Rwanda: RIB igiye gutera urushinge rw'ingusho BARAFINDA SEKIKUBO FRED!
Inkuru iri kuvugwa cyane i Kigali ni iyerekeranye n'ifatwa rya BARAFINDA SEKIKUBO FRED kimwe n'icyemezo cyamufatiwe cyo kumutera urushinge rwo kumucecekesha! Urwego rwa RIB rushinzwe kurwanya abantu bose banenga ubutegetsi bw'umwicanyi Paul Kagame rwafashe icyemezo kuri uyu wa kabiri taliki ya 11/02/2020 cyo guta muri yombi umunyepolitiki BARAFINDA SEKIKUBO Fred. Akimara gufatwa n'abo bicanyi, RIB yasabye Barafinda kujya kuvuguruza ibyo yatangaje byose binenga ubutegetsi bwa Kagame ku karengane bukorera abanyarwanda maze umunyepolitiki Barafinda yanga kubyemera; nibwo RIB yahise ifata icyemezo cyo ku mujyana mu bitaro bivura indwara zo mu mutwe biri i Ndera kugirango aterwe urushinge rwo kumucecekesha!
Bisanzwe bizwi ko gukora politiki mu Rwanda ari icyaha kuburyo abantu bose bagaragaje ibitekerezo binenga ubutegetsi bubi bwa Paul Kagame mu Rwanda bitwa abanzi b'igihugu. Umuntu wese uketsweho kunenga ubutegetsi bwa Kagame ahita anyerezwa n'inzego yashyizeho zishinzwe umutekano we arizo : Igisilikare, igipolisi, RIB, Inkeragutabara, abanyerondo, DMI n'izindi. Abenshi mu banyerejwe bagiye baburirwa irengero nyuma imirambo yabo igatoragurwa ku gasozi aho yajugunywe cyangwa se ikaboneka mu biyaga n'inzuzi yatawemo. Hari bacye cyane bagiye bagira amahirwe yo kugaragazwa n'abo bicanyi nyuma yo kunyerezwa bikagaragara ko bari bafungiye ahantu hatazwi cyangwa se imiryango yabo igahamagarwa kuza gutora imirambo y'abantu babo banyerejwe iri muri za kasho babiciyemo bikitwa ko biyahuye cyangwa se ko bashatse kurwanya abashinzwe umutekano bakaraswa bambitswe amapingu!
Mu ntwaro ubutegetsi bwa Kagame bukoresha mu kwica ababunenga harimo: amasasu, udufuni, gufunga abantu bakagwa muri gereza, kunigisha abantu imigozi, kubagongesha imodoka no kubaha uburozi ndetse n'ubundi buryo bwinshi bunyuranye burimo: ubuhunzi, kwambura abantu ibyabo no guteza inzara mu gihugu. Ubwicanyi bushya abicanyi ba Kagame badukanye mu Rwanda akaba ari ubwo kwicira abantu mu bitaro. Umuntu uvuze cyangwa ucyetsweho kunenga ingoma iriho akaba azajya yoherezwa mu bitaro maze agaterwa agashinge k'ingusho. Ubu buryo bukoreshwa mu gihugu cy'Ubushinwa ndetse bukaba bwarakoreshejwe no mu gihugu cya Leta zunze Ubumwe z'abasoviyeti! Barafinda yagaragaje ibitekerezo bikomeye bihuriweho n'abanyarwanda benshi, none yoherejwe indera kugirango ahabwe imiti y'abasazi igomba kumugira igicucu! None se abanyarwanda bose bazoherezwa i Ndera?
Nyuma yo gusenyera abaturage amazu yabo bavuga ko ayo mazu yubatse mu manegeka, Barafinda yagaragaye cyane ku mbuga nkoranyambaga yamagana ako karengane gakorerwa abanyarwanda. Barafinda yerekanye neza ko ubutegetsi buriho bukomeje kubeshya ko abanzi b'igihugu ari abanyarwanda baba hanze yarwo nyamara ahubwo abanzi b'u Rwanda ari abitwa abayobozi barwo muri iki gihe kuko abanyarwanda babahunga buri munsi! Barafinda yahamagajwe n'abicanyi bo muri RIB ko agomba kubitaba kuwa mbere taliki ya 10/02/2020 kugirango acecekeshwe, kuri iyo taliki Barafinda yanze kubitaba. Kuwa kabiri taliki ya 11/02/2020 abo bicanyi ba RIB bataye muri yombi Barafinda bahita bamwohereza mu bitaro by'i Ndera bamushinja ko afite uburwayi bwo mu mutwe! None se abagenzacyaha bo muri RIB babaye abaganga ryari kuburyo aribo bemeza ko umuntu arwaye mu mutwe? Ese umunyepolitiki Ntaganda Bernard wavuze ko atazi aho Mutarambirwa afungiye nawe agahita ahamagazwa na RIB izahita imwohereza mu bitaro by'i Ndera?
Ibi byose birerekana ko ubutegetsi bwa Kagame buri ku manegeka, bukaba bushobora guhirima isaha iyo ariyo yose!
Hasi aha , Barafinda Sekikubo Fred arasobanura impamvu yanze kwitaba abicanyi bo muri RIB