Rwanda : Abatagira kivugira bamaganye manda ya 3 ya Paul Kagame bandikira umuhanda !

Publié le 7 mai 2015 par veritas

N'ubwo abanyabwenge ari benshi mu Rwanda, ntibashobora kugira icyo bavuga kubutegetsi bwa Paul Kagame!

[Ndlr : Bimaze kugaragarira buri wese ko Kagame napfa n’u Rwanda ruzahita rupfa kandi n’ibyiza yagezeho akajyana nabyo ! Ibyo bigaragazwa n’abayobozi ndetse n’abayoboke b’ishyaka rya FPR bamaze kwandika abamabaruwa arenga miliyoni ebyiri basaba ko itegeko nshinga rihindurwa, kugira ngo Kagame akomeze ayobore u Rwanda ; kuko bitabaye ibyo ibyiza byagezweho byahita bisenyuka kandi nabo babeshya Kagame ko bamushyigikiye bakaba badashobora kubirengera! Amakuru ava muri komisiyo y’amatora aremeza ko n’icyegeranyo cy’uko itora ryo guhindura ingingo y’101 y’itegeko nshinga muri referandumu cyarangije gukorwa, kikaba bikibitse mu mashini! Nyuma y’amasaha abiri gusa iyo ngirwa referandumu ibaye amajwi azahita ashyirwa ahagaragara ! Nubwo bimeze gutyo ariko abanyarwanda benshi, badafite ubavugira kandi ntibagire aho bavugira ntibashyigikiye iyo manda ya gatatu ya Paul Kagame, abo batayishyigikiye batangiye kwandikira imihanda kuko ntawundi bagezaho icyifuzo cyabo ! Polisi y’u Rwanda ntiyafashe amabaruwa yandikirwa inteko asaba manda ya 3, ariko yihutiye gutoragura amabaruwa yandikiwe umuhanda kuko anenga manda ya 3 kuri Kagame !]

Mu mugoroba wo kuri uyu wa Gatatu tariki ya 06 Gicurasi 2015, mu ishuri rikuru ry’Ubumenyingiro, INES-Ruhengeri (Institute of Applied Sciences) no muri kaminuza yigenga ya Kigali ULK, hatoraguwe inyandiko zamagana manda ya gatatu ya Perezida Paul Kagame. Ubuyobozi bwa INES-Ruhengeri bumaze kwemeza amakuru y’inyandiko idasinyeho (Tract) ko yatoraguwe n’abanyeshuri ikaza gufatwa na Bienvenu umunyeshuri uhagarariye abandi, na we akayishyikiriza ubuyobozi bw’ishuri. Prosper Ziganibuga, umuyobozi wungirije ushinzwe ubutegetsi n’imari muri INES-Ruhengeri yagize ati “Mu kanya saa moya na 45 abanyeshuri batoraguye inyandiko izwi nka tract, ihita ifatwa n’uhagarariye abanyeshuri itaragera mu kigo hose.”

Twamubajije amagambo yari yanditse muri iyo tract atubwira ko atabashije kuyamenya kuko inzego zishinzwe umutekano zahise ziyijyana ariko zikavuga ko iyo nyandiko ngo yanditswe n’abasanzwe basebya u Rwanda. Si aha gusa hatoraguwe tract, kuko no muri kaminuza yigenga ya Kigali ULK ishami rya Gisenyi hatoraguwe tract mu gihe cya saa kumi z’umugoroba.

Umuyobozi wa ULK ishami rya Gisenyi Dr Cyeye, yahamije ko inyandiko itariho umukono yatoraguwe n’abanyeshuri ariko ngo nta mwanya wo gutanga amakuru afite kuko twamuvugishije arimo kwigisha. Nyuma twagerageje kumuvugisha telefoni ye ntiyacamo. Umwe mu banyeshuri twaganiriye yavuze ko iyo tract yatoraguwe muri ULK, yarimo ubutumwa bugenewe urubyiruko n’abanyeshuri. Yagize ati “Iyo nyandiko yatangiraga yerekana ko perezida Kagame yayoboye imyaka 5 RPF-Inkotanyi igifata ubutegetsi, akaza kuyobora imyaka 4 nyuma ya Bizimungu, mu myaka 23 amaze ku butegetsi akaba ntacyo yagejeje ku rubyiruko.” Undi munyeshuri wavuze ko yisomeye iyo nyandiko yavuze ko ngo abanyamuryango ba RFP-Inkotanyi ko nta mwisanzure bahabwa, ikindi kandi gahunda z’ubudehe n’ingando bikorwa ngo nta mumaro bifitiye abanyarwanda.

Iyo nyandiko kandi ngo yagaragazaga ko ishyaka riri ku butegetsi mu Rwanda ntaho ritandukaniye n’ayandi nka MRND na CDR yayoboraga mbere ya jenoside yakorewe abatutsi nk’uko iyi nkuru dukesha mugenzi wacu ukorera ikinyamakuru Rushyashya ikomeza ivuga. Umwe mu bayobozi ba kaminuza yigenga ya Kigali ULK, batubwiye ko ngo iyo nyandiko yasabaga amadini n’amashyaka guhagurukira hamwe bakamagana manda ya 3 kuko ngo nta cyiza RPF yakoze kuva yagera ku butegetsi.

Izi nyandiko zishishikariza urubyiruko, abanyeshuri, amadini n’amatorero kwamagana manda ya gatatu ya perezida Kagame, zigaragaye nyuma yaho kuri uyu wa Gatatu tariki ya 6 Gicurasi 2015, perezida w’ Inteko Ishinga Amategeko, Umutwe w’Abadepite, Donatila Mukabalisa yakiriye amabaruwa y’abasaba ivugurwa ry’Itegeko Nshinga mu ngingo yaryo y’101, barenga miliyoni ebyiri.

Inkuru y’imirasire.com