Uganda: Miliyoni 106 z'amadolari yo gufasha impunzi ziri muri icyo gihugu zahagaritswe n'igihugu cy'Ubudage!
"Albrecht Conze", ambasaderi w'igihugu cy'Ubudage muri Uganda yatangaje ko leta y'igihugu cye yahagaritse igikorwa cyo guha leta ya Uganda imfashanyo ihwanye na miliyoni 106 z'amadolori yo gutunga impunzi ziba muri icyo gihugu. Ambasaderi w'Ubudage yasobanuye ko leta y'igihugu cye yafashe icyo cyemezo bitewe n'uko igihugu cy'Ubudage cyabonye ibirego bishinja bamwe mu bakozi ba leta ya Uganda icyaha cyo kuba baranyereje amafaranga menshi y'imfashanyo yari igenewe impunzi ziba muri icyo gihugu!
Iyo nkunga y'Ubudage yari igenewe gutunga impunzi nyinshi ziba kandi zikomeje gusaba ubuhungiro mu gihugu cya Uganda. Izo mpunzi zikaba zituruka mu bihugu bituranye na Uganda birangwamo umutekano mucye. Impamvu y'ihagarikwa ry'iyo nkunga, Ubudage bukaba busobanura ko yatewe n'uko abakozi ba leta ya Uganda bashinjwa ibyaha byo kunyereza inkunga igenerwa impunzi ziba muri icyo gihugu!
Raporo yo mu mwaka w'2018 yakozwe n'umuryango w'abibumbye ONU muri Uganda, yagaragaje ko abakozi ba leta ya Uganda bakoze itekinika ryo gutanga raporo y'umubare w'impunzi ziri muri icyo gihugu ufifitse. Iyo raporo ikaba ivuga ko abakozi ba leta ya Uganda batanze umubare w'impunzi zitabaho zigera ku bihumbi 300 , imfashanyo yagenewe izo mpunzi za baringa igizwe n'amadolari menshi ikaba yaranyerejwe n'abo bakozi.
Iyo raporo ififitse yo gutubura umubare w'impunzi ikaba yaratanzwe n'abakozi ba leta ya Uganda babifashijwemo n'abakozi b'ishami ry'umuryango w'abibumbye ryita ku mpunzi HCR rikorera mu gihugu cya Uganda! Ambasaderi w'Ubudage muri Uganda "Albrecht Conze" yagize ati:
"Ntabwo iriya mfashanyo igenewe impunzi ziri muri Uganda tuzayitanga mu gihe cyose abakozi ba leta ya Uganda bagaragajwe na raporo ya ONU ko banyereje imfashanyo igenewe impunzi bazaba bataragezwa imbere y'ubutabera kugirango baryozwe icyaha bakoze cyo kunyereza inkunga igenewe impunzi". Ambasaderi w'Ubudage muri Uganda akaba ababazwa n'uko leta ya Uganda idashyira umuhate mu gukurikirana abo bakozi banyereje iyo nkunga!
Igihugu cy'Ubudage kikaba kibaye igihugu cya kabiri gihagaritse imfashanyo igenewe impunzi ziri mu gihugu cya Uganda nyuma y'igihugu cy'Ubwongereza nacyo cyahagaritse iyo mfashanyo kubera icyo cyaha cyo kunyereza imfashanyo y'impunzi kandi abagikoze bakaba batagezwa imbere y'ubutabera.
Twabibutsa ko igihugu cya Uganda aricyo gihugu gifite umwanya wa mbere muri Afurika mu bihugu byakira impunzi nyinshi. Igihugu cya Uganda kikaba kibarirwamo impunzi zigera kuri miliyoni imwe n'ibihumbi 300 (1300000); inyinshi muri izo mpunzi zikaba zituruka mu gihugu cya " Repubulika Iharanira Demokarasi ya Congo na Sudani y'Epfo". Mu guhangana no gutunga izo impunzi, leta ya Uganda yitabaza inkunga z'amahanga kuburyo mu mwaka w'2017, Uganda yahawe inkunga n'amahanga ingana n'amadolari y'amerika miliyoni 350 yo gutunga impunzi.
Source: "agence Ecofin"