Rwanda: Umushinyaguzi aza nk'ubaza!
Abidishyi bari kwigishwa na Kagame nk'abana b'ibitambambuga!
Iyo umushinyaguzi ashaka gushinyagurira umuryango wapfushije umuntu, aza murugo rwa nyakwigendera agatangira kubaza utubazo ashinyagura kandi yijijisha aho agira ati:"Ese ni ukuri runaka yapfuye koko?" Aho niho abanyarwanda bakuye umugani ugira uti:"Umushinyaguzi aza nk'ubaza!" Uyu mugani ukaba uhuye n'ibyo umushinyaguzi w'abanyarwanda Paul Kagame arimo akora aho ari kwibajisha utubazo two kujijisha abagererwa be yita abayobozi yafungiye mu kigo cya gisilikare cy'i Gabiro, mucyo bise "umwiherero w'abayobozi"!
Mu gushinyagurira abanyarwanda kwe, Kagame yitwaye imbere y'inkomamashyi ze nka mwarimu uri guha isomo abanyeshuri biga mu mwaka wa mbere w'amashuri abanza! Mu mvugo ye amenyereye y'ikinyangele (ikinyarwanda kivanze n'icyongereza), Kagame yagendaga atunga agatoki buri nkomamashyi ageze iruhande ayibwira ngo imuhe igisubizo ku bibazo by'ubushinyaguzi yabajije bituma: Inzara, amavunja, Bwaki n'umwanda byaraniniwe gucika mubanyarwanda! Ibi bibazo Kagame ari kubaza izi nkomamashyi azi neza ko ariwe ubwe ubutera!
Politiki mbi ya Kagame yo gutegeka abanyarwanda guhinga igihingwa kimwe niyo nyirabayazana ko kurwara Bwaki no kugwingira kw'abana b'abanyarwanda, ibyo Kagame arabizi ariko arimo yibazisha utubazo ngo nibamubwire impamvu abana bagwingira! Politiki yo kwambura abanyarwanda imirima yabo yo mu bishanga niyo yazanye inzara izwi ku izina rya "Nzaramba", iyo inzara ikaba iri kurimbura imbaga bakabeshya ko ari malariya iri kwica abanyarwanda! Inkomamashyi za Kagame ntizishobora kumubwira icyo kibazo, ahubwo ziri kunihira gusa ngo " turi abanyabyaha mwidishyi!"
Umutwe umwe wifasha gusara!
Mubyukuri,Kagame n'inkomamashyi ze barangwa n'imvugo iranga abantu bafite uburwayi bwo mu mutwe! Kimwe mu bimenyetso bigaragaza abantu bafite ibibazo mu mutwe, ni uko iyo bagenda mu nzira, wumva bari kwivugisha bonyine , ukagirango hari uwo bari kuganira nawe kandi ari ntawe! Kagame n'inkomamashyi ze nabo barimo bivugisha! Baribaza ubwabo, bakisubiza! Birazwi ko ishyaka rya FPR-Kagame ariryo riyobora igihugu ryonyine; ziriya nkomamashyi Kagame yafungiye mu kigo cy'i Gabiro, akaba ari abayoboke b'uwo mutwe umwe wa politiki (FPR-Kagame)! Biratangaje kubona Kagame asaba abayoboke be ko bagomba kujya bajya impaka bakavugana kuri gahunda bashyira mu bikorwa kandi bose bagomba gukurikiza gahunda imwe y'ishyaka rye riri kubutegetsi, mbese Paul Kagame akaba ari kunenga imiyoborere mibi ya Paul Kagame! None se kwivugisha kutari uko ni ukuhe?
Niba Kagame ashaka Kuyobora igihugu kuburyo haboneka impaka zituma itarambere ribaho kandi rirambye, nafungure urubuga rwa politiki mu gihugu, hajyeho politiki y'amashyaka menshi noneho buri shyaka rivuge gahunda yaryo abanyarwanda batore ishyaka rifite gahunda nziza! Muri icyo gihe ishyaka ryatsinze amatora rikora uko rishoboye rigakorera abanyagihugu ibyo ryabemereye; andi mashyaka nayo agahatana asobanurira abaturage imigabo n'imigambi yabo kugirango muri manda ikurikiyeho nayo azashobore gutorwa! Ubwo buryo bwa politiki y'amashyaka menshi nibwo buzana iterambere nyaryo kandi rirambye mu gihugu! Naho imiyoborere ya FPR-Kagame imeze nk'ikipe imwe iri mu kibuga iri kwikinisha cyangwa umuntu uri mwirushanwa ryo kwiruka ariko ari wenyine, icyo gihe uko yakwiruka kose bavuga ko ariwe wa mbere kuko ntawundi bari guhatana!
Nyuma yo gukomera amashyi Kagame no gukora imyitozo ngorangingo, inkomamashyi z'abayobozi ba Kagame zizasubira i Kigali uko zaje kuko nta kintu na kimwe zizahindura kuri politiki- kirimbuzi ya Paul Kagame!
Veritasinfo