Rwanda: Imbabazi zo gukemura ibibazo zageze kuri Diane Rwigara n'umubyeyi we bava muri gereza!
Nubwo yafunguwe by'agateganyo Diane Rwigara yiyemeje gukomeza ibikorwa bya politiki!
Mu ntara cya Cyangugu mu mujyi wa Kamembe (ubu byombi byahinduriwe amazina), umugabo (tutavuze amazina ye kubera umutekano w'umuryango we) wari ufite ubutunzi bw'ibintu (umukungu),yahimbiwe ibyaha byo kugira uruhare muri jenoside yo mu 1994 kugirango yamburwe uwo mutungo we, kandi niko byagenze. Uwo mugabo bamushinjaga ibyaha by'uko nta mututsi yashoboye gutabara kandi bari baturanye ubwo bicwaga n'interahamwe! Urukiko rwa Gacaca rukaba rwaramukatiye igifungo cy'imyaka 30 kandi agatanga n'indishyi z'akababaro zifite agaciro ka miliyoni 20 z'amafaranga y'u Rwanda! Mbere yo kujyanwa muri gereza, uwo mugabo yahawe ijambo ngo agire icyo avuga ku gihano ahawe maze agira ati: "Banyakubahwa bacamanza iyo myaka mumpaye y'igifungo ni myinshi cyane kuko nzafungurwa mbere y'uko nyirangiza kuko nta butegetsi bwigeze bubaho mu Rwanda bwarengeje imyaka 25!"
Nubwo ibyo uwo mugabo yavuze byafashwe nk'urwenya, nta mwami cyangwa umuperezida wigeze arenza imyaka 25 ayoboye u Rwanda! Habyarimana yishwe na Kagame ategetse imyaka 21, Kayibanda yategetse imyaka 11 naho abami ba mbere iyo bagezaga ku myaka 25 abiru barabanyweshaga (kwica bakoresheje amata)! Gusa rero Kagame we azaba akarusho mu bami bategetse u Rwanda kuko yiyemeje kuzagwa ku butegetsi, ariko rero tugomba kurindira gato tukareba ko azagera kuri iyo ntego kuko nubwo kunywesha abami bitakibaho, Kagame ashobora kuzanywa umuti wa demokarasi, yaba abishaka yaba atabishaka! Ibimenyetso bibigaragaza ni byinshi:
2)Kuri uyu wa gatanu taliki ya 5/10/2018, nibwo Diane Rwigara n'umubyeyi we Adeline Rwigara bafunguwe n'umucamanza wa Kagame akurikije amabwiriza yahawe nawe. Mu rukiko habaye ikinamico ryo kwerekana ko umucamanza yafashe icyemezo akurikije amategeko ndetse n'abashinjacyaha bakora ikinamico ryo kugaragaza ko batishimiye icyemezo cy'umucamanza, ariko bitewe ni uko bari bazi uwatanze iryo tegeko ntibiriwe bavuga ibyo kujurira icyo cyemezo! Inkiko za Kagame zikora nka komisiyo y'amatora yashyizeho, ibyemezo bizafatwa biba bizwi mbere y'uko bishyirwa ahagaragara, hari hashize amezi ageze kuri 3 ku mbuga nkoranya mbaga hanyuraho amakuru y'uko Kagame yasabwe gufungura Ingabire, Kizito, Diane Rwigara ndetse n'abandi ba nyepolitiki, abantu benshi bakabifata nk'ibyifuzo gusa none dore nibyo bibaye!
Ifungurwa rya Diane Rwigara n'umubyeyi we ntabwo ari inkuru n'ubwo abantu benshi bashaka kuyigirayo kuko byari bizwi ko bazafungurwa mbere y'uko amatora y'ibihugu bivuga ururimi rw'igifaransa aba,itora ry'umunyamabanga mukuru w'ibihugu bivuga ururimi rw'igifaransa rikaba riteganyijwe ku italiki ya 11-12/10/2018 mu gihugu cy'Armenia. Madame Mushikiwabo akaba yiteguye kuzayobora uwo muryango kuko ashyigikiwe na Perezida w'Ubufaransa ndetse n'ibihugu by'Afurika! Gusa rero kuyobora uyu muryango wa OIF ntacyo bizahindura ku isura ubutegetsi bwa Kagame bufite kuko n'ubundi Mushikiwabo yayoboye akanama ka ONU gashinzwe umutekano, ubu Kagame akaba ayobora Afurika yose UA kandi ibyo ntacyo byahinduye ku isura y'ubutegetsi bw'inkotanyi!
Uretse uwo mwanya wo kuyobora umuryango w'ibihugu bivuga ururimi rw'igifaransa uri gutuma Kagame afungura abo yafunze , hari n'igitutu kiva ahandi, urubyiruko rwo mu gihugu cya Kenya rwari rurimo rutegura imyigaragambyo yo gusaba ko Diane Rwigara afungurwa, bimwe mu bikorwa urwo rubyiruko rwavugaga ko ruzakora ni uko rwari rwiyemeje gusenya ambasade ya Kagame muri Kenya kandi rugasaba ibihugu by'Afurika y'iburasirazuba kugira icyo bikora ngo akarengane gacike mu Rwanda!
Ese Kagame yiyemeje gutanga demokarasi cyangwa ni amayeri y'intare ishaje?
Abakurikiranira hafi politiki yo muri Afurika, basanga igitutu Amerika iri gushyira kuri Kagame aricyo cyatumye afungura ziriya mfungwa za politiki, gusa Amerika irasaba Kagame gukora ibirenzeho kuko imusaba gufungura imfungwa zose za politiki, gufungura urubuga rwa politiki mu rwanda n'amashyaka ari hanze y'igihugu agakorera mu Rwanda, gushyiraho leta ihuriweho n'amashyaka menshi akaba ariyo itegura amatora adafifitse kandi Kagame akareka ibyo kongera kwiyamamariza umwanya w'umukuru w'igihugu kuko yarangije manda ze.
Ese ibyo Amerika isaba Kagame azabyemera? Amakuru aturuka mu ntore z'abajyanama ba Kagame zemeza ko FPR yafashe gahunda yo gufata abanyepolitiki bari imbere mu gihugu batavuga rumwe nayo ariko bemera gukorana nayo, bakabaha imyanya mu butegetsi bityo bakavuga ko demokarasi yatashye mu Rwanda! Ikibazo bafite n'icy'amashyaka ari hanze y'igihugu ariko bakaba bazakomeza kujya babeshya ko ayo mashyaka ariyo yanze gutaha! Ngayo amayeri y'intare ishaje!
Intore zikaba zemeza ko uwo mwitozo wo kwigarurira abanyepolitiki banenga FPR bari imbere mu gihugu ariwo Madame Victoire Ingabire ari gukora kugira ngo barebe ko isura y'ubutegetsi bwabo yagaragara neza mu mahanga. Ni muri urwo rwego basaba Ingabire kujya mu muganda ndetse akajya gufasha n'abayobozi b'ibanze gukemura ibibazo by'abaturage. Ingabire akaba yatangaje ko ashyigikiye ko Mushikiwabo atorerwa umwanya wo kuyobora umuryango w'ibihugu bivuga igifaransa ndetse akazongezwa indi manda kuko ibibazo byo kuniga demokarasi n'uburenganzira bw'ikiremwamuntu bizaba bitakiriho mu Rwanda!
Nubwo Ingabire akora uko ashoboye ngo ahindure isura ya Kagame, umenya bitazamworohera kumvisha Kagame ko agomba kureka ubutegetsi rubanda ikagira amahoro, ahubwo Kagame arashaka agahenge ngo arebe ko yasunika iminsi!
veritasinfo.fr