RDC : Inyeshyamba za M23 zagabye igitero gikomeye ku ngabo za Congo FARDC.

Amakuru dukesha itangazamakuru rikorera mu burasirazuba bwa Repubulika ya Demokarasi ya Congo (RDC) aremeza ko mu gitondo cyo kuri uyu wa kane, tariki ya 13 Kamena 2024 (06), inyeshyamba za M23 zagabye igitero gikomeye ku birindiro by’ingabo za Congo (FARDC) biri ahitwa Butalongola, biherereye mu bilometero bicye ngo ugere « Kanyabayonga » mu ntara ya Kivu ya ruguru.

Amakuru aturuka muri ako karere yemeza ko izi nyeshyamba za M23 zirimo ziterwa inkunga n’ingabo z’u Rwanda (RDF) ndetse n’iza Uganda (UPDF) mu mirwano iri kuba yakurikiye icyo gitero. Iki gitero cyatunguye ingabo za FARDC, ariko zikaba zahise zisuganya ku bufatanye n’indi mitwe yitwaje intwaro y’abaturage b'ako karere izwi ku izina rya «Wazalendo».

Mu buryo bwihuse, ingabo za FARDC hamwe na Wazalendo zashoboye kwiyegeranya no gukumira icyo gitero cy’inyeshyamba za M23. Gusa, kugeza ubu twandikaga aya makuru, imirwano yari igikomeje hagati y’izi mpande zombi, aho impande zombi zikomeje guhangana bikomeye.

Iki gitero kibaye nyuma y’igihe gito habaye agahenge gato mu mirwano yari imaze iminsi irimo kuba muri aka karere. Abaturage bo muri aka gace babayeho mu bwoba bwinshi kubera iyi mirwano ikomeje kwiyongera mu bice bitandukanye by’uburasirazuba bwa RDC, cyane cyane muri Butalongola no mu nkengero zaho.

Abayobozi bo mu nzego z'ibanze za Congo bavuga ko bakomeje gukaza ingamba zo kurinda abaturage ndetse no guhashya izi nyeshyamba za M23 ku bufatanye n’ingabo z’igihugu. Abaturage barasabwa gukomeza kuba maso no gutanga amakuru ku gihe kugira ngo hafatwe ingamba zihuse zo kubarinda.

Iki gitero kije kongera kongera impungenge ku ihungabana ry’umutekano muke ukomeje kuranga aka karere, ndetse kikaba gishobora kugira ingaruka zikomeye ku mibereho y’abaturage no ku mutekano muri rusange.

Turakomeza kubagezaho amakuru kuri iki gitero kuri [Twitter/ X] ya « Veritasinfo ».

Ubwanditsi.