Rwanda: FLN yerekanye inkeragutabara yafatiye ku rugamba
Izi ni inkeragutabara 4 zitawe muri yombi n'abarwanyi ba FLN
Nkuko byatangajwe na Major Callixte Sakankara umuvugizi w'umuntwe wa FLN (Force de Libération Nationale) akaba numwe mu bayobozi ba MRCD, kuri uyu wa gatandatu taliki ya 18/08/2018, umuyobozi w'abarwanyi ba FLN uri mu karere ka Nyaruguru, yatangiye gushyira ahagaragara bimwe mu bimenyetso bigaragaza urugamba uwo mutwe uri kurwana n'inkotanyi za Paul Kagame! Umuyobozi w'abarwanyi ba FLN akaba yagaragaje inkeragutabara 4 zafatiwe kurugamba mu karere ka Nyaruguru.
Kuri uyu wa gatanu taliki ya 17 Kanama 2018, inkotanyi za Kagame zafashe inkeragutaba 4 zizambika imyenda ishaje y'abaturage maze zizishyira imbere ngo zijye kubereka ibirindiro by'abarwanyi ba FLN bakambitse hafi y'umurenge wa Muganza mu nkengero z'ishyamba rya Nyungwe mu karere ka Nyaruguru. Inkotanyi za Kagame zagize ibyago bikomeye zigeze mu kagari ka Gahurizo kuko zaguwe gitumo n'abarwanyi ba FLN bari baziteze igico maze barasa izo nkotanyi amasasu y'urufaya zihunga intatane!
Abarwanyi ba FLN bagaburiye inkeragutabara zafashwe ibiribwa ibyo mu bikopu
Muri iryo hunga ry'inkotanyi, inkeragutabara 4 zabuze aho zihungira maze zifata icyemezo cyo kwishyira mu maboko y'abarwanyi ba FLN. Abarwanyi ba FLN babanje kwitiranya izo nkeragutabara n'abaturage, ariko bamaze kugenzura neza no kubakorera ibazwa basanga ari inkeragutabara zari zashyizwe imbere ngo ziyobore inkotanyi. Kuri uyu munsi wo kuwa gatandatu, Umuyobozi w'abarwanyi ba FLN mu karere ka Nyaruguru yiyemeje kurekura inkeragutabara 2 kuko zagaragaje ko zifite uburwayi bukomeye zikaba zigomba gusubira mu miryango yazo kugirango zishobore kwivuza.
Amakuru atangwa n'abayobozi b'inzego z'ibanze muri Nyaruguru akaba yemeza ko Gitifu w'umurenge wa Remera muri Nyaruguru witwa Bihoyiki Vianney yatewe igisasu cya grenade n'abasilikare b'inkotanyi kumugoroba wo kuwa gatanu taliki ya 17/08/2018 saa tatu z'umugoroba; uwo Gitifu inkotanyi zimushinja gushyigikira abarwanyi ba FLN, ariko Imana ikaba yarakinze akaboko akaba atarapfuye. Ubwo inkotanyi zahungaga zimaze kumeneshwa n'abarwanyi ba FLN mu mirwano yo kuri uyu wa gatanu taliki ya 17/08/2018 zatakaje intwaro n'amasasu byinshi, ibyo bikoresho bikaba byaratoraguwe n'abarwanyi ba FLN!
Veritasinfo