Uganda: Nyuma y'aho umugambi wo kwica Museveni uburiyemo, iterabwoba niryo riri gushyirwa ku bagande!

Publié le 1 août 2018 par veritas

Aho kongera gushoza intambara ku Rwanda, Museveni yari akwiye guta muri yombi nyirabayazana w'ibibazo bikurura umutekano mucye mu karere kuko aramuzi kandi akaba afite ubushobozi bwo kumufata!

Nibyo koko "Amaraso arasama"! Iyo umuntu atinyutse kwica umuntu, nawe ubwe aba yiyambuye ubumuntu bumurimo, ibyo bituma ahora yumva muriwe ntamahoro afite, agahora yikanga ubusa ko nawe bagiye kumwica, ibyo bigatuma ahora ashimishwa no kumena amaraso, kugirango ashobore gutuza! Izi ngaruka zo kumena amaraso zigaragarira kuri Paul Kagame!

Nyuma yo kwica Perezida Habyarimana Juvénal w'u Rwanda na mugenzi we Cyprien Ntaryamira w'Uburundi abahanuye mu ndege mu mwaka w'1994; icyo gikorwa kikaba cyarahesheje Paul Kagame gufata ubutegetsi bwose mu Rwanda hejuru y'umuvu w'amaraso y'abanyarwanda yatembaga mu gihugu hose. Mu kwezi kwa Mutarama 2001, Paul Kagame yivuganye Laurent Désiré Kabila yari amaze guha inkunga yo gufata ubutegetsi muri RD Congo amaze kwirukana Mobutu. Mu mwaka w'2013, Paul Kagame yavuze ko azakocora (kwica) uwahoze ari perezida wa Tanzaniya Jakaya Kikwete. Mu mwaka w'2015 Kagame yagaragarije itangazamakuru ko Perezida w'Uburundi Pierre Nkurunziza agomba kuva ku butegetsi, atangira no gushoza imvururu muri icyo gihugu. Muri iki gihe, mu mwaka w'2018, mu kwezi kwa gatandatu, Paul Kagame yateguye umugambi mubisha wo kurasa Perezida Yoweli Kaguta Museveni wa Uganda ari mu ndege, mu gihe yari kuba yitabiriye inama ya Comessa yari iteganyijwe kubera mu Burundi. Nyuma y'aho uwo mugambi mubisha uburiyemo, muri iyi minsi, Kagame ari gutera ubwoba abaturage ba Uganda, ababwira ko azabarimbura niba abarwanyi ba RNC batinyutse kugaba ibitero byo kurwanya ubutegetsi bwe mu Rwanda!

Inkuru "veritasinfo" ikesha ikinyamakuru cya "La lettre de l'Océan indien" cyandikirwa mu Bufaransa, irerekana ko iterabwoba rya leta ya Paul Kagame rikomeje guhahamura abaturage b'abagande batuye mu turere tw'amajyepfo ya Uganda duhana imbibi n'u Rwanda. Nk'uko icyo kinyamakuru kibivuga, inzego zishinzwe ubutasi mu gisilikare cya Kagame zikomeje kongera ibikorwa bihungabanya umutekano mu gihugu cya Uganda. Nyuma y'igikorwa cyaburiyemo cyo kurasa indege yari itwaye perezida Yoweli Kaguta Museveni, intasi zo mu gisilikare cy'inkotanyi zacengeye k'ubutaka bwa Uganda muri iyi minsi, izo ntasi zikaba ziri gukwirakwiza mu baturage ba Uganda inyandiko zitariho umukono ( tracts) zandikishijwe intoki, zibamenyesha ko igihe abayoboke ba RNC bari muri Uganda bazatinyuka kugaba ibitero ku Rwanda, inkotanyi ziteguye kuzica zikamaraho abaturage ba Uganda bari mu turere twegereye umupaka w'u Rwanda! Muri izo mpapuro handitsemo amagambo agira ati: "Niba ntacyo ukoze ngo ibyo bitero bihagarare, tuzakwica wowe ubwawe n'umuryango wawe wose"!

Izo mpapuro zitariho umukono zinyanyagizwa mubaturage ba Uganda zanditse mu rurimi rw'ikinyarwanda n'icyongereza. Izo mpapuro zikaba zinyanyagizwa mu turere twa: Kisoro, Mbarara, Ntungamo, Kabale na Kakumiro. Amakuru atangwa n'urwego rushinzwe ubutasi mu gisilikare cya Uganda, CMI (Chieftaincy of Military Intelligence); yemeza ko abategetsi ba Uganda bakeka ko izo mpapuro zitangwa n'intasi z'u Rwanda arizo : Safari Abdul, Safari John na Nawamanya Abdul. Muri raporo zatanzwe na CMI ndetse n'izindi nzego, zemeza ko abatutsi bo muri RNC barimo bisuganya muri turiya turere kugirango bagabe ibitero bya gisilikare mu majyaruguru y'u Rwanda. Amakuru atangwa n'igisilikare cya Uganda yemeza ko abarwanyi ba RNC bari mu bigo bya Biso no mu ishuri rya gisilikare rya Kaweweta riherereye muri Uganda hagati, barangije guhabwa imyitozo ya gisilikare. Ibyo bitero by'abarwanyi ba RNC bikaba bigomba kugabwa ku Rwanda mu bihe bya vuba nk'uko byemezwa n'ikinyamakuru "Océan Indien" bitewe n'uko abarwanyi ba FLN babatanze kugaba ibitero ku Rwanda. FLN, ni abarwanyi b'umutwe wa MRCD uyobowe na Paul Rusesabagina afatanyije na Wilsson Irategeka na Callixte Sankara. Ku italiki ya 1 Nyakanga 2018, abarwanyi b'umutwe wa FLN bakaba baragabye ibitero muri Nyaruguru, mu majyepfo y'u Rwanda hafi y'igihugu cy'Uburundi.

Umwuka ni mubi cyane hagati y'u Rwanda na Uganda kuburyo ku italiki ya 5 Nyakanga uyu mwaka, ingabo za Uganda zagabye igitero mu nzu ikigo cy'itumanaho cya MTN gikorera i Kampala, imashini z'icyo kigo zirafatirwa bitewe n'uko icyo kigo gicyekwaho guha urwego rw'ubutasi rw'ambasade y'u Rwanda muri Uganda ibiganiro binyuze kuri telefoni by'abayobozi bakuru ba Uganda. Umukozi ushinzwe umutekano muri ambasade y'u Rwanda i Kampala Bwana Noel Mucyo akaba ashinjwa kuba ariwe ugezwaho ayo makuru y'abayobozi ba Uganda ayahawe na MTN! Ibintu bikaba byararushijeho kujya irudubi bitewe n'urupfu rw'umupolisi mukuru wa Uganda Wilfred Okello Makmot rwabaye ku italiki ya 8 Nyakanga uyu mwaka, bikaba bikekwako uwo mupolisi yishwe ku kagambane k'igihugu cy'u Rwanda!

Aya makuru avuga ko RNC nayo ishobora kurwanya ubutegetsi bwa Kagame ikoresheje intwaro ashobora gutuma inzira yo guhindura ibintu mu Rwanda yihuta! Mu gihe FLN iyobowe na Sankara yaturutse mu majyepfo, RNC nayo iturutse mu majyaruguru, byatuma haboneka abandi bahera mu burasirazuba no mu burengerazuba maze bose bagahurira mu bwiyunge i Kigali! Bitewe ni uko Paul Kagame yafunze inzira ya demokarasi, amaherezo y'impinduka mu Rwanda azaturuka mu ntambara n'ubwo ari inzira ituma abantu benshi batakaza ubuzima bwabo.

Veritasinfo