Rwanda: Niba abujijwe gukora politiki, Diane Rwigara yiteguye gusubira muri gereza!

Publié le 6 octobre 2018 par veritas

Diane Rwigara

Radiyo mpuzamahanga y'abanyamerika VOA ivuga mu rurimi rw'ikirundi n'ikinyarwanda yageze mu rugo kwa Rwigara maze igirana ikiganiro na Diane Rwigara ndetse n'umubyeyi we ubwo bari bamaze gusohoka muri gereza. Diane Rwigara yavuze ko agomba gukomeza ibikorwa bya politiki, umubyeyi we avuga ko ibyo kwamburwa umutungu wabo ntacyo bimubwiye, naho umunyepolitiki w'inararibonye Faustin Twagiramungu uri hanze y'igihugu avuga ko nta mpuhwe Kagame afite ahubwo amusaba ko agomba gufungura n'abandi banyepolitiki yafunze ndetse agafungura n'abasilikare barimo Tom Byabagamba na Rusagara kuko yabafungiye ubusa! Abantu benshi bari hanze y'igihugu no mu gihugu imbere bakaba bakomeje kwibaza niba Paul Kagame arakomeza izi mpinduka akagera n'aho afungura urubuga rwa politiki mu Rwanda cyangwa se niba aragarukira aho? Ikigaragara cyo ni uko inzira ikiri ndende mu Rwanda kugirango impinduka igerweho!

Mu kiganiro Diane Rwigara yagiranye n'umunyamakuru wa VOA yagize ati : "Ndiyumva neza cyane, nshimishijwe no kuba mfunguwe njyewe n'umubyeyi wanjye, nkaba mboneyeho no gushimira abantu bose batubaye hafi, haba imbere mu gihugu no hanze y'igihugu. ikihutirwa ngiye gukora nakwifuza ko n'izindi nzirakarengane zifunze nazo zagombye gufungurwa, nishimiye iyi nzira igihugu cyacu kirimo, ariko kandi ntabwo twari twagera aho tugomba kugera, uru ni urugendo rugomba gukomeza. Ndakomeza ibikorwa bya politiki ntakabuza, nibiba intandaro yo kunsubiza muri gereza nta kundi ubwo nzasubiramo, ariko ntabwo nabihagarika...."

Adeline Rwigara, umubyeyi wa Diane nawe yagize ati: "Uyu munsi ndumva nshima Imana cyane,ku mutima hari amashimwe menshi yo gushima Imana. ndayishimira ibyo yankoreye muri uyu mwaka, hari expérience (ubunararibonye) nagize muri gereza, mbese uko abantu babitekereza ntabwo ariko ibintu byari bimeze kuri njyewe; nabonye ubuzima bw'abafungwa mbona imibabaro baba bafite cyane cyane nk'abatinzemo, ntabwo ari ibigeragezo gusa umuntu aba arimo ahubwo haba harimo n'ibyigisho bizima Imana iha umuntu...Ndashimira Imana yampaye abana b'intwari bihanganye... ngashimira inshuti n'abavandimwe bari hafi n'abari kure batubaye hafi mu masengesho no gushimira Imana... njyewe nkorera Imana, ndi umuvugabutumwa, ibyiringiro byanjye biba mu Mana, amasezerano y'Imana arahari, ibintu barabitwaye, amapariseri baratwaye, baracyanatwara, inganda baratwaye ndabizi ariko ntabwo duhungabanye na gatoya kuko ijambo ry'Imana muri Zaburi 37, 25 rigira riti [ nari umusore none dore ndashaje, sindabona umukiranutsi cyangwa urubyaro rwe naretse ngo rusabirize ibyo kurya]; umutware wanjye yakoreye Imana kuburyo ntacyo dushobora kubura..."

Abanyepolitiki bari imbere mu gihugu bafunzwe bakaza gufungurwa aribo Victoire Ingabire na Bernard Ntaganda basanga Kagame ari gutera intambwe yo kwemera ibitekerezo by'abatavuga rumwe nawe ariko bagakomeza bavuga ko ibimaze gukorwa bidahagije ko Kagame agomba gufungura imfungwa zose za politiki. Umunyapolitiki w'inararibonye uri hanze y'igihugu Bwana Faustin Twagiramungu nawe yagize icyo avuga kuri iri rekurwa rya Diane Rwigara n'umubyeyi we kimwe n'abandi Kagame aherutse gufungura, Twagiramungu yagize ati:

"Inkuru nk'iyi ni ukuyakirana ibyishimo...turagirango tubwire abanyarwanda ko abo bafunguwe bari bafungiye ubusa, nta cyaha njyewe cyangwa undi munyarwanda wakibahamya uretse Kagame n'inkomamashyi ze baba bamubeshya ko hari icyaha bakoze, ariko nta cyaha bafungiwe. Irekurwa ryabo muri iki gihe rifite icyo risobanura, uko tubyumva ...ni uko ubu Kagame afite ibibazo bikomeye; ikibazo cya mbere Kagame afite ni ikibazo cy'ikinyoma, yabeshye abazungu bamushyize ku butegetsi ko atazashaka manda ya gatatu, ariko yageze aho arabeshya ngo abanyarwanda baje bikoreye impapuro ngo bamusaba ko yagumaho... indi impamvu ni iyo gushaka kwigira iteka nyirandabonetse na ninjye mugabo, ninjye wacunga ibintu byose byo muri Afurika, ubu arashaka gutegeka Francophonie...ariko ibyo ntabwo bihagije, nafungure n'abandi barimo abasilikare nka Rusagara na murumuna wa Himbara, nafungure abandi banyepolitiki basigayemo n'abandi bafungiye ubusa... Indi mpamvu ya gatatu, ni impamvu y'ibibazo afitanye n'abantu bamwe na bamwe mu gihugu ashaka ko bakomeza kwerekana ko ari umuntu mwiza mu gihugu, nta bwiza bwa Kagame tubonye kubera ibyago yateje kariya karere. izo mpamvu zose zimaze kumukoraniraho akaba ashaka kubeshya ko nawe yabaye umuntu ugira impuhwe!

Twasoza tugira tuti: Niba intwaro y'iterabwoba ryo gufunga abanyepolitiki Kagame yakoreshaga ahubwo ibamara ubwoba, agomba guhitamo gufungura urubuga rwa politiki mu gihugu cyangwa se agahitamo gukomeza ibikorwa bye byo kwica abanyepolitiki nubwo nabyo nta mahoro bishobora kuzamuzanira!

Kanda aha wumve kuburyo burambuye icyo kiganiro

Veritasinfo.fr