Rwanda: Mu gushimira Francophonie, Kagame yasimbuje Mushikiwabo, Dr Richard Sezibera wakoze jenoside y'abahutu!
Uyu Dr Richard Sezibera afite intoki zijejeta amaraso y'abanyarwanda
Nyuma y'aho Perezida w'Ubufaransa Emmanuel Macron agabiye Madame Louise Mushikiwabo umwanya w'ubunyamabanga bukuru bw'umuryango w'ibihugu bivuga ururimi rw'igifaransa OIF (francophonie) taliki ya 12/10/2018, mu nama yahuje abakuru b'ibihugu bigize uwo mu ryango yabereye mu mujyi wa Erevan muri Arménie; Paul Kagame yaboneyeho umwanya wo guhemba umwicanyi ruharwa Dr Richard Sezibera, akomeza n'ibikorwa bye byo gucecesha burundu abanyepolitiki n'itangazamakuru!
Kagame akaba yarakoze ibyo bikorwa mu rwego rwo gushimira umuryango wa Francophonie wateshutse ku ndangagaciro (valeurs) zawo zo guteza imbere demokarasi n'uburenganzira bw'ikiremwamuntu ukagirira ikizere inkoramutima ya Kagame mu kuwuyobora! Mu gushyiraho leta irimo Dr Richard Sezibera,Paul Kagame yihutiye gukuraho ministeri ishinzwe impunzi; bikaba bigaragara ko iki kibazo cy'ubuhunzi yakuruye mu banyarwanda yakiburiye igisubizo, kuko impunzi z'abanyarwanda zikiri nyinshi hanze y'igihugu kandi n'abanyarwanda bakaba bakomeje guhunga ubutegetsi bwe kugeza uyu munsi. Nta buryo rero Kagame ashobora kongera gusaba ishami ry'umuryango w'abibumbye ryita ku mpunzi UNHCR gukuriraho ubuhunzi abanyarwanda kandi warabikoze ariko izo mpunzi zikanga guta! Ruswa Kagame yahaye abakozi b'uwo muryango bayiririye ubusa!
Uwo Kagame yagize ministre w'ububanyi n'amahanga wa leta ye Dr Richari Sezibera ashinjwa kuba yararimbuye imbaga y'abanyarwanda bo mu bwoko bw'abahutu muri perefegitura ya Ruhengeri na Gisenyi mu ntambara yiswe iy'abacengezi (1998-2000). Richard Sezibera ashinjwa kwica abaturage benshi bahungiye mu buvumo bwa Nyakinama no mu bundi buvumo bunyuranye buri muri ako karere, yarangiza kwica abo baturage imirambo yabo akayitwika! Richard Sezibera yagiye afatwa amashusho ari iruhande rw'imirambo y'abaturage yari amaze kwica! Ikibazo gikomeje kwibazwa na benshi ni ukumenya igihe aba bicanyi b'inkotanyi bazashyikirizwa ubutabera bakaryozwa ubwicanyi bakoze! Hasi aha murabona amashusho ya Sezibera ari kuganira n'itangazamakuru nyuma yo kwica umubare utabarika w'abaturage ba Ruhengeri na Gisenyi.
Abo banyamakuru bakaba bashinjwa icyaha cyo kwangisha ubutegetsi bwa Kagame abaturage no kubusebya mu mahanga! Iyo urebye ibirego abo banyamakuru bashinjwa usanga ari "byendakuriza"! Kuvuga inkuru cyangwa se gusesengura amakuru aba ariho avugwa bigakorerwa kuri interneti bihinduka icyaha cyo kurwanya leta gute? Ese ni abanyarwanda bangahe bagera kuri youtube? Ese abanyamahanga bakeneye kumva isesengura ry'amakuru rikozwe mu kinyarwanda kugirango bakunde cyangwa bange igihugu cy'u Rwanda? Niba se ibyatangazwaga n'abo banyamakuru ari ukuri kandi bikaba biriho, umunyamakuru wo mu Rwanda yatangaza ayo makuru mu buhe buryo kugirango bititwa icyaha?
Si aba banyamakuru gusa bari kwicwa bucece kuko agafuni ka Kagame gakomeje gucura inkumbi, kugeza ubu nta muntu uzi irengero ry'umunyepolitiki Boniface Twagirimana wazimiriye mu maboko ya leta ya Kagame, amakuru menshi atangwa n'imbuga nkoranyambaga zihurirwaho n'abanyarwanda yemeza ko yishwe na leta ya Kagame. Madame Victoire Ingabire nawe baramucecekesheje burundu, amakuru avugwa ku mbuga nkoranyambaga yemeza ko igihe yatumirwaga n'urwego rw'ubushinjacyaha bwa Kagame yakorewe iterabwoba ridasanzwe (torture psychologique) ryatumye aceceka!
Iyo abantu benshi barebye imitegekere y'u Rwanda rwa Kagame muri iki gihe bahita bafatwa n'ubwoba bw'uko amaherezo igihugu kizongera kikagwa mu icuraburindi kuko imitima y'abanyarwanda ifite agahinda n'intimba nyinshi, igihe kwihangana bizaba bitagishobotse ako kababaro kose kagasesekara hanze, amaraso menshi y'abanyarwanda azongera kumeneka!
Veritasinfo