kwigaragaza ku isi ryo gushimuta abantu. Guhagarika ibikorwa byo gushimuta no kuburirwa irengero ntabwo ari igikorwa cy’abashinzwe uburenganzira bwa muntu gusa. Kugira ngo amahoro n'ituze bisagambe mu Rwanda, birasaba ko ubutegetsi bw'iki gihugu bwerekana ubushake bwa politiki bwo guha buri Munyarwanda amahirwe angana yo kugira uburenganzira busesuye no kugaragaza ibitekerezo bye nta bwoba.

Veritasinfo.