Burundi: Nkurunziza asubitse amatora y'abadepite n'amakomine ho icyumweru kimwe gusa!

11H45: Mu ijwi rya Jeff Rathke, umuyobozi ushinzwe imikoranire y'itangazamakuru na leta mu gihugu cya Leta Zunze Ubumwe z'Amerika(USA), yashyize ahagaragara itangazo ririmo amagambo akarishye yamagana ibiri kubera mu Burundi, muri iryo tangazo, igihugu cy'Amerika kirasaba perezida Nkurunziza gutangaza kuburyo bwihutirwa ko yamaganye ihohoterwa n'ikorweshwa ry'imbaraga ku bigaragambya biri gukorwa n'inzego zishinzwe umutekano z'igihugu cy'u Burundi. Amerika irasaba leta ya Nkurunziza guha urubuga rugaragara abigaragambya bamagana manda ya gatatu ashaka kwiyamamariza, Nkurunziza arasabwa n'Amerika gukura mu muhanda za bariyeri ziri kubuza abarundi guhungira mu bihugu bihana imbibi nabwo. Amerika irashimira ibihugu by'i Burayi byahagaritse inkunga y'amafaranga ku matora y'i Burundi kandi Amerika igashimira umuryango w'ubumwe bw'Afurika (UA) wahagaritse igikorwa cyo kohereza ingabo z'u Burundi mu mutwe w'AMISOM ushinzwe kugarura amahoro muri Somaliya. Amerika yatangaje ko idashobora kuzongera gutanga ubufasha ku ngabo z'u Burundi bitewe n'ibikorwa byo guhohotera abigaragambya izo ngabo ziri gukora kuko amategeko y'Amerika atabyemera. Igihugu cy'Amerika cyafashe icyemezo cyo guhagarika impapuro z'inzira kubayobozi b'igihugu cy'u Burundi bashaka kujya mu mahanga kandi Amerika igasaba n'ibindi bihugu gufata icyo cyemezo (kanda aha usome iryo tangazo).

Kuri iyi saha imyigaragambyo ikaze irakomeje i Bujumbura, umupolisi akaba amaze kurasa umusilikare. Abigaragambya nabo bakaba birukanye itsinda ry'abapolisi ryari mu muhanda witwa Muhinga ugana kuri kaminuza (université).

Nkuko byasabwe n'umuryango mpuzamahanga ndetse n'amashyaka atavuga rumwe n'ubutegetsi bwo mu Burundi akabisaba, umukuru w'igihugu cy'u Burundi Pierre Nkurunziza amaze gushyira umukono ku itegeko risubika amatora y'abadepite n'ayo mu makomine akurikije ibisabwa n'urwego rushinzwe amatora CENI mu Burundi, ibi bikaba byemezwa na Willy Nyamitwe umujyanama wa perezida Nkurunziza. Amatora y'abadepite n'ay'amakomine yari ateganyijwe kuba kuwa kabiri taliki ya 26/05/2015 yimuriwe kuwa kabiri taliki ya 02/06/2015.

 

Hagati aho imyigaragambyo yo kwamagana manda ya gatatu ya Nkurunziza irakomeje i Bujumbura, igihugu cya leta Zunze Ubumwe z'Amerika (USA) kikaba cyarohereje abasilikare bacyo (marines) i Bujumbura kujya kurinda umutekano w'ambasade y'icyo gihugu iri i Bujumbura, igihugu cy'u Bufaransa nacyo cyohereje abajandarume 15 i Bujumbura mu gikorwa cyo kujya kurinda umutekano w'ambasade yabo mu Burundi nk'uko bitangazwa na radiyo RFI.

 

Icyo gikorwa cyo kohereza abajandarume mu Burundi bikozwe n'igihugu cy'u Bufaransa kikaba cyakuruye amagambo menshi ku mbuga mpuzambaga za interneti na telefoni cyane cyane kubashyigikiye ubutegetsi bwa Kigali, barimo bavuga ko FDLR yavugwaga i Burundi ari abo bafaransa! Paul Kagame akaba agomba gutabara i Burundi akirukana abafaransa bitwa interahamwe nk'uko yabisezeranyije abakunzi be ko azirukana abafaransa muri Afurika kandi akabangamira inyungu zabo aho zizaba ziherereye hose ku isi!

 

Imyitwarire y'abategetsi b'u Rwanda n'abafana babo ku kibazo cy'u Burundi ishobora gukurura ubushyamirane bukomeye hagati y'ibihugu byombi. Kuba Nkurunziza yifuza kwiyamamariza manda ya gatatu kandi agatangwaho umukandida n'ishyaka rye CNDD FDD, ibyo bigatera imyigaragambyo muri icyo gihugu ni ikibazo cya politiki kigomba gukemurwa n'ibiganiro bya politiki mu burundi cyangwa se bikanyura mu nzira ya demokarasi ariyo matora, ariko icyo cyifuzo cyo kwiyamamaza ntabwo gihita gihindura Nkurunziza interahamwe! Biramutse ari uko bimeze Paul Kagame ushaka guhindura itegeko nshinga mu mayeri menshi kugira ngo azagwe kubutegetsi we yakwitwa iki? Nibura Nkurunziza yemera amatora kandi akihanganira kubana n'abanyepolitiki bamunenga, mu Rwanda se byifashe bite?

 

Abanyarwanda bagomba kwitonda cyane mu kibazo cy'u Burundi.

 

Ubwanditsi