Gambiya: Birangiye Yahya Jammeh afashe inzira y'ubuhungiro!
Yahya Jammeh
Publicité
Ku mugoroba wo kuri uyu wa gatandatu taliki ya 21 Mutarama 2017 nibwo uwari perezida wa Gambiya Bwana Yahya Jammeh yafashe inzira y'ubuhungiro, akaba ahunze igihugu yayoboye imyaka 22, ibyo bibaye nyuma yaho atangarije ko atazava ku butegetsi nubwo yari yatsinzwe amatora na Adama Barrow.
Amakuru atangazwa n'ibiro ntaramakuru by'abafaransa AFP aremeza ko Yahya Jammeh yavuye mu murwa mukuru w'igihugu cya Gambiya ariwo Banjul ari mu ndege yihariye yo mu bwoko bwa Falcon ku isaha ya saa tatu z'umugoroba ku isaha ya Gambiya aherekejwe na Perezida wa Gineya Alpha Condé.
Amakuru yatangarijwe mu murwa mu kuru wa Gineya ariwo Conakry, aremeza ko Yahya Jammeh azamara igihe gito muri Gineya nyuma yo guhungira mu kindi gihugu kitaramenyekana. Yahya Jammeh afite imyaka 51, yafashe ubutegetsi ku mbaraga za gisilikare mu mwaka w'1994, aregwa ibyaha byinshi bibangamiye uburenganzira bw'ikiremwa muntu; mu matora yo ku italiki ya 1 Ukuboza 2016 nibwo Yahya Jammeh yatsinzwe na Adama Barrow, nyuma yo kwemera ko yatsinzwe , nibwo Yahya Jammeh yisubiyeho avuga ko yibwe amajwi!
Ibihugu bigize umuryango wa CEDEAO byiyemeje gushyigikira perezida mushya watowe, umuryango w'abibumbye ushyigikira icyemezo cy'ibyo bihugu cyo kwirukana Yahya Jammeh ku ngufu za gisilikare niba atemeye ibyavuye mu matora. Ubwo perezida watowe Adama Barrow yarahiriraga mu gihugu cya Sénégal ku italiki ya 19 Mutarama 2017, nibwo Yahya Jammeh yatangiye kubona ko ari gukina n'umuriro, kuko ku mugoroba w'iyo taliki ingabo za Sénégal n'iza Nigéria zahise zambuka umupaka zinjira muri Gambiya! Nyuma y'amasaha abiri izo ngabo zambutse umupaka Yahya Jammeh yahise asaba ibiganiro byo gutanga ubutegetsi ntamaraso amenetse, byose bikaba birangiye Yahya Jammeh ahunze igihugu! Ihurizo risigaye ni ukumenya uko bizamugendekera mu buhungiro n'uburyo abategetsi bakoranye ibyaha nawe bikomeye asize muri Gambiya bazabiryozwa! Burya ngo "iminsi iba myinshi ariko igahimwa n'umwe!!"
Ubwanditsi.