Impunzi igihugu cya Israyeli cyohereje mu Rwanda ziri kugurishwa nk’amatungo muri Libiya!

Publié le 2 décembre 2017 par veritas

Izi ni impunzi Israyeli yarundanyije mu nkambi ya Helot mbere yo kuzohereza mu Rwanda!

[Ndlr :Mu mwaka w’1990, abazungu bafashe gahunda yo kwigarurira igihugu cya Congo kubera amabuye y’agaciro menshi icyo gihugu gifite akoreshwa mu ikoranabuhanga rigezweho. Ikiraka cyo gusohoza uwo mugambi cyahawe umunyarwanda wo mu bwoko bw’abatutsi wari ufite ipeti rya Major mu ngabo za Uganda. Nyuma yo kwica : abagande, abanyarwanda, abarundi n’abakongomani barenga miliyoni 6, abazungu bamugororeye igihembo cyo kwitwa «intwari»! Abatutsi bakoreshejwe muri uwo mugambi bakaba bamuramya nk’imana n’ubwo batakaje ababo batagira ingano muri uwo mugambi ! Muri iki gihe nabwo, Abo bazungu badakunda abanyafurika ariko bagakunda ubukungu bw’Afurika, bahaye uwo mwicanyi w’umunyarwanda ikindi kiraka kitoroshye cyo kwica abirabura bose abo bazungu badashaka mu bihugu byabo! Uwo mwicanyi akaba ari kubwira isi yose ko agiye gutabara abirabura bari muri Libiya kandi ariwe waboherejeyo, bityo akaba ashaka ko abanyafurika bose bamwita « intwari » nk’uko abatutsi babikora ! Nk’uko imirambo y’abanyarwanda izanira umwicanyi wabo amafaranga, niko n’impunzi z’abanyafurika zinjiza ifaranga ritubutse mu isanduku y’umwicanyi uyoboye u Rwanda ! Ese ubwo bukungu buva mu maraso y’abantu ntibushobora kuba ari umuvumo uzagira ingaruka zikomeye ku banyarwanda?]

Ubutegetsi bwa Vichy (France) ntabwo bwishe abayahudi, ariko ubwo butegetsi bushinjwa kuba bwaragemuriye abo bayahudi abicanyi b’abadage babahigaga; igihugu cya Israyeli nacyo ntabwo kica impunzi zigisabamo ubuhungiro, ariko gishinjwa kugemurira izo mpunzi urupfu kandi arirwo zahungaga zijya muri Israyeli; icyo cyaha cyo gushyira ubuzima bw’impunzi mu kaga, Israyeli ikaba igifashwamo n’igihugu cy’u Rwanda ndetse na Uganda; ibyo bikaba bitangazwa n’ikinyamakuru cyo muri Israyeli kitwa «Haaretz». Uburyo bwashyizweho n’abayobozi b’ibyo bihugu uko ari 3 mu kwirukana impunzi ziva muri Erythrea zigahungira muri Israyeli, buteye amakenga! Izo mpunzi zijya muri Israyeli inyinshi muri zo zigizwe n’abirabura bahunga ubutegetsi bw’igitugu gikaze buri mu gihugu cya Erythrea, izo mpunzi iyo zigeze muri Israyeli ntabwo zihabwa ibyangombwa by’ubuhunzi nubwo ziba zizeye kuhabona amakiriro!

Ikintu cya mbere kigaragara muri Israyeli, ni uko icyo gihugu gifite amategeko yemerera abayobozi bacyo gufunga ubuziraherezo abantu bose basaba ubuhunzi bari ku butaka bwayo. Abasaba ubuhunzi muri Israyeli baba binjiye kubutaka bwayo banyuze mu nzira zitazwi, nyuma bakaza gufatwa mu mikwabu y’abashinzwe umutekano bagahita bashyirwa muri gereza! Umubare w’abasaba ubuhungiro bafungwa muri Israyeli wiyongeraho umubare mu nini w’abaturage ba Palestine bafungwa buri munsi n’abategetsi ba Israyeli! Muri ibi bihe hakaba haravutse ikibazo cy’uko Israyeli ishaka kwikiza izo mpunzi z’abirabura idashaka ku butaka bwayo ikazohereza (déporter) ku mbaraga nubwo byitwa ko ari ku «bushake » bw’izo mpunzi, ahandi hantu hatari mu bihugu zavuyemo! Icyo cyaha cyo gushimuta impunzi, Israyeli ikaba igikora yifashishije ibyitso byayo aribyo u Rwanda na Uganda.

Israyeli yiyemeje kujya iha u Rwanda na Uganda amadolari angana n’ibihumbi 5 kuri buri mpunzi yoherejwe muri kimwe muri ibyo bihugu. Kugirango bititwa ko izo mpunzi zoherejwe mu bihugu zidashaka ku ngufu, kandi ibyo bitemewe n’amategeko mpuzamahanga ; igihugu cya Israyeli cyohereje abapolisi muri gereza zifungiyemo izo mpunzi muri gahunda yo kuzitera ubwoba no kuzibeshya kugirango zemere kuva muri Israyeli, abo bapolisi babwira buri mpunzi ifungiye muri icyo gihugu aya magambo : « Ufite amahitamo abiri gusa : uremera gufungirwa muri gereza zo muri Israyeli ubuzima bwawe bwose, cyangwa se wemere kujya mu Rwanda aho tuzaguhera ibyangombwa by’ubuhunzi ndetse tukaguha n’ibyangombwa byo gukora akazi ushaka » !

Kubera icyo kinyoma cyo kwizezwa guhabwa amafaranga n’akazi, bituma impunzi nyinshi zifungiye mu magereza atandukanye muri Israyeli, zemera ntagushidikanya ku gitekerezo cyo koherezwa mu Rwanda kuko zibwira ko zizafatwa neza zigeze i Kigali! Ibi bikaba byemezwa n’umunyamakuru witwa «Lior Birger»w’ikinyamakuruku «Haaretz» cyandikirwa muri Israyeli! Umunyamakuru «Birger» afatanyije n’abanyamakuru bagenzi be aribo «Shahar Shoham» na «Liat Boltzman» bakoze ikipe biyemeza gukora ubushakashatsi bwimbitse, bakaba barabukoreye ahantu henshi kugera no ku mugabane w’Uburayi, bari gushakisha impunzi zacitse ku icumu muzari zoherejwe mu Rwanda zivuye muri Israyeli! Ubwo bushakashatsi bakoze bwerekanye ko impunzi zoherejwe mu Rwanda ziba zoherejwe mu rupfu! Abo banyamakuru babonye umushinga wa Israyeli wo kohereza impunzi mu Rwanda ntaho utaniye no gucuruza abantu, iyicarubozo nk’uko ayo mahano akorerwa impunzi z’abirabura ziri mu gihugu cya Libiya cyangwa se imirambo y’impunzi itoragurwa mu nyanja ya Méditerranée, zigwa mu nyanja zishaka guhungira i Burayi!

Abo banyamakuru baragira bati : «Zikimara gukoza ikirenge ku kibuga k’indege i Kigali, Impunzi zavuye muri Israyeli zahise zamburwa ibyangombwa by’urugendo zahawe n’igihugu cya Israyeli kugirango zishobore kwinjira mu ndege ! Abategetsi b’u Rwanda bakaba barahise bafungira izo mpunzi mu cyumba cya Hoteli maze bahita bazimenyesha ko zihawe amasaha macye cyane zikaba zivuye ku butaka bw’u Rwanda mu buryo bwihuse! Abategetsi b’u Rwanda bakaba baratwaye izo mpunzi n’ijoro maze bazinjiza ku butaka bwa Uganda rwihishwa. Izo mpunzi zimaze kugera muri Uganda, zikaba zararishye abagande bazihishe amafaranga y’amadolari ari hagati y’100 ni 1000 kuri buri mpunzi nk’igihembo kugirango bazifashe kuva muri Uganda zigere muri Sudani y’epfo, aho zakomereje urugendo zigana muri Sudani ya ruguru, zigakomeza zijya muri Libiya zishaka inzira izigeza i Burayi. Aho hose izo mpunzi zagendaga zinyura niko zagendaga zitanga amafaranga kugira ngo zihikure zitishwe! Dukurikije ubuhamya twahawe na zimwe mu mpunzi zanyuze muri iyi nzira y’umusaraba, mu bushakashatsi twakoze, bwatweretse ko umubare munini cyane w’izi mpunzi wishwe bitewe n’ibikorwa by’iyicarubozo zagendaga zikorerwa ndetse n’ibikorwa byo gufatwa nabi cyane birenze urugero izo mpunzi zakorewe zigeze mu gihugu cya Libiya kimwe n’uko zimwe murizo zapfuye ziguye mu nyanja ya Méditerranée zishaka kujya i Burayi ».

Dore ubuhamya twahawe na Tesfay (izina twahinduye kubera impamvu z’umutekano). Uyu Tesfay ni impunzi yirukanywe muri Israyeli mu kwezi k’Ukuboza 2015; nubwo Tesfay yirukanywe muri Israyeli, yari ahamaze imyaka myinshi ari gukora akazi kajyanye n’isuku muri Hoteli yakira ba mukerarugendo iherereye Eilat. Mumpeshyi (icyi) y’umwaka w’2017 nibwo yabonanye n’aba banyamakuru barimo bakora ubushakashatsi ku izimira ry’impunzi zavuye muri Israyeli zikoherezwa mu Rwanda. Tesfay yabonanye n’abo banyamakuru ari mu mujyi muto wo mu gihugu cy’Ubudage. Tesfay yagize ati : «Ubwato twarimo bwavuye muri Libiya saa kumi za mugitondo ; nyuma y’amasaha abiri gusa, motero y’ubwo bwato yarapfuye ntiyongera gukora ; mu mpunzi 500 zari muri ubwo bwato harokotsemo abantu batarenze 100 abandi bose barapfa; abari muri ubwo bwato bavuye muri Israyeli twari 10, ariko twarokotse turi 3 gusa. Ni ukubera iki ibi byose bitubaho? Ese ntabwo twe turi ibiremwa-muntu? »

Indi mpunzi yahawe izina rya “Dawit” yahuriye n’abanyamakuru bo mu gihugu cya Israyeli mu mujyi wa Berlin, umurwa mukuru w’igihugu cy’Ubudage. Uwo Dawit nawe yari impunzi mu gihugu cya Israyeli, akaba yarabaye mu mujyi wa «Tel-Aviv» ari umukozi muri resitora. Hashize imyaka 2, Dawit nawe ashimuswe n’abategetsi ba Israyeli bamwohereza mu Rwanda bamubeshyako agiye kuhagirira ubuzima bwiza! Amezi macye mbere y’uko afatwa, Dawit yagiye ku biro by’abapolisi muri Israyeli guhinduza icyangombwa yari afite cyo kuba muri icyo gihugu, abapolisi bakimukubita amaso bahise bamufata bamujyana mu nkambi ya Holot iherereye mu butayu bwa Neguev ; akigera muri iyo nkambi nibwo yatangiye gushyirwaho iterabwoba ryo kumuhitishamo gufungwa ubuzima bwe bwose muri Israyeli cyangwa se guhitamo kujya mu Rwanda. Dawit yahisemo kujya mu Rwanda aho yoherejwe ari kumwe n’umugorewe wari utwite inda y’amezi abiri.

Dawit kimwe n’impunzi zose zoherejwe mu Rwanda na Israyeli zanyuze inzira y’umusaraba zigera muri Libiya, Dawit ageze muri icyo gihugu yatanze udufaranga yari afite aduha abanyalibiya bambutsa abantu rwihishwa mu nyanja ya Méditerrané kugira ngo bagere ku mugabane w’Uburayi. Dawit yashyizwe mu bwato bumwe, umugore we ashyirwa mu bundi bwato bwahise burohama mu nyanja abarimo hafi ya bose barapfa harimo n’umugore we ! Abo banyamakuru bagira bati: «Abo bacikacumu b’ibikorwa bibi bya leta ya Israyeli, bari mu bantu bacye cyane twahuye nabo mu Burayi bagize amahirwe yo kurokoka urupfu bakaba bagihumeka ; ariko ntabwo bazakira ihungabana ryo mu mutwe batewe n’iyo nzira y’urupfu banyuzemo ». Mu gihugu cy’Ubudage, aho Tesfay na Dawit bashoboye kugera, 99% by’impunzi zo muri Erythrea iyo zihageze bahita bahabwa ibyangombwa byo kuhaba ku buryo bw’agateganyo, naho mu mwaka w’2016, 81% by’impunzi zivuye muri Erythrea bakaba barahawe n’igihugu cy’Ubudage uburenganzira busesuye bwo kuba impunzi zemewe n’amategeko mpuzamahanga.

Nubwo bimeze gutyo ariko, Tesfay na Dawit baraburira bagenzi babo bakiri muri Israyeli ko mu gihe bazaba bafashwe n’icyo gihugu bagashyirwaho iterabwoba kugirango boherezwe mu Rwanda bagomba kubyanga, kuko iyo nzira yo kujya mu Rwanda ihwanye no kwigemurira urupfu .

Inkuru ya «reseauinternational.net» yashyizwe mu kinyarwanda na «veritasinfo»