Ibibazo mu mishyikirano y'amahoro y'u Burundi
Inama yabereye Entebbe muri Uganda, yahuje intumwa z'Uburundi kugira ngo bumvikane ku mishyikirano igomba kubera muri Tanzaniya mu ntangiriro z'ukwezi gutaha, iyo nama ikimara kurangira, leta y'u Burundi yahise isohora itangazo rivuga ko itemera itariki ya 06/01/2016 ko aribwo ibiganiro bizatangira Arusha muri Tanzaniya.
Itangazo ryashyizweho umukono na Willy Nyamitwe, umuyobozi ushinzwe itumanaho mu biro by'umukuru w'igihugu, ryavuze ko batumvikanye kuri iyo tariki. Leta y'u Burundi kandi yavuze ko itemera urunani CNARED rutavuga rumwe n'ubutegetsi bw'Uburundi, ruvuga ko rugamije kwubahiriza amasezerano y'amahoro ya Arusha no kugarukana intwaro ibereye mu Burundi.
Ariko Leonard Nyangoma, uyuboye CNARED, yavuze ko leta y'u Burundi itagomba guhitamo uwo ivugana nawe. Leta y'u Burundi kandi yavuze ko itasobanukiwe n'intumwa yahagarariye abagore n'amashyirahamwe ategamiye kuri leta. Umuhuza, Perezida Museveni wa Uganda, yavuze ko abo bayobozi b'u Burundi bagomba kumvikana kubera inyungu z'igihugu cyabo.
Yanavuze no ku kibazo cy'ubwigenge bw'Uburundi. Museveni yavuze ko leta igomba kuganira n'abatavuga rumwe nayo. Ministri w'ububanyi n'amahanga w'Uburundi, Alain Nyamitwe, yavuze ko Uburundi atari ubutaka butagira nyirabwo (no man's land). Museveni yagize ati" hari ikibazo ubu mu Burundi, ntabwo ushobora kujyayo bitewe n'uko u Burundi buvuga ko ari igihugu cyigenga! Ubwigenge wabuvuga gusa iyo ukingira abawe, ntabwo uvuga ko wigenga iyo abanyaburayi baza bakubwira ngo kora iki cyangwa se kiriya, ahubwo uvuga ko wigenga ubwira abavandimwe bawe bashaka kuza kugufasha".Abitabye ibyo biganiro, uretse abahagarariye ibihugu byabo n’amashyirahamwe mpuzamahanga, harimo n'intumwa za leta y’Uburundi, abahagarariye amashyaka atavuga rumwe na leta, ishyaka iri ku butegetsi rya CNDD-FDD hamwe n’abahagarariye amadini n’amashyirahamwe y’abagore.
Source : BBC Gahuza
Publicité