Rwanda : Umuvugizi wa RDF ntiyemeza cyangwa ngo ahakane imirwano yabahuje na FLN mu Bweyeye !

[Ndlr: Radiyo mpuzamahanga y'abongereza "BBC Gahuzamiryango" yashatse kumenya ukuri ku gitero FLN yagabye ku ngabo z'u Rwanda RDF mu murenge wa Bweyeye mu karere ka Rusizi i Cyangugu, maze ibaza umuvugizi wa FLN Capitaine Herman Nsengimana asobanura ku buryo busobanutse neza uko imirwano yo mu Bweyeye yabahuje na RDF yagenze. Umuvugizi wa RDF  Lt Colonel Innocent Munyengango akaba yavuze ko ntacyo ashobora kuvuga kumakuru aba yatangajwe ku mbuga nkoranyambaga! Birumvikana ko ntacyo yari kuvuga kuko bimenyerewe ko ibikorwa by'ingabo za RDF bitangazwa na polisi y'u Rwandda! Radiyo "Ubumwe" ya MRCD yo yagiranye ikiganiro na Brigadier Général Sabato Aimable akaba ashinzwe ibikorwa bya gisilikare mu ntara y'uburengerazuba bw'u Rwanda muri FLN, asobanura ibibazo byinshi ku bibazo abantu bibaza kuri icyo gitero (kanda aha wumve icyo kiganiro). Hasi aha tukaba tubagezaho inkuru ya BBC, amashusho akaba yatioranyijwe na "Veritasinfo"]:

Inyeshyamba za Front de Libération Nationale (FLN) zivuga ko kuwa gatanu zagabye igitero ku birindiro by'ingabo z'u Rwanda hafi y'ishyamba rya Nyungwe mu majyepfo y'uburengerazuba. Ibitero by'izi nyeshyamba byaherukaga kuvugwa cyane mu mwaka ushize mu turere twa Nyaruguru na Nyamagabe. Ku mbuga nkoranyambaga izi nyeshyamba zigaragaza mu mashusho zambaye imyambaro, amakatira ya gisirikare n'ibikoresho zivuga ko ari ibyo zambuye ingabo z'u Rwanda mu mirwano yo kuwa gatanu [taliki ya 08/11/2019].

Umuvugizi w'ingabo z'u Rwanda avuga ko ibi ntacyo yabivugaho, ariko ko umutekano mu gace kavugwa urinzwe neza. Herman Nsengimana umuvugizi w'izi nyeshyamba yabwiye BBC ko kuwa gatanu nijoro bagabye igitero mu gace ka Bweyeye, umurenge wo mu karere ka Rusizi wegereye ishyamba rya Nyungwe, ku birindiro by'ingabo z'u Rwanda.

Bwana Nsengimana yavuze ko bateye ibirindiro bya RDF biri ahitwa Nyamuzi muri Bweyeye bakirukana ingabo mu birindiro byazo ari naho bafatiye imyenda n'ibikoresho berekana. Muri iyo mirwano avuga ko bishe abasirikare 20 ba RDF barimo abo berekana ku makarita, nabo umwe muri bo agapfa.

Ibyo berekana ni ukuri?

Ati: "None urabihakana uhereye kuki? video wabonye n'imyenda ya RDF wabonye twambaye urakeka ko twaba twayikuye he? Biriya byangombwa, amakarita n'ibikoresho byabo urumva twarabikuye he?" Nsengimana avuga ko bamaze kuvana RDF mu birindiro byabo nabo batabigumyemo bahise basubira mu byabo nyuma y'imirwano.

Avuga ko batwaye ibikapu birindwi birimo ibyangombwa n'imyambaro, ibikombe binini bitatu bibika amasasu n'imbunda umunani. Lt Col Innocent Munyengango umuvugizi w'ingabo z'u Rwanda avuga ko ibishyirwa kuri social media ntacyo yabivugaho. Avuga ko ibyo biri ku mbuga nkoranyambaga nawe yabibonye ariko atarabona umuntu n'umwe bafashe mubo bavuga bafashe.

Col Munyengango ati: "Iyo hari icyabaye nitwe ba mbere tuvuga ibyabaye, tukavuga tuti habaye ibi byagenze bitya, iyo tutabikoze rero ni uko tutaba dushaka kuvuga kuri buri kintu cyose kigiye hanze".

Source : Iyi ni inkuru ya BBC Gahuza